მადრიდის „რეალის“ მთავარმა მწვრთნელმა და საფრანგეთის ნაკრების ყოფილმა კაპიტანმა ზინედინ ზიდანმა განაცხადა, რომ საფრანგეთის საპრეზიდენტო არჩევნების მეორე ტურში მაქსიმალურად თავი უნდა აარიდონ „ეროვნული ფრონტის“ ლიდერის მარინ ლე პენისთვის ხმის მიცემას.
– ჩემი პოზიცია უცვლელია 2002 წლიდან. მე შორს ვარ იმ იდეებისგან, რომელთა პროპაგანდას „ეროვნული ფრონტი“ ეწევა. მაქსიმალურად თავი უნდა ავარიდოთ მარინ ლე პენისთვის ხმის მიცემას. რადიკალური იდეები არასოდეს მთავრდება კარგად, – განაცხადა ზინედინ ზიდანმა.
ეს განცხადება ზიდანმა ”რეალის” ვარჯიშის შემდეგ გააკეთა.
საფრანგეთის საპრეზიდენტო არჩევნების პირველი ტური 23 აპრილს გაიმართა. საფრანგეთის საკონსტიტუციო საბჭოს მიერ დამტკიცებული შედეგებით, ემანუელ მაკრონმა ამომრჩეველთა ხმების 24,01%-ით პირველი ადგილი დაიკავა, ხოლო მარინ ლე პენი ამომრჩეველთა ხმების 21,30%-ით მეორე ადგილზე გავიდა.
მეორე ტური 7 მაისს გაიმართება.