თელავში პრეზიდენტის ინაუგურაციისთვის კახეთის მიმართულებით და ქალაქ თელავში საავტომობილო გზებზე ტრანსპორტის მოძრაობა დროებით შეიზღუდება. ამის შესახებ ინფორმაციას, შინაგან საქმეთა სამინისტრო ავრცელებს.
უწყება ასევე ეხმაურება გაერთიანებული ოპოზიციის მიერ დაანონსებულ მასშტაბურ აქციას. განცხადებაში აღნიშნულია, რომ შსს დაიცავს შეკრებილი მოქალაქეების გამოხატვის თავისუფლებას.
როგორც შსს-ში განმარტავენ, მთელი დღის განმავლობაში პროვოკაციების თავიდან აცილების მიზნით მობილიზებული იქნებიან საპოლიციო ძალები.
„შინაგან საქმეთა სამინისტრო 16 დეკემბერს, პრეზიდენტის ინაუგურაციაზე დასასწრებად ქვეყანაში ჩამოსული დელეგაციების, ღონისძიებაზე დამსწრე მაღალი რანგის და მოწვეული ყველა სტუმრის უსაფრთხოებას დაიცავს. თელავში, საქართველოს მე-5 პრეზიდენტის ინაუგურაციის ცერემონიას სხვადასხვა ქვეყნის წარმომადგენელი დაესწრება.
აღნიშნული ღონისძიების გამო, კახეთის მიმართულებით და ქალაქ თელავში საავტომობილო გზებზე ტრანსპორტის მოძრაობა დროებით შეიზღუდება.
ინაუგურაციის პარალელურად, თელავში, ქუთაისში, ზუგდიდსა და ბათუმში საპროტესტო აქციების ჩატარებას გეგმავს პარტია “ერთიანი ნაციონალური მოძრაობა.” შინაგან საქმეთა სამინისტრო, ასევე, დაიცავს საქართველოს სხვადასხვა ქალაქში დაგეგმილ აქციებზე შეკრებილი მოქალაქეების გამოხატვის თავისუფლებას, უსაფრთხოებასა და მართლწესრიგს.
მთელი დღის განმავლობაში მობილიზებული იქნებიან საპოლიციო ძალები, რომლებიც მოახდენენ პატრულირებას, რათა თავიდან იქნას აცილებული ნებისმიერი სახის შესაძლო პროვოკაცია. უზრუნველყოფილი იქნება როგორც ინაუგურაციის მშვიდ გარემოში ჩატარების საკითხი, ისე საპროტესტო აქციების მონაწილეთა გამოხატვის თავისუფლება და ყველა მოქალაქის უსაფრთხოება.
შინაგან საქმეთა სამინისტრო მოუწოდებს აქციების ორგანიზატორებს, დაიცვან მართლწესრიგი და დაემორჩილონ პოლიციის კანონიერ მოთხოვნებს. საპროტესტო მსვლელობის და აქციების მიმდინარეობისას, სამართალდარღვევის ნებისმიერი ფაქტი პოლიციის მიერ, კანონის ფარგლებში, დაუყოვნებლივ იქნება აღკვეთილი,“ – აღნიშნულია განცხადებაში.
თელავში დილიდან სამართალდამცავების მობილიზებაა. თითქმის მთელ ქალაქში შეზღუდულია ავტომობილების გადაადგილება, განსაკუთრებული შეზღუდვები კი ცენტრშია დაწესებული.
დღეს ინაუგურაციის პარალელურად გაერთიანებული ოპოზიცია მასშტაბურ აქციას გამართავს და სალომე ზურაბიშვილის პრეზიდენტობას გააპროტესტებს.