რამაზ საყვარელიძე – “ბატიაშვილი როცა ჟურნალისტი იყო, მაშინ შევარდნაძის პრესმდივანი ვიყავი”

პოლიტოლოგი რამაზ საყვარელიძე “ახალ თაობასთან” ინტერვიუში ახალ მინისტრებზე საუბრობს.
– ბატონო რამაზ, დეპუტატი სერგო რატიანი აცხადებს, რომ წარმოდგენილ ახალ კაბინეტში პოლიტიკური წონის მქონე არც ერთი ფიგურა არ არის, ეს უფრო ტექნიკური მთავრობის მსგავსია. თქვენ რას იტყვით?
– ისეთი პოლიტიკური წონის მქონე ფიგურა, როგორიც თავის დროზე ეკონომიკის მინისტრი ქობალია იყო, სწორია რატიანი, ახლა არ არის. ადამიანი, რომელიც წარმოადგენს იმ ხელისუფლებას, სადაც არათუ პოლიტიკური, საერთოდ გაუგებარია, რა ნიშნით ხდებოდა ადამიანების მინისტრებად შერჩევა, მისი ასეთი კრიტიკა გულწრფელობის შთაბეჭდილებას არ ტოვებს. ეს უფრო კრიტიკა კრიტიკისთვის მგონია.
– ასეთი მოსაზრებაც მოვისმინე, რომ პრემიერ ბახტაძეს მხოლოდ ეკონომიკური გუნდი ანდეს. წინა ხელისუფლების დროს პრემიერ გილაურის მთავრობის სხდომებს ძალოვანი მინისტრები არც კი ესწრებოდნენ. რაღაც პარალელები ხომ არ იკითხება?
– შეიძლება იკითხებოდეს პარალელები. როგორც წესი, ეკონომიკური ბლოკია მნიშვნელოვანი, დანარჩენები მასზე იგება. ძალიან ხშირია შემთხვევები, როდესაც პრემიერი სწორედ ეკონომიკურ ბლოკს განაგებს. ის, რომ ბახტაძისთვის ეკონომიკა მნიშვნელოვანია, სულაც არ არის გასაკვირი, მით უფრო ის ეკონომიკური მიმართულებიდან მოდის და მისი პირველი განცხადებები სწორედ ეკონომიკურ მიმართულებას ეხებოდა, რომ ამ მხრივ მეტი უნდა დაეტყოს ქვეყანას.
მე არ გამოვრიცხავ, რომ ეს იყოს პირველი ნაბიჯები საკადრო მიმართულებით და კიდევ გაგრძელდეს. ისეთი შთაბეჭდილება არ რჩება, რომ მთლიანობაშია გააზრებული მთავარობის საკადრო სურათი.
– ყველაზე მეტი კითხვა განათლების სამინისტროს მიმართულებით არის, რომელსაც ახლა კულტურა და სპორტი დაემატა. იცნობთ ბატიაშვილს, რა მოლოდინები გაქვთ?
– ბატიაშვილი თავის დროზე ჟურნალისტი იყო, “ალიონში” მუშაობდა. მე მაშინ პრეზიდენტ შევარდნაძის პრესმდივანი გახლდით. ასე რომ, ჩვენ შევხვედრილვართ ერთმანეთს. საკმაოდ ენერგიული კაცი ჩანს. დამოუკიდებელი, კერძო უმაღლესი სკოლა დააფუძნა. ეს ადვილი საქმე არ არის. როგორი მინისტრი იქნება, ვერ გეტყვით, მაგრამ პირველი ნაბიჯებიდან უკვე შეიძლება გავაკეთოთ დასკვნები, თუ რას შეიძლება ველოდოთ მისი მხრიდან. ვისურვებდი, რომ განათლების სამინისტროს რევოლუციური აღტკინება არ ჰქონოდეს და პროცესის მიმართ ხანგრძლივ დროზე გათვლილი სტრატეგია ჰქონდეს.
– ექსპერტთა ნაწილი მიიჩნევს, რომ პოლიტიკური პროცესის არასტაბილურობის ფაქტორი შეიძლება წულუკიანის ახალ მინისტრთა კაბინეტში დარჩენა აღმოჩნდეს. იზიარებთ ამ მოსაზრებას?
– სიმართლე გითხრათ, საერთოდ არ მესმის წულუკიანოცენტრიზმი მიმდინარე პროცესში. მამუკა არეშიძემ თქვა, რომ ის დაესწრო სტრასბურის ადამიანის უფლებათა ევროპულ სასამართლოში პროცესს, სადაც ასეთი უსუსური რუსული მხარე ჯერ არ უნახავს. ამ პროცესში ხომ ჰქონდა გარკვეული როლი წულუკიანს?! ამიტომ მხოლოდ შავ-თეთრ ფერებში წულუკიანის დანახვა არ მესმის, უფრო სწორად, რაღაც პოლიტიკის ნაწილი მგონია.
განა არ მესმის სასამართლო სისტემის რეფორმირების პროცესში ის ხარვეზები, რომლებიც გვაქვს, მაგრამ მათზე პასუხისმგებლობა მხოლოდ წულუკიანზე არ მოდის. მე ამ პასუხისმგებლობას მთელ ხელისუფლებაზე გადავანაწილებდი.
– კახი კახიშვილისთვის მთავრობის ადმინისტრაციის ჩაბარება რა გზავნილია თქვენთვის?
– როდესაც მე გითხარით, რომ მე არ გამოვრიცხავ, რომ ეს არის პრემიერის პირველი ნაბიჯები საკადრო მიმართულებით გადადგმული, მხედველობაში მქონდა, რომ კახიშვილი დიდი ხნით არ იქნება კანცელარიის უფროსი. ეს უფრო შუალედური თანამდებობაა კახიშვილისთვის. რადგან წინააღმდეგ შემთხვევაში სახელმწიფოში იქმნება პარადოქსული ვითარება, როდესაც ხელისუფლების პირველი პირები ამბობენ – ყველაზე წარმატებული მინისტრი იყო, მაგრამ ვაქვეითებთ.
დროთა განმავლობაში ალბათ ეცდებიან, ეს წინააღმდეგობრივი სურათი გამოასწორონ. თუ არადა ნებისმიერი მინისტრი ამ ლოგიკით იფიქრებს, რომ საქმის კარგად გაკეთებას აზრი არ აქვს.
– თქვენ არ გამორიცხავთ, რომ კახიშვილი კვლავ ვიხილოთ მინისტრის პოსტზე?
– დიახ. დროებით არის მთავრობის ადმინისტრაციის უფროსი და ის გადაინაცვლებს მინისტრის პოსტზე, რომელიც ახლა ვაკანტური არ არის.
ნათია ხურცილავა, ახალი თაობა