ოკუპირებულ აფხაზეთში დე ფაქტო პარლამენტში ე.წ. დეპუტატებმა ნარკოდანაშაულთან დაკავშირებული კანონმდებლობის გამკაცრებას პირველივე მოსმენით მხარი დაუჭირეს. კანონპროექტის მიხედვით, არაღიარებულ რესპუბლიკაში ნარკორეალიზატორებს სიკვდილით დასჯიან ან სამუდამო პატიმრობას მიუსჯიან. ასევე, ბრალდებულის საკუთრებაში არსებული ქონების კონფისკაცია მოხდება.
ცვლილების ინიციატორის ე.წ. დეპუტატ დიმიტრი დბარის განმარტებით, ეს კანონი გავრცელდება მხოლოდ ნარკომოვაჭრეებზე და არა რიგით ადამიანებზე, რომლებიც ნარკოტიკულ საშუალებებს მოიხმარენ.
გარდა ამისა, საკანონმდებლო ინიციატივა ასევე ითვალისწინებს, ნარკოტიკული ნივთიერების ზემოქმედების ქვეშ მანქანის მართვისას მძღოლის დაჯარიმებას 6 ათასი რუბლის ოდენობით და მართვის მოწმობის ჩამორთმევას.