არ გავსულვარ დღეს ცესკოს შენობიდან და არ შევხვედრივარ ბიძინა ივანიშვილს, ეს არის მტკნარი სიცრუე, – ამის შესახებ ცესკო-ს თავმჯდომარემ თამარ ჟვანიამ განაცხადა.
ცესკო-ს თავმჯდომარის თქმით, გარკვეული მედიასაშუალებების მიერ გავრცელებული ინფორმაცია, რომ მან ცენტრალური საარჩევნო კომისიის ადმინისტრაციული შენობა დატოვა, საარჩევნო პროცესის დისკრედიტაციის მცდელობაა.
მისი განცხადებით, მაშინ, როდესაც მედიასაშუალებებით ეს ინფორმაცია ვრცელდებოდა, ის ნაცინალური მოძრაობიდან დანიშნულ ცენტრალური საარჩევნო კომისიის წევრს ხვდებოდა.
„მინდა, გამოვეხმაურო გარკვეული მედიასაშუალებებით გავრცელებულ აბსოლუტურ ტყუილ და მცდარ ინფორმაციას, რომელიც სამწუხაროდ, ჩემი ვარაუდით, ისევ საარჩევნო პროცესის დისკრედიტაციის მცდელობაა. მინდა, აღვნიშნო, რომ მას შემდეგ, რაც მე დღეს ცენტრალურ საარჩევნო კომისიაში დილით მოვედი, ამ ადმინისტრაციულ შენობაში ვარ, მე საერთოდ არ დამიტოვებია შენობა, ვინაიდან, სხდომის დღის წესრიგთან დაკავშირებული საკითხები, სამუშაო ვითარება, სამუშაო შეხვედრები მქონდა.
ზუსტად იმ დროს, როდესაც მედიასაშუალებით ეს მცდარი ინფორმაცია გავრცელდა, რომ თითქოს მე სხვაგან შეხვედრაზე ვიმყოფებოდი, ამ დროს სამუშაო ოთახში „ნაციონალური მოძრაობიდან“ დანიშნულ ცენტრალური საარჩევნო კომისიის წევრს ვხვდებოდი და ვესაუბრებოდი. ამავდროულად, მინდა მივმართო იმ მედიასაშუალებებს, რომ სულ მცირე ბოდიში აქვთ მოსახდელი საზოგადოებასთან და საკუთარ კოლეგებთან, რომლებიც ტყუილი ინფორმაციის გავრცელებით შეიყვანეს შეცდომაში და სხვაგან გადაამისამართეს.
ამავდროულად, მინდა საზოგადოებას მივმართო და ჟურნალისტებს ვუთხრა, რომ ცესკო-ს არასდროს ჰქონია რაიმე ინფორმაციის გავრცელების პრობლემა. ჩვენ ვართ საჯარო ინსტიტუცია, აბსოლუტურად საჯაროდ ვმოქმედებთ და ნებისმიერი ინფორმაციის გადამოწმება, როგორც აქამდე, ისე ახლაც არის შესაძლებელი და მინდა ვთხოვო, ასე ხელაღებით ნუ დაუჯერებენ გავრცელებულ ტყუილებს“, – აღნიშნა მან.