„ქართულმა ოცნებამ“ ხელისუფლებაში მოსვლიდან 6 წლის თავზე ტელეკომპანია „იმედის“ დამფუძნებლის ბადრი პატარკაციშვილის გარდაცვალების თემა გახსნილად გამოაცხადა და მკვლელობის მომზადებაში ბრალი წინა ხელისუფლების მაღალჩინოსნებს წაუყენა. ეს მოხდა არჩევნებამდე 2 კვირით ადრე. კულისებში საუბრობენ იმაზე, რომ შესაძლოა ამ დღეებში საგამოძიებო ორგანომ კიდევ ერთ რეზონანსულ საქმეზე გამოაცხადოს გამოძიების შედეგები. კულუარებში დასახელდა ყოფილი პრემიერის ზურაბ ჟვანიას გარდაცვალების საქმე.
ის, რომ იქნება კიდევ ერთი გახმაურებული საქმე გახსნილად გამოცხადებული, ღიად მიანიშნა იუსტიციის მინისტრმა თეა წულუკიანმაც, რომელმაც თქვა, რომ პატარკაციშვილის საქმე არ იქნება უახლოეს პერიოდში ბოლო გახსნილი საქმე.
საქმეების გახსნილად გამოცხადება წინასაარჩევნოდ აჩენს თუ არა პოლიტიკური შეფერილობის ეჭვებს, – ამ თემაზე „ახალი თაობა“ ყოფილ სახალხო დამცველს უჩა ნანუაშვილს ესაუბრა:
_ როგორ აღიქმება ის, რომ წინასაარჩევნოდ ხდება რეზონანსული სამართლებრივი საქმეების წარმოჩინება. ჯერ იყო პატარკაციშვილის თემა, იუსტიციის მინისტრმა თქვა, რომ ეჭვობს, ეს არ იქნება ბოლო გახსნილი თემა. კულუარებში საუბარია ჟვანიას საქმის ახალ გარემოებებზეც.
_ მე ვფიქრობ, რომ აქ მთავარი პრობლემა მაინც სამართალდამცავი სტრუქტურების დეპოლიტიზაციაა. წლების განმავლობაში რეალურად ვერ მოხდა დეპოლიტიზაცია. ეს გადაწყვეტილებებიც ამ ორგანოების პოლიტიზაციით არის გამოწვეული.
ის საქმეები, რომლებიც აქამდეც უნდა გამოეძიებინათ და არავითარ კავშირში არ უნდა იყოს საარჩევნო პროცესებთან, ქმნის პოლიტიზირების შთაბეჭდილებას.
ეს პირველი შემთხვევა არ არის, ჩვენ ამაზე ადრეც არაერთხელ განგვიცხადებია, რომ ისედაც დაძაბულ პოლიტიკურ გარემოში სიტუაციის კიდევ უფრო პოლიტიზირება დაუშვებელია. არ შეიძლება სამართლებრივი და პოლიტიკური საკითხების ერთმანეთში გადახლართვა.
პირიქით, საარჩევნო გარემო უნდა იყოს მაქსიმალურად თავისუფალი და დაცლილი პოლიტიზირებისაგან. კანდიდატებს უნდა ჰქონდეს კამპანიის თავისუფლად ჩატარების შესაძლებლობა. ამომრჩეველსაც უნდა ჰქონდეს ამა თუ იმ კანდიდატის მოქმედებასთან დაკავშირებით სრულყოფილი ინფორმაცია. სამწუხაროდ, ეს არ ხდება. ეს აღრევა კიდევ უფრო მეტ პრობლემას იწვევს. იმდენად არის ყველაფერი არეული, რომ ქვეყანაში დესტაბილიზაციის ნიშნებიც კი ჩანს.
_ არჩევნებამდე თქვენ რა მოლოდინები გაქვთ?
_ სამწუხაროა ის, რომ ქვეყანაში არის პოლიტიკური კულტურის კრიზისი. ამის დარეგულირებას სჭირდება პოლიტიკური ნება. ამ ნებას ვერ ვხედავ. პირიქით, ხელისუფლება ცდილობს, მაქსიმალურად გამოიყენოს ეს ვითარება თავის სასარგებლოდ და დაძაბოს მდგომარეობა.
ოპოზიციასაც აქვს თავისი გეგმები. აქედან გამომდინარე მე არაფერს არ გამოვრიცხავ. კიდევ ერთხელ გავიმეორებ, რომ ყველაზე მნიშვნელოვანია, ქვეყანაში იყოს მშვიდი გარემო. უნდა დასრულდეს თუნდაც ჩანაწერების გამოყენება, რომ მოსახლეობას ჰქონდეს საშუალება, არჩევანი გააკეთოს საარჩევნო პროგრამებს შორის და არა ისე, რომ მანიპულაციებმა და დაძაბულობამ მიიღოს ისეთი ფორმა, რომ ქვეყანაში გაჩნდეს დესტაბილიზაციისა და დაძაბულობის კერები. რისი ნიშნებიც უკვე არის.
არ გამოვრიცხავ, რომ დაძაბულობა და დაპირისპირება ამარჩევნებზეც იყოს, ისევე როგორც ეს რამდენიმე წინა არჩევნებზეც მოხდა.
ხელისუფლებას მართებს კიდევ უფრო მეტი მობილიზება და მაქსიმალურად უნდა ეცადოს, რომ სამართალდამცავი ორგანოები იყვნენ მაქსიმალურად დეპოლიტიზირებულები. მათ შორის არჩევნების პერიოდში და არჩევნების დღეს.
დღეს არის ამის ნიშნები, რომ ერთმანეთში აღრეულია პოლიტიკური და სამართლებრივი საკითხები. რა თქმა უნდა, ეს კიდევ უფრო მეტად დაძაბავს ქვეყანაში მდგომარეობას.
_ გიორგი გახარიამ თქვა, რომ შსს მთლიანად დეპოლიტიზირებული და ნეიტრალური ორგანოა.
_ ერთია განცხადება და მეორეა ის რეალობა და ის საქმეები, რომელთაც ჩვენ ვხედავთ. რატომ ხდება მაინცდამაინც საეჭვო დამთხვევები, რომ ასეთი მნიშვნელოვანი საქმეების გამოძიება, ან თუნდაც განცხადებები ეჭვებს იწვევს? წინა არჩევნების დროსაც გვახსოვს შეთქმულების თეორიების გავრცელება. გამოძიების დაწყება, თითქოს ვიღაცა აპირებდა რაღაც გადატრიალებას და ა. შ.
_ ამ შემთხვევაში სუს-ის განცხადებას გულისხმობთ?
_ რა თქმა უნდა. ასეთი წინააღმდეგობები არ უნდა იყოს, თუნდაც განცხადებებში.
_ ნაციონალურ მოძრაობას დაგეგმილი ჰქონდა 3 დღიანი აქცია ჯერ კიდევ სექტემბრიდან, თუმცა მან გააუქმა. რას ფიქრობთ, რატომ მიიღო პარტიამ ეს გადაწყვეტილება?
_ არ გამოვრიცხავ, რომ იმის გამო, რომ ფონი ძალიან დაძაბულია. თუნდაც იმის გამო, რომ არ მომხდარიყო ძალადობის გრადაცია და ძალადობის ინციდენტები. შესაბამისად, მე არ გამოვრიცხავ, რომ ამას უკავშირდებოდეს. მით უმეტეს, როდესაც უსაფრთხოების მინიმალური გარანტიებიც არ არსებობს. შესაძლებელია, ჰქონდეს ადგილი პროვოკაციებს. ეს არის ყველაზე სამწუხარო. ქვეყანაში ფონი მთლიანად დაძაბულია და ამაში ხელისუფლებაც მონაწილეობს. ეს არის ფაქტი და ამას ვერ გავექცევით.
_ ახსენეთ ჩანაწერების თემა და თქვით, რომ უნდა შეწყდეს მათი გავრცელება. ორივე მხრიდან უნდა შეწყდეს, ოპოზიციური ტელეკომპანიიდანაც და საგამოძიებო ორგანოების მხრიდანაც?
_ რა თქმა უნდა. წინასაარჩევნო პერიოდში უნდა იყოს მაქსიმალურად მშვიდი გარემო და ყველამ თავი უნდა შეიკავოს, თუ ეს სხვა თემას არ უკავშირდება. მაგალითად, მანამდე იყო სხვა თემაზე დაწყებული. „იბერიის“ თემა ნაკლებად უკავშირდებოდა არჩევნებს, თუმცა იმისათვის რომ გარემო მთლიანად იყოს სამუშაო და მშვიდობიანი, სასურველია, ასეთი ჩანაწერების გავრცელება არ მოხდეს. სასურველია, არ იყოს წინასაარჩევნოდ ძველი საქმეების გამოძიების შედეგების გამოქვეყნება მაინცდამაინც ახლა.
_ როგორ ფიქრობთ, ოპოზიციის გეგმებშიც ხომ არ არის პოლიტიკური ტემპერატურის აწევა?
_ არ ვიცი. ეს ალბათ მათი გეგმაა. შესაძლებელია, ეგეც იყოს, მაგრამ არის პრობლემები და ამ პრობლემებზე მედიასაშუალებებმა, საზოგადოებამ და პოლიტიკოსებმაც უნდა ისაუბრონ. გარკვეული ჩარჩოები აუცილებლად უნდა იყოს დაცული, ანუ რაღაც ზღვარი უნდა არსებობდეს.
იაგო ნაცვლიშვილი, ახალი თაობა