თავისუფალი დემოკრატების თავმჯდომარე შალვა შავგულიძე მთაწმინდის ოლქში “ევროპულმა საქართველომ” და თავისუფალმა დემოკრატებმა წარადგინეს. “ახალი თაობა” შალვა შავგულიძეს ამ გადაწყვეტილების შესახებ ესაუბრა.
– ბატონო შალვა, რა საერთო გაქვთ “ევროპულ საქართველოსთან” და მათი ლიდერების წარსულთან?
– ჩვენ საერთო არ გვაქვს მათ პოლიტიკურ წარსულთან, მაგრამ საერთო გვაქვს მათ დღევანდელობასთან. სწორედ ამან განაპირობა ჩვენი ერთ საარჩევნო ბლოკად გაერთიანება.
უმთავრესი გამაერთიანებელი ქვეყნის ევროატლანტიკური ორიენტაციაა, რომელიც ორივე პოლიტიკურ ძალას მყარად აქვს. ასევე სხვა ღირებულებითი თანხვედრაც არის. ერთნაირად ვხედავთ სახელმწიფოებრივი მოწყობის საკითხებს. ორივე ძალისთვის დაუშვებელია ავტორიტარული მმართველობა. ორივესთვის ღირებულია სამართლის უზენაესობა და ა.შ.
მე აქცენტი მინდა გავაკეთო, თქვენი კითხვიდან გამომდინარე, სწორედ წარსულთან დამოკიდებულებაზე.
ჩვენს ამ ნაბიჯს ის პოლიტიკური დატვირთვაც აქვს, რომ როგორღაც უნდა გამოვიდეთ პოლიტიკური ანგარიშსწორებისა და შურისძიების მოჯადოებული წრიდან. ჩვენ უნდა შევძლოთ საზოგადოების გაერთიანება ღირებულებების ირგვლივ და არა დაქსაქსვა წასრულში სხვადასხვა პოზიციებზე დგომის გამო.
30 წელია, საქართველო დამოუკიდებელი სახელმწიფო არის და 30 წელია, ყველა ხელისუფლების შეცვლა სამოქალაქო დაპირისპირების ზღვარზეა. ყველა ხელისუფლება, რომელიც არჩევნებში მარცხდება, ან ციხეში მიდის ან საზღვარგარეთ, თუ გაასწრებს.
ეს უნდა დავასრულოთ. ამ მოჯადოებული წრიდან თუ არ გამოვალთ, ჩვენ ვერ შევქმნით ერთიან საზოგადოებას, დემოკრატიულ სამართლებრივ სახელმწიფოს, სადაც არჩევნებში ხან ერთი პოლიტიკური ძალა გაიმარჯვებს და ხან მეორე, მაგრამ ეს არ გახდება სამოქალაქო დაპირისპირების მიზეზი.
სულ სხვა არის, თუ კონკრეტულ პირებს დანაშაული აქვთ ჩადენილი, ეს უკვე პოლიტიკას სცილდება. აქ სამართალმა თავისი უნდა მოითხოვოს. რა თქმა უნდა, დანაშაულისთვის ყველამ უნდა აგოს პასუხი.
– ბატონო შალვა, სანდრო გირგვლიანის საქმე შეგახსენეს სოციალურ ქსელებში.
– ნაციონალური მოძრაობა სამართალთან დაკავშირებით ძალიან აშავებდა. მას ჰყავდა სრულად მართვადი და კონტროლირებადი სასამართლო, პროკურატურა, რის გამოც სამართალი ქვეყანაში არ იყო. სწორედ ამას ვუპირისპირდებოდი, როდესაც ადვოკატი ვიყავი და სწორედ ამან განაპირობა ჩემი პოლიტიკაში წასვლა.
სანდრო გირგვლიანის საქმეზე მაშინდელი სასამართლო უსამართლოდ მოიქცა. მოიქცა იმიტომ, რომ მას მაშინდელი ხელისუფლება აკონტროლებდა. ხელისუფლებამ რომ უთხრა სასამართლოს, ჩვენი წარმომადგენლების მხილება არ უნდა მოხდესო და სასამართლომაც ეს გაითვალისწინა, ამიტომ იყო ის უსამართლო.
დღეს მივიღეთ ის, რომ ეს მართვადი სასამართლო “ქართული ოცნების” ხელისუფლებამ სრულად გადაიბარა. მეტიც, მოაძლიერა! გამორჩეულად იმ მოსამართლეებს ჩააბარა სასამართლო ხელისუფლება.
დღეს ეს ხელისუფლება იქცევა ისე, როგორც წინა იქცეოდა.
ნაციონალური მოძრაობის ყოფილი წევრები დღეს აცხადებენ, რომ ეს მათი შეცდომა იყო, ისინი ამის გამო წუხან.
– გიგა ბოკერია წარსული შეცდომების გაანალიზებაზე საუბრობდა, როგორ ფიქრობთ, გულწრფელია? გჯერათ მისი?
– მე სრულიად მჯერა, რომ გულწრფელია. არ მაქვს საფუძველი, რომ არ დავიჯერო. ისინი ინანიებენ და სწუხან ამის გამო.
– როდესაც საუბრობდით პირისპირ ბოკერიასთან, უგულავასთან, რა დასკვნა გააკეთეთ, როგორი იყო მათი დამოკიდებულება წლების შემდეგ გირგვლიანის საქმეზე? ეს დისკომფორტს არ გიქმნით?
– გულწრფელად გეუბნებით, ამ საუბრების დროს რომ არ დამრჩენოდა ის განცდა, რომ ამ საკითხების ირგვლივ ჩვენ ღირებულებითი თანხვედრა გვაქვს და ერთნაირად ვფიქრობთ, რომ სასამართლო არც ერთი ხელისუფლების მიერ არ უნდა იმართებოდეს და რომ სრულად უნდა იყოს დამოუკიდებელი, ასევე სხვა საკითხებთან მიმართებით, არაფერი გვაიძულებდა, რომ ეს ნაბიჯი გადაგვედგა.
არასწორი მიზნებით, თუნდაც არჩევნების მოგების მიზნით, რომ გვემოქმედა მე და ჩემს პოლიტიკურ ძალას, მოგებულ და გამარჯვებულ “ქართულ ოცნებაში” ვიყავით, მაგრამ იმიტომ წამოვედით ოპოზიციაში, რომ იმის კეთება დაიწყეს, რაც წინა ხელისუფლებაში არ მოგვწონდა.
ჩვენ ღირებულებები არ შეგვიცვლია. ამიტომ, მე ამ მიმართულებით არავითარი დისკომფორტი არ მაქვს. მე იგივე ღირებულებებზე ვარ და ვიქნები. ეს ძალიან მარტივად დასანახია.
– ეს არის ერთჯერადი ერთობაა თუ გრძელვადიანი პერსპექტივისთვის, 2020 წლისთვის შექმნილი საარჩევნო ბლოკი?
– დიახ, ჩვენ გრძელვადიან პერსპექტივას ვხედავთ ამ ერთობაში. ჩვენ ერთმანეთთან თანამშრომლობის, პარტნიორობის განწყობას ვხედავთ. 2020 წლამდე დიდი დროა, არ ვიცი, კიდევ ვინმე დაგვემატება თუ როგორ იქნება.
– რესპუბლიკელები შეიძლება ვიხილოთ ამ ერთობაში, ასეთი მოლაპარაკება ხომ არ გაქვთ?
– ასეთი უშუალო მოლაპარაკება რესპუბლიკელებთან არ გვაქვს, მაგრამ ჩვენ თანამშრომლობისთვის მზად ვართ. ძირითადი ხაზი, რასაკვირველია, დასავლური, ევროატლანტიკური ორიენტაციაა.
– მთაწმინდის მაჟორიტარულ ოლქზე უნდა გკითხოთ. ოპოზიციიდან იქნებით მხოლოდ თქვენ თუ ასეთ ერთობას ვერ შეძლებს ოპოზიცია?
– ასეთ საერთო ოპოზიციურ კანდიდატზე შეთანხმების მიღწევა რთულია, ბევრი განმასხვავებელი ნიშანი არსებობს.
– ვის მიიჩნევთ კონკურენტად? შეიძლება “ოცნებამ” საერთოდ უარი თქვას და ეს ოლქი ოპოზიციას დაუთმოს?
– არავითარ შემთხვევაში ოპოზიციას არ დაუთმობს. რა ტაქტიკას აირჩევს, უშუალოდ პარტიის სახეს თუ ე.წ. დამოუკიდებელ კანდიდატს შეარჩევს, არ ვიცი. თუმაც, ამას არსებითი მნიშვნელობა არ ექნება, ნებისმიერ შემთხვევაში ეს იქნება “ქართული ოცნების” კანდიდატი. ჩემი კონკურენტი ამ არჩევნებში ხელისუფლების წარმომადგენელი იქნება.
ზოგადად საარჩევნო საკითხზე ოპოზიციის მოთხოვნის შესახებ ცნობილია. ჩვენ სრულად პროპორციულ საარჩევნო სისტემაზე გადასვლას ვითხოვთ. ამ მოთხოვნით ხელმოწერები გროვდება.
ხელისუფლებას ვურჩევ, ნუ გადაიხდის დიდ პოლიტიკურ ფასს, რადგან თუ ხელისუფლება მაინც გაჯიუტდება და მაჟორიტარული არჩევნების შენარჩუნებას გადაწყვეტს, ოპოზიციის უდიდესი უმრავლესობა შეძლებს, ერთმანეთს კონკურენტები არ დაუყენოს მაჟორიტარულ ოლქებში. ამიტომ, “ქართული ოცნება” მაინცდამაინც დიდ უპირატესობას ვერ მოიპოვებს.
ნათია ხურცილავა, ახალი თაობა