რამდენიმე წუთის წინ რიგაში დასრულდა ერთა ლიგის მე-4 ტურის მატჩი ლატვიისა და საქართველოს გუნდებს შორის.
ამავე ჯგუფის მეორე მატჩი უფრო ადრე გაიმართა. ყაზახეთმა შინ ანდორას 4:0 მოუგო და 5 ქულა დააგროვა.
საქართველოს მატჩის წინ 9 ქულა ჰქონდა და ლატვიაში გამარჯვების შემთხვევაში ჯგუფში პირველ ადგილს ინაღდებდა.
შეხვედრა სტუმრების უპირატესობით წარიმართა და მათი გამარჯვებით დასრულდა – 3:0.
პირველი გოლი ჯაბა კანკავამ შორეული დარტყმით გაიტანა. მეორე გოლი ვაკო გვილიამ შეაგდო გიორგი ჩაკვეტაძის მშვენიერი პასის შემდეგ – 2:0 პირველი ტაიმის შემდეგ.
მეორე ნახევარში გაიბრწყინა გიორგი ჩაკვეტაძემ და სწრაფი რეიდი ზუსტი დარტყმით დაასრულა – 3:0.
ამ გამარჯვების შემდეგ საქართველოს ნაკრებმა 12 ქულა დააგროვა და ჯგუფში პირველი ადგილი ვადამდე გაინაღდა.