რადიო „მოზაიკის“ დირექტორმა გვანცა დოლუაშვილმა შსს-ს სასამართლო მოუგო

გორის სათემო რადიო „მოზაიკის“ დირექტორმა და მთავარმა რედაქტორმა გვანცა დოლუაშვილმა შინაგან საქმეთა სამინისტროს სასამართლო დავა მოუგო. შსს საპროტესტო წარწერის, „მკვლელი ქუჩაშია“, გამო გვანცა დოლუაშვილის 500 ლარით დაჯარიმებას ითხოვდა.
რადიო „მოზაიკის“ ინფორმაციით, გორის რაიონული სასამართლოს მოსამართლე დავით პაპუაშვილმა მიიჩნია, რომ შინაგან საქმეთა სამინისტროს მიერ სასამართლოში წარდგენილი მტკიცებულებები გვანცა დოლუაშვილის სამართალდამრღვევად ცნობისთვის საკმარისი არ იყო.

„გორის რაიონულმა სასამართლომ ნამდვილად ობიექტური გადაწყვეტილება გამოიტანა და შსს-ს უთხრა, რომ მხოლოდ და მხოლოდ პოლიციელების ჩვენებების საფუძველზე შეუძლებელია, რომ პირი ადმინისტრაციულ სამართალდამრღვევად ცნო და პოლიციელები ვალდებულები არიან, მეტი ობიექტური მტკიცებულება წარუდგინონ სასამართლოს. ვაპირებთ შსს-ს გენინსპექციას მივმართოთ აღნიშნული პოლიციელების დისციპლინირებული პასუხისმგებლობის თაობაზე“, – განაცხადა ადვოკატმა ალექსი მერებაშვილმა.

გვანცა დოლუაშვილის წინააღმდეგ ადმინისტრაციული წარმოება ადმინისტრაციული სამართალდარღვევათა კოდექსის 150-ე მუხლის საფუძველზე (ქალაქის იერსახის დამახინჯება) საფუძველზე მიმდინარეობდა. სამი პოლიციელის ჩვენების მიხედვით, გვანცა დოლუაშვილმა და მასთან ერთად მყოფმა პირმა გორის ცენტრში, ფეხით მოსიარულეთა სავალ ნაწილზე „მკვლელი ქუჩაშია“ დაწერა.

გორის ქუჩებში წარწერები „მკვლელი ქუჩაშია“, „მოკლულია 2 მოსწავლე“ და „სამართალი სად არის?!“ ჯერ კიდევ ივნისის დასაწყისში გაჩნდა, რითიც ხორავას ქუჩაზე მოკლული დავით სარალიძის საქმის ობიექტურ გამოძიებას ითხოვდნენ. წარწერების გაკეთებიდან მხოლოდ ორი თვის შემდეგ, ივლისის ბოლოს, გვანცა დოლუაშვილმა შეიტყო, რომ მის წინააღმდეგ ადმინისტრაციული წარმოება იყო დაწყებული. გვანცა დოლუაშვილი ვარაუდობს, რომ გამოძიება მის პროფესიულ საქმიანობას უკავშირდება და რადიოზე ზემოქმედების მცდელობაა.

რეგინფო

დატოვეთ თქვენი კომენტარი

პოლიტიკა

საზოგადოება

ეკონომიკა

სამართალი

მსოფლიო

მოზაიკა

მედიცინა

კულინარია

akhalitaoba.ge © 2017-2018