მლეთაში ევაკუაცია გამოცხადდა – ადიდებულმა არაგვმა კალაპოტი შეიცვალა და ჯებირები გაანგრია

მლეთაში ევაკუაცია გამოცხადდა, მაშველებს მდინარე არაგვის სანაპიროზე მცხოვრები მოსახლეობა სახლებიდან გაჰყავთ.

ადიდებულმა არაგვმა კალაპოტი შეიცვალა და ჯებირები გაანგრია. წყალდიდობამ მეწყერიც გამოიწვია.

ადგილობრივების თქმით, წლებია, ამ საშიშროების წინაშე დგანან, თუმცა, მუნიციპალიტეტი ნაპირსამაგრ სამუშაოებს არ ახორციელებს. ადგილობრივები ხელისუფლებას მოუწოდებენ, რომ მოხდეს მათი საცხოვრებელი ფართით უზრუნველყოფა.

დუშეთის მერმა, ზურაბ სეხნიაშვილმა, ადგილობრივები მოსალოდნელი საფრთხის შესახებ პირადად გააფრთხილა და ტერიტორიის დატოვება სთხოვა. სეხნიაშვილის განცხადებით, არსებული ინფორმაციით, მომდევნო ორი დღის განმავლობაში წვიმებია მოსალოდნელი და ადგილობრივების ევაკუაცია აუცილებელია.

სეხნიაშვილი ამბობს, რომ ამ დროისთვის არაგვის ხეობაში სპეცტექნიკა მუშაობს და მდინარის ძველ კალაპოტში დაბრუნებას ცდილობს.

„ტექნიკა მუშაობს და კალაპოტი უნდა შევუცვალოთ მდინარე არაგვს, რომ საშიშროება ავაცილოთ მოსახლეობას,“ – განაცხადა სეხნიაშვილმა.

ადგილობრივები საცხოვრებელი სახლების დატოვებას არ აპირებენ, რის გამოც, ზურაბ სეხნიაშვილი მათთან ერთად რჩება.

ტურისტების ევაკუაცია გახდა საჭირო თრუსოს ხეობიდანაც, სადაც მეწყერი ჩამოწვა. ტურისტების 7 ჯგუფი დღეს რამდენიმე საათის განმავლობაში იზოლაციაში იყო. უცხო ქვეყნის მოქალაქეები მაშველებმა გამოიყვანეს. თრუსოს ხეობა ტურისტებისგან ამ დროისთვის დაცლილია.

მდინარე არაგვში წყლის დონე ისევ იმატებს და საშიშ ნიშნულს უახლოვდება. საფრთხე ხეობაში 8 ოჯახს ემუქრება.

რუსთავი 2

დატოვეთ თქვენი კომენტარი

პოლიტიკა

საზოგადოება

ეკონომიკა

სამართალი

მსოფლიო

მოზაიკა

მედიცინა

კულინარია

akhalitaoba.ge © 2017-2018