შალვა შავგულიძე – „ლევან ყიფიანის განცხადების შინაარსი ნაკლებად სარწმუნოა – ხელისუფლებამ ის ტოტი მოჭრა, რომელსაც ეყრდნობოდა“

შალვა შავგულიძე - „ლევან ყიფიანის განცხადების შინაარსი ნაკლებად სარწმუნოა - ხელისუფლებამ ის ტოტი მოჭრა, რომელსაც ეყრდნობოდა“თავისუფალი დემოკრატების თავმჯდომარე შალვა შავგულიძე „ახალ თაობასთან“ ინტერვიუში სპორტის ყოფილი მინისტრის ლევან ყიფიანის იმ განცხადებებს აფასებს, რომლებიც მან ომეგა ჯგუფის საქმეზე გააკეთა.

„ამ კომპანიაში ვმუშაობდი 2015 წლიდან ჩემი მოვალეობა იყო, დამემყარებინა კონტაქტი ხელისუფლებასთან. ჩვენ ერთობლივი გეგმა გაგვაჩნდა, ზაზა ოქუაშვილმა ერთ-ერთი ბოლო შეხვედრისას მითხრა, რომ რადგან მისი ბიზნესი წნეხს განიცდის უცხოელი პარტნიორებისგან და საქართველოში ბიუჯეტთან დაკავშირებით. მან დახატა სცენარი, რომ ჩაგვეწერა მაკომპრომეტირებელი მასალა შიდა მოხმარებისთვის, რითიც ის დააარწმუნებდა უცხოელ პარტნიორებს, რომ ხელისუფლება მასზე წნეხს ახორციელებდა და იმ ვალდებულებებისგან გაათავისუფლებდა, რაც მათთან ჰქონდა.

მან მითხრა, რომ მივიღებდი დავალიანებას, რომელიც ჩემ მიმართ ჰქონდა, თუ ხელს შევუწყობდი ამ ჩანაწერების გაკეთებაში. ფარცხალაძის მხრიდან ზეწოლაზე საუბარი შეურაცხმყოფელი და სიცრუეა, ასეთი რამე არ ყოფილა, ფარცხალაძესთან მაქვს ნორმალური ურთიერთობა, – განაცხადა ლევან ყიფიანმა.

_ ბატონო შალვა, რა შეფასებას გააკეთებთ ლევან ყიფიანის განცხადებებთან დაკავშირებით?

_ ამ საქმესთან დაკავშირებით დეტალები არ ვიცი. მე არ შევალ იმის მსჯელობაში, ყიფიანის რომელი განცხადება მიმაჩნია ტყუილად და რომელი _ არა, ვინაიდან არ ვიცი, ამ გამონათქვამებიდან რომელია სიმართლე და რომელი _ არა.

სიმართლე, რაც საზოგადოებისთვის არის მნიშვნელოვანი, მდგომარეობს იმაში, რომ სამწუხაროდ „ქართული ოცნების“ ხელისუფლება იმდენად მოიშალა ინსტიტუციების თვალსაზრისით, რომ სარწმუნოობა აბსოლუტურად დაკარგული აქვს საზოგადოებას სახელმწიფო ინსტიტუტების მიმართ.

ვისმენთ უმრავლესობის მხრიდან განცხადებებს, რომ უნდა დაველოდოთ გამოძიების შედეგებს, მაგრამ რომელ გამოძიებაზე და სასამართლოზეა ლაპარაკი?! რომელიც საზოგადოების განცდით მხოლოდ „ქართული ოცნების“ ინტერესებს ემსახურება და სამართალს არ ემსახურება?

გვაქვს სხვა მაგალითებიც. როგორც ცდილობს მედიაზე სრული კონტროლის მოპოვებას. როგორც ცდილობდა ყველა ინსტიტუციაზე კონტროლს. ლოგიკურია, ის შეეცდებოდა ბიზნესის გაკონტროლებასაც.

თავად ყიფიანის ეს განცხადებაც ნაკლებად დამაჯერებელი განცხადების შთაბეჭდილებას ტოვებს. ხელისუფლების უნდობლობის გამო საზოგადოება ვერც ამას მიიღებს სარწმუნოდ.

_ როდესაც ყიფიანის მისამართით გაისმა ბრალდებები, ის საზოგადოების წინაშე არ გამოსულა და არ უთქვამს, რომ გავრცელებული ცნობები სიცრუე იყო. ამისთვის მას რამდენიმე დღე დასჭირდა.

_ ეს გარემოებაც მოქმედებს, რომ ყიფიანის მხრიდან ახსნა-განმარტება საზოგადოებისთვის გვიან გაკეთდა.

მაგრამ, ვიმეორებ, ყიფიანის სარწმუნოობაზე უფრო მნიშვნელოვანი აქ არის ის კრიზისი, რაც ხელისუფლების მიმართ არის და ტოტალური უნდობლობა ჩამოაყალიბა ინსტიტუციების მიმართ. მოვისმინეთ ყიფიანის უსუსური განცხადებები, რაც ნამდვილად ვერ შეცვლის სურათს და უნდობლობას ვერ გამოასწორებს.

„ქართული ოცნება“ დაადგა პარტოკრატიის გზას, რასაც არაფორმალური, ერთპარტიული მმართველობით ახოციელებს. ეს არ არის დემოკრატია. ეს არის კრიზისი, რომლისგანაც თავის დაღწევა მხოლოდ ინსტიტუციების დამოუკიდებლობითა და ურთიერთკონტროლის მექანიზმით მიიღწევა.

ვსვამ კითხვას, დაადგება ხელისუფლება ამ გზას? ეს ნაკლებად შესაძლებლად მიმაჩნია.

_ ყიფიანის ადვოკატმა განაცხადა, რომ ზაზა ოქუაშვილს უჩივლებს სასამართლოში, ჯერჯერობით ცნობილია პატივისა და ღირსების შელახვის მუხლი. როგორ წარმოგიდგენიათ მოვლენების განვითარება და როგორ ფიქრობთ, ხომ არ წაუყენებენ ოქუაშვილს ბრალდებას?

_ არ ვიცი, როგორ იმოქმედებენ და საით წაიყვანენ საქმეს. ზაზა ოქუაშვილს რა ბრალდებებიც არ უნდა წაუყენონ, საზოგადოებისთვის სარწმუნო არ იქნება, იქნება ეს ბრალდება წარდგენილი დასწრებულად თუ დაუსწრებლად.

„ქართულმა ოცნებამ“ თავი ძალიან ცუდ დღეში ჩაიყენა. მათ ეგონათ, რომ ეს სწორი გზა იყო და ასე შეძლებდნენ ყველაფრის კონტროლს. ეს არის იმ ტოტის მოჭრა, რასაც ხელისუფლება უნდა ეყრდნობოდეს. მათ მოჭრეს ეს ტოტი, ალბათ უკვე ისე, რომ მისი გაცოცხლება შეუძლებელია.

_ თქვენ როგორც იურისტსა და პოლიტიკოსს, კითხვები ზაზა ოქუაშვილის მხარესთანაც ხომ არ გაქვთ?

_ საქმის დეტალებში არ ვარ ჩახედული, რომ კონკრეტულ დეტალებზე ვისაუბრო. რამდენადაც სამართლებრივ მხარეს არ ვიცნობ, ამაზე საუბრის სურვილიც არ მაქვს .

ერთი რამე ცხადია, თუკი არსებობს დავალიანება ბიუჯეტის წინაშე, მას გადახდა უნდა. რა თქმა უნდა, ეს იმ შემთხვევაში, თუ ეს დავალიანება არ არის წარმოქმნილი ხელისუფლების მიერ ხელოვნურად ხელის შეშლის გამო ამ კონკრეტული კომპანიებისათვის. ასეთ შემთხვევაში ცხადია ამ დავალიანებას გადახდა უნდა.

მაგრამ მე არ ვიცნობ სამართლებრივ მხარეს ამ საქმის და უფრო მეტს ვერ ვიტყვი. თუმცა, არსებობს საერთაშორისო სასამართლოები და ალბათ ომეგა ჯგუფი მიმართავს საერთაშორისო სასამართლოებს.

_ ზაზა ოქუაშვილმა ისიც თქვა, რომ ბიძინა ივანიშვილის წინააღმდეგ საფრანგეთის სასამართლოს მიმართავს.

_ მე არ ვიცი, საფრანგეთის სასამართლოს რა სტატუსი ექნება, რა საკითხს განიხილავს, რამდენად მოექცევა მისი იურისდიქციის ქვეშ. შესაძლოა ივანიშვილის საკითხი მოექცეს, რადგან ის საფრანგეთის მოქალაქეა, მაგრამ მთლიანად ეს დავა რამდენად მოექცევა, არ ვიცი.

არც ის ვიცი, ლონდონის სასამართლოს იურისდიქციაში რამდენად მოექცევა ეს საქმე. რამდენად ვალდებულები იქნებიან საქართველოს საჯარო მოხელეები, რომ იქ მისცენ ჩვენება.

მაგრამ არსებობს საერთაშორისო სასამართლო. ადამიანის უფლებათა დაცვის საერთაშორისო სასამართლო. ამ პრობლემას მთლიანობაში უნდა აღწერა და იქ არის საჭირო პოზიციების დაცვა. წინა ხელისუფლების დროს ასევე გვეუბნებოდნენ, დაველოდოთ გამოძიებას და სასამართლოსო. ვინაიდან ასევე იყო უნდობლობა, სწორედ ამიტომ მივმართავდით ხოლმე ევროპულ სასამართლოს და იქ ვაღწევდით სამართლის დადგენას. ასე მოხდა გირგვლიანის საქმეზე და ბევრ სხვა გახმაურებულ საქმეზე.

ეს სამართლებრივი საქმეა, მაგრამ ხელისუფლებას უფრო მეტი აქვს საფიქრალი, ვიდრე ერთი კრიზისი და პრობლემაა. ხელისუფლებამ იმდენი მოახერხა, რომ მართალი რომც იყოს ის, საზოგადოებას მაშინაც კი აღარ სჯერა მისი. ამ გზას რომ დაადგა „ქართული ოცნება“ თავის დროზე, სწორედ ამიტომ წამოვედით კოალიციიდან თავისუფალი დემოკრატები.

იაგო ნაცვლიშვილი, ახალი თაობა