Wizz Air გაზაფხულიდან რეისების შესრულებას რამდენიმე ახალი მიმართულებით იწყებს. ავიაკომპანია ქუთაისის აეროპორტიდან პარიზში, რომში, პრაღაში, ბარსელონაში, ათენში, რიგასა და ვენაში იფრენს. როგორც Bm.ge-ს ავიაკომპანია ,Wizz Air-ის კომუნიკაციების ხელმძღვანელმა სორინა რაციმ განუცხადა, ასევე გაიზრდება რეისების სიხშირე ყველაზე მოთხოვნად რამდენიმე მიმართულებაზეც, როგორიცაა შონეფელდისა და დორტმუნდის მიმართულებები. საბოლოოდ, Wizz Air -ის 2018 წლის საზაფხულო განრიგს 12 ახალი რეისი დაემატება.
– ცენტრალურ და აღმოსავლეთ ევროპაში უდიდესი დაბალბიუჯეტიანი ავიაკომპანია Wizz Air, როგორც მომხმარებლის ინტერესებზე მორგებული კომპანია, მუდმივად ზრდის თავის ავიამიმართულებების ქსელს საქართველოში. ქუთაისის ბაზას მეორე Airbus A320 თვითმფრინავი 2018 წლის მაისში დაემატება. ამასთან, მაისშივე ხელმისაწვდომი გახდება ახალი მიმართულებები, რომელთაც მომხმარებლები დიდი ხნის განმავლობაში ელოდნენ: რეისები შესრულდება ქუთაისიდან პრაღაში (ჩეხეთის რესპუბლიკა), ბარსელონაში (ესპანეთი), პარიზში (საფრანგეთი), რომსა (იტალია) და ათენში (საბერძნეთი). 2018 წლის მარტიდან ასევე დაიწყება ფრენები ქუთაისიდან რიგის (ლატვია), ნოემბრიდან კი ვენის (ავსტრია) მიმართულებით, – განაცხადა სორინა რაციმ.
ამჟამად კომპანია მოგზაურებს რეისებს 9 ქვეყნის 13 მიმართულებით სთავაზობს, თუმცა 2018 წლიდან მომხმარებლებს ქუთაისის აეროპორტიდან 13 ქვეყნის მასშტაბით, 19 მიმართულებით მგზავრობის შესაძლებლობა მიეცემათ.
ბიზნესმედია