„ახალი თაობა“ კლინიკა „ლანცეტში“ განვითარებულ მოვლენებზე გთავაზობთ ინტერვიუს ნინო კუზანოვასთან.
_ ქალბატონო ნინო, „ლანცეტის“ სკანდალთან დაკავშირებით რატომ გაიჟღერა თქვენმა გვარმა, რაში გადანაშაულებთ კლინიკის ხელმძღვანელი?
_ იცით, ეს განცხადებები რომ წავიკითხე, მწარედ გამეცინა. მადანაშაულებს იმაში, რომ თურმე მე ყველაფერში ხელს ვუშლიდი. უფრო მეტი უნდა შემეშალა, მაგრამ ამისი არც ძალა მქონდა და არც ძალაუფლება და ზუსტად მაგიტომ მოხდა ის, რაც მოხდა.
_ რა მოხდა?
_ ის, რომ ზუსტად მაგიტომ წამოვედი მაგ კლინიკიდან, რომ ჩემთვის მისი გადაწყვეტილებები და მიდგომები იყო სრულიად მიუღებელი.
_ თქვენ ბრალს გდებენ პაციენტის გარდაცვალებაში. ამ კონტექსტში რატომ გაიჟღერა თქვენმა გვარმა?
_ იცით რა, ჩემი გვარი იმდენად ხვდება ყურს, რომ ვიღაც სხვა გვარი რომ ყოფილიყო, ალბათ ამხელა ამბავი არ იქნებოდა. უბრალოდ, იმ დროს ვიყავი მთავარი ექიმი და, შესაბამისად, ზუსტად იმ პერიოდში მოხდა ეს ამბავი. ფარმან ჯეირანლი მოელაპარაკა ძალიან ცნობილ აზერბაიჯანელ ქირურგს, რომელიც ერთ-ერთი წამყვანი ტრანსპლანტოლოგია მსოფლიოში. მოელაპარაკა, რომ მას გაეკეთებინა ოპერაციები, საერთოდ თბილისში გადმოსულიყო სამუშაოდ. ეს ცუდი იდეა ნამდვილად არ იყო. დაიგეგმა კიდეც ეს ოპერაციები.
_ ლიცენზია არ ჰქონდა ამ ქირურგსო…
_ მე მრავალჯერ მოვიკითხე ლიცენზირების თემა, რომელზეც მან გამცა პასუხი, რომ ყველა დოკუმენტაცია არის მწყობრში. კადრების სამსახური და იურიდიული სამსახური მე არ მექვემდებარებოდა. ეს უშუალოდ გენდირექტორს ექვემდებარებოდა. მე ძალიან მაინტერესებდა, როგორ წარიმართებოდა ეს იურიდიული მხარე, რაზეც ის მეუბნებოდა, რომ ყველაფერი არის წესრიგში.
_ თქვენ არ იცოდით, რომ ამ ქირურგს ლიცენზია არ ჰქონდა?
_ მის ლიცენზიას რომ ვადა ჰქონდა გასული, ეს მე ნამდვილად არ ვიცოდი და ამას ძალიან ბევრი ფაქტი ადასტურებს. ეს მე გავიგე უკვე ოპერაციების შემდეგ, როდესაც ჯანდაცვის კომისია შემოვიდა და ვიყავი გაოგნებული და ამას მოჰყვა სწორედ ჩემი და ფარმანის საშინელი სკანდალი, ბევრი ადამიანის თანდასწრებით.
ამის შემდეგ ჩვენ კიდევ უფრო დაგვეძაბა ურთიერთობები, მაშინვე მინდოდა წამოსვლა, მაგრამ საჭიროდ ჩავთვალე, რომ ჯანდაცვის კომისიის იქ ყოფნის პერიოდში მე მათ გვერდით უნდა დავდგომოდი. მათ ვეხმარებოდი დოკუმენტაციების მიწოდებაში. შემდგომში მე წამოვედი კლინიკიდან, რადგან პრინციპული განსხვავებები გვქონდა ჩვენ ყველაფერთან დაკავშირებით. თუმცა აქვე დავამატებ, რომ ჯანდაცვის სამინისტრომ ქირურგს შემდეგ მისცა ლიცენზია, უბრალოდ, ეს იყო წყვეტა.
_ უბრალოდ, იმ მომენტისთვის არ ჰქონდა, როცა ოპერაცია ჩაატარა?
_ დიახ. იმ მომენტისთვის არ ჰქონდა, როცა ოპერაცია კეთდებოდა. მე კი არა, ჯანდაცვის სამინისტრომ გაითვალისწინა მისი, როგორც ქირურგის, ღირებულება. ძალიან მეწყინა იმ ქალის მხრიდან ჩემსკენ ხელის გამოშვერა. მან დამაძალაო, დაჟინებით მეუბნებოდა, საოპერაციო არისო.
_ ასე არ ყოფილა?
_ მე ვარ კარდიოლოგი, მე ვერავის ვეტყვი, კარდიოლოგიის გარდა, სხვა თემაზე რჩევას. ეს პაციენტები მოყვნენ ამ ქირურგს. ისინი კლინიკაში კი არ მოვიდნენ, ქირურგს წამოყვნენ. შესაბამისად, მე როდესაც მკითხეს, როგორია თქვენი აზრი ქირურგის შესახებო, კარგის მეტი მასზე, მისი ბიოგრაფიის გათვალისწინებით, არაფერი მეთქმოდა. დღესაც ვერ ვიტყვი მასზე, რომ ის არის ცუდი ქირურგი. ორივე ოპერაცია მან წარმატებით ჩაატარა.
_ წარმატებით?
_ დიახ. ცუდად ჩატარებული ოპერაციის შემთხვევაში პაციენტები დარჩებოდნენ მაგიდაზე. უბრალოდ, პოსტოპერაციულ პერიოდში ამ ოპერაციებს სიკვდილობა აქვს. მაღალი რისკი აქვთ ამ ოპერაციებს.
_ ანუ თქვენ ქირურგს არ ადანაშაულებთ?
_ ქირურგს არ ვადანაშაულებ. იცით, ეს ისევ ტრანსპლანტოლოგებმა და ქირურგებმა უნდა გაარკვიონ, ყველაფერი კარგად იყო თუ არ იყო. მე ამას, როგორც კარდიოლოგი, ვერ შევაფასებ.
_ თქვენ არ გაგიციათ ამ კითხვაზე პასუხი, რა შუაში ხართ კარლო კეკელიძის სიკვდილთან? რაში გდებენ ბრალს?
_ აი, თუ ვიცოდე, რაც გინდათ, ის მითხარით. მეც არ ვიცი, რას მედავებიან. ამ ქალის გამკვირვებია. მე მას შევხვდი ერთჯერადად, როცა გამოკვლევები ტარდებოდა, მე კარდიოლოგიური კვლევა ჩავუტარე და ვთქვი, რომ ის ოპერაციისთვის, გულის თვალსაზრისით, მზად იყო, მას პრობლემა არ შეექმნებოდა და ეს დადასტურდა კიდეც. გულის მხრივ მას პრობლემა არ ჰქონია. შემდგომში ვხვდებოდი დერეფანში და ვამხნევებდი. აბა რა უნდა მექნა, არ უნდა გამემხნევებინა?!
_ თქვენით თუ დაინტერესდნენ საგამოძიებო უწყებები? ჩვენების მისაცემად გიბარებენ?
_ მე დაახლოებით ორი კვირის წინ ვიყავი პროკურატურაში და მოწმის სახით დავიკითხე. ჩემ მიმართ სხვა კითხვები არ ყოფილა. არანაირ განსაკუთრებულ პასუხისმგებლობას ჩემს თავზე არ ვგრძნობ, რადგან იქ გადაწყვეტილების მიმღები იყო ფარმანი. მე ზოგადად დაძაბული ურთიერთობები მქონდა ფარმანთან.
_ რატომ?
_ იმიტომ, რომ მე ჩემი წარმოდგენები მქონდა კლინიკურ საკითხებზე, მას _ თავისი წარმოდგენები. ამიტომ მე საერთოდ დისტანცირება გამიკეთა, არ გაეკარო მაგ თემასო.
_ და ბოლოს საერთოდ გამოგიშვათ?
_ არა, მე თვითონ წამოვედი. მე ვუთხარი, რომ ჩემთვის აბსოლუტურად მიუღებელი იყო მისი დამოკიდებულება კლინიკურ მართვასთან დაკავშირებით და წამოვედი.
_ ფარმანი რაში გადანაშაულებთ დღეს? ყოველთვის ხელს მიშლიდა საქმიანობაშიო. რა ინტერესი გქონდათ?
_ კარგით რა, რა ინტერესი უნდა მქონოდა. მე რატომ უნდა ვყოფილიყავი მისი ბიზნესის ჩაძირვით დაინტერესებული?! ან იმ პაციენტთან რა ინტერესი უნდა მქონოდა, რაშიც მადანაშაულებენ, ვინმემ გამაგებინოს ერთი! მე რომ ასეთი რაღაც მდომოდა, როცა წამოვედი, სკანდალს მაშინ ავაგორებდი და კლინიკის ანტიპიარს გავაკეთებდი. თუმცა მე ვუფრთხილდები ყველა იმ თანამშრომელს, ვინც იქ მუშაობს. მინდა კარგად იყვნენ და ბევრი პაციენტი ჰყავდეთ და არავინ დაკარგოს სამუშაო ადგილი. მიუხედავად იმისა, რომ ფარმანთან ცუდი ურთიერთობა მქონდა, მე არასოდეს მისი ბიზნესის დაძირვა არ მისურვია.
_ რამდენად სამართლიანად მოხდა მისი დაკავება?
_ ეს არის პროკურატურის და საგამოძიებო ორგანოების გადასაწყვეტი. ისევე, როგორც მე არ მაქვს იმის კომპეტენცია, რომ ვინმეს ღვიძლის ტრანსპლანტაცია ვურჩიო, ასევე არ გამაჩნია იმის კომპეტენცია, ვისაუბრო იმაზე, იყო ის დასაკავებელი თუ არ იყო. სამართალდამცავმა ორგანოებმა ჩემზე უკეთ იციან ეს საქმე, ისინი გაარკვევენ და ყველას თავის ადგილს მიუჩენენ.