რუსთავი 2-ის ჟურნალისტი გიორგი გვიშიანი სუს-ში დაიბარეს

რუსთავი 2-ის ჟურნალისტი გიორგი გვიშიანი სუს-ში დაიბარესრუსთავი 2-ის ჟურნალისტი გიორგი გვიშიანი სუს-ში გამოკითხვაზე დაიბარეს.

“მას შემდეგ რაც რეპორტაჟი გავიდა, გამომძიებელი დამიკავშირდა და გამოკითხვაზე დამიბარა. მან მოითხოვა იმ ინფორმაციის მიწოდება, რომელიც მე გამაჩნია,” – განაცხადა სუს-ში შესვლამდე გვიშიანმა.

საქმე ეხება “უცნაურ ზარს”, საიდანაც ჟურნალისტს რუსული ნომრიდან დაურეკეს და რუსული სპეცსამსახურების ერთობლივი გეგმის შესახებ მოუყვნენ.

ზარი გუშინ საღამოს რუსული სატელეფონო კოდიდან განხორციელდა. უცნობი ადამიანი გვიშიანს ქართული და რუსული სპეცსამსახურების ერთობლივი გეგმის შესახებ უყვება. ზარის ავტორი ირწმუნება, რომ მალე ყაზბეგის მუნიციპალიტეტის ოკუპაცია იგეგმება.

გიორგი გვიშიანის თქმით, ღამით კიდევ დაურეკეს და უთხრეს, რომ, თითქოს, მომზადებულია საფუძველი ყაზბეგის ოკუპაციისთვის. გვიშიანის განცხადებით, ზარის ავტორმა უთხრა, რომ რუსეთის და საქართველოს სპეცსამსახურების ოპერაციაა.

„საქართველოსა და რუსეთის სპეცსამსახურებმა ერთობლივი სპეცოპერაცია ჩაატარეს, რომ შექმნილიყო პირობა შემდგომში რუსეთისთვის ყაზბეგის მუნიციპალიტეტის ოკუპირებისთვის. ოპერაცია ისე ჩატარდა, რომ დამნაშავე ქართული მხარე გამოვიდეს. კონკრეტული ინფორმაცია უკვე მოგაწოდეთ, სხვას ვერაფერს გეტყვით, გარდა იმისა, რომ ჩატარდა რუსეთისა და საქართველოს ოპერაცია. სულ ესაა,“ – განაცხადა სატელეფონო ზარის ავტორმა.

„კურიერმა“ სცადა, გაერკვია, საიდან განხორციელდა ზარი. ერთ-ერთ ვირუსულ ვებგვერდზე არის სატელეფონო ბაზა, სადაც ფიქსირდება ეს ნომერი. ვებგვერდზე არის რუკა, რომელზეც ამ ზარის ფუნქციონირების ადგილად ჩრდილოეთ ოსეთი, ალანია ფიქსირდება.
ნიუპოსტი