ორმაგ მკვლელობაში ბრალდებული არასრულწლოვანი გ.ჯ, რომელიც მიმალვაში იმყოფებოდა, საგამოძიებო უწყებაში გამოცხადდა. ის ადვოკატთან ერთად მივიდა.
როგორც „ინტერპრესნიუსს“ ბრალდებულის ადვოკატმა ტარიელ კაკაბაძემ განუცხადა, ოჯახმა ახლახან დაადგინა ბრალდებულის ადგილსამყოფელი და მყისიერად მიიღო გადაწყვეტილება, რომ გ.ჯ. საგამოძიებო ორგანოში წარედგინათ, რომ ბრალდებულმა ითანამშრომლოს გამოძიებასთან და დაეხმაროს საგამოძიებო ორგანოებს ნათელი მოეფინოს მომხდარ ტრაგედიასთან დაკავშირებულ ყველა დეტალს.
გ.ჯ.-ს დღეს აღკვეთის ღონისძიების სახით პატიმრობა დაუსწრებლად შეეფარდა. პატიმრობაში რჩება კიდევ ერთი არასრულწლოვანი, რომელიც განზრახ მკვლელობის ბრალდებით პოლიციამ მომხდარიდან რამდენიმე საათში ცხელ კვალზე დააკავა.
რაც შეეხება საქმეზე დაკავებულ სხვა პირებს, უწყების მიერ გავრცელებული ინფორმაციით, გარდა არასრულწლოვნებისა, ასევე დაკავებულია სამი პირი დანაშაულის დაფარვისა და შეუტყობინებლობისთვის. ასევე, უწყებაში არ გამორიცხავენ, რომ სისხლის სამართლის პასუხისგებაში მისაცემ პირთა წრე გაიზარდოს.