რამდენიმე დღის წინ მთელი ქვეყანა შეძრა ერთ-ერთი ბანკის დაყაჩაღების ისტორიამ. ყაჩაღებმა ჯერ ავტომანქანა გაიტაცეს მძღოლიანად და მის თანამგზავრიანად, ხოლო მომდევნო დღეს ბანკი დააყაჩაღეს. ძარცვის ოპერაციის დროს გამოიყენეს მძევლები. გატაცებული მანქანის მძღოლი _ ახალგაზრდა ქალი _ ავტომობილიდან შუა გზაზე გადმოაგდეს და მიიმალნენ.
ეს არ არის კრიმინოგენური ვითარების დამძიმების ერთადერთი შემთხვევა. ყოველდღე გვესმის მკვლელობის, ყაჩაღობისა თუ ქურდობის ახალ-ახალი შემთხვევების შესახებ. რამ გამოიწვია კრიმინოგენური ვითარების დამძიმება და ვინ არის პასუხისმგებელი? _ ამ საკითხებზე „ახალ თაობასთან“ ინტერვიუში ნაციონალური მოძრაობის ერთ-ერთი ლიდერი ზაალ უდუმაშვილი საუბრობს.
_ რამდენიმე დღის წინ ბანკი დააყაჩაღეს. ეს არ არის პირველი შემთხვევა, როდესაც კრიმინოგენური ვითარების მკვეთრი გაუარესების შესახებ გვესმის ინფორმაციები. რას უკავშირებთ ამ ყოველივეს და ვის პასუხისმგებლობას ხედავთ?
_ ბუნებრივია, თუ ჩვენ ვინმეს პასუხისმგებლობაზე ვსაუბრობთ, ეს უპირველეს ყოვლისა ხელისუფლების პასუხისმგებლობაა. როდესაც ვითარებას ვეღარ აკონტროლებ და მთლიანად გაქცეული გაქვს სადავეები, როდესაც კრიმინალი თარეშობს, ეს პირდაპირ ხელისუფლების პასუხისმგებლობაა.
რაც შეეხება მიზეზებს, ეს ძალიან მარტივია. ხელისუფლებამ როდესაც გადაწყვიტა, რომ არჩევნები კრიმინალთან ერთად უნდა ჩაეტარებინა, ბუნებრივია, კრიმინალი იღებს რაღაც გარანტიებს. ქვეყანაში არის დაუსჯელობის სინდრომი, ამიტომაც მიშვებულია კრიმინალი და იმას აკეთებენ, რაც უნდათ. ივანიშვილმა მართლა 90-იან წლებში დაგვაბრუნა. ყაჩაღებს მძევლები აეყვანათ და ისე გაეძარცვათ ბანკი, ბოლოს როდის იყო, არც კი მახსოვს. ამ მხრივ ყოველგვარ ზღვარს გავცდით. ეს იმიტომ არის, რომ სახელმწიფო ინსტიტუტები პრაქტიკულად ჩამოშლილია და თავის ფუნქციას არავინ ასრულებს.
გახარია იმის ნაცვლად, რომ კრიმინალს ებრძოდეს, დაკავებულია არჩევნებით. მთელი მისი ფუნქციაა, რომ არჩევნები მოიგოს ქვეყანაში და შემდგომ ატერორონ ბიზნესი და ა. შ. კრიმინალთან ბრძოლა ალბათ ბოლოს უწერია შინაგან საქმეთა მინისტრს პრიორიტეტებში. ალბათ იმიტომ მივიღეთ ის სურათი, რაც ქვეყანაში არსებობს.
რამდენიმე დღის წინ ერთ-ერთ ტელეარხზე ვუყურებდი სიუჟეტს, სადაც ნაჩვენები იყო, რომ ქვეყნის მხოლოდ ორ რეგიონში 1 კვირის განმავლობაში ყაჩაღობის 40 ფაქტი მოხდა. ამაზე მეტი რა უნდა იყოს?! ქვეყანაში პრაქტიკულად დომინირებს კრიმინალი. ეს შეფასება შეიძლება გაკეთდეს.
_ ახსენეთ არჩევნები გამომწვევ მიზეზებზე საუბრისას. ფიქრობთ, რომ ხელისუფლებასა და კრიმინალებს შორის გარიგება მოხდა?
_ კი არ ვფიქრობ, ეს ასე იყო. პირდაპირ ვუყურებდით, რა ხდებოდა საარჩევნო უბნებთან. პირდაპირ იყო გააქტიურებული ქუჩა. რა მეთოდებით მიჰყავდათ ხალხი არჩევნებზე… პირდაპირ ქუჩას ჰქონდა დავალებული, რომ არჩევნებზე ხალხის რაც შეიძლება მეტი მობილიზაცია უნდა მომხდარიყო.
ის ხალხი, ვინც არჩევნებზე საერთოდ არ ყოფილა, გამოიყვანეს ძალით და ცემა-ტყეპით მიჰყავდათ საარჩევნო უბნებზე, რომ ხმა მიეცათ.
ქუჩა ამას ლამაზი თვალებისთვის ხომ არ გააკეთებდა?! რაღაც გარანტიები უნდა მიეღოთ მათ ხელისუფლებისგან, შესაბამისად, რაღაც გარიგება არსებობდა ხელისუფლებასა და ქუჩას შორის. ამის მეშვეობით გაიმარჯვა ბიძინა ივანიშვილმა ამ არჩევნებში. როდესაც კრიმინალი გარანტიებს იღებს, შემდეგ მის შესრულებას ითხოვს. აქედან გამომდინარე ჩემთვის სიურპრიზი არ ყოფილა, რომ არჩევნების შემდეგ განსაკუთრებულად გაუარესდა ქვეყანაში კრიმინოგენური ვითარება.
_ არჩევნებამდეც საკმაოდ მძიმე ფონი იყო. უკავშირდება თუ არა ეს საყოველთაო ამნისტიას, როდესაც ბევრი პატიმარი გაათავისუფლეს ციხიდან?
_ ბუნებრივია. ის, რაც ჩაიდინეს 2012 წელს, როდესაც არა მხოლოდ კრიმინალები გამოუშვეს, არამედ ჯაშუშები და უმძიმესი დანაშაულისთვის გასამართლებული პირები. როდესაც პოლიტიკური სტატუსით გაათავისუფლეს პირები, ეს კრიმინალისთვის იყო მწვანე შუქის ანთება. გვახსოვს ბიძინა ივანიშვილის განმარტება, კრიმინალი კი გაიზარდა ქვეყანაში, მაგრამ ჩვენ გაგებით უნდა მოვეკიდოთო.
7 წელია, საქართველოს მოსახლეობა ცდილობს, გაგებით მოეკიდოს. მათ სახლში უვარდებიან, აყაჩაღებენ, ართმევენ. ხალხს ქუჩაში ბავშვების გაშვება უკვე ეშინია. კაცმა არ იცის, რა ელოდებათ ადამიანებს ქუჩაში.
რაც დათესა „ქართულმა ოცნებამ“, იმას იმკის. ყველაზე ცუდი ის არის, რომ ეს ყველაფერი მოსახლეობაზე გადადის, მოსახლეობის უსაფრთხოებაა დაუცველი, თორემ იმ ბატონებს, ვინც ჯიპებით დაბრძანდებიან ქუჩებში, ეს ნამდვილად არ აწუხებთ.
_ ივანიშვილის ცნობილი განცხადება, გაგებით უნდა მოეკიდოთო, გზავნილიც ხომ არ იყო კრიმინალებისთვის, რაღაც დაუსჯელობის გარანტიების მიღების თვალსაზრისით?
_ რა თქმა უნდა. ასეთი ბევრია. რასაც ვუყურებთ, ჩანს, რომ ქვეყანაში დაუსჯელობის სინდრომი არსებობს. თუ გყავს მფარველი ხელისუფლებაში, ნაცნობი, ან მეგობარი, შენთვის მწვანე შუქია ანთებული. შეგიძლია ყველაფერი აკეთო და არასოდეს დაისჯები. ამ ხელისუფლებამ სამაგალითოდ დაგვანახა. ეს ყველაფერი მოქმედებს და ყველაზე ცუდი ის არის, რომ რიგითი ადამიანები არიან დაუცველები.
ჩვენ დღეს მივიღეთ ნახევრად კრიმინალური ხელისუფლება, რომელიც დაფუძნებულია იმაზე, რომ ასეთი კრიმინალური მეთოდებით მართოს ქვეყანა.
_ აყენებთ თუ არა გიორგი გახარიას პასუხისმგებლობის საკითხს?
_ ბუნებრივია. უპირველეს ყოვლისა, ეს არის შინაგან საქმეთა მინისტრის პასუხისმგებლობა. თუნდაც თიბისის მოვლენები რომ ავიღოთ, ყველა ნორმალურ ქვეყანაში, რასაც შს მინისტრი გააკეთებდა, იქნებოდა თანამდებობიდან წასვლა და არა მხოლოდ ამიტომ. ძალიან ბევრი ფაქტის გამო, რაც ქვეყანაში ხდება.
თუმცა, ეს ადამიანიც ბიძინა ივანიშვილის მფარველობის ქვეშ არის. შესაბამისად, სანამ ივანიშვილი მის მიმართ კეთილგანწყობილი იქნება, მანამ შეასრულებს შს მინისტრის ფუნქციას. რა თქმა უნდა, გახარია უნდა გადადგეს. არა მხოლოდ ის, არამედ მთავრობის პასუხისმგებლობაა.
_ კულუარებში საუბარი არის იმაზე, რომ შესაძლოა გახარიას პოსტი ირაკლი ღარიბაშვილმა დაიკავოს. თქვენი პოლიტიკური პროგნოზი როგორია?
_ მე ნამდვილად ვერ გეტყვით, რა ჩანაფიქრი აქვს ბიძინა ივანიშვილს. თუმცა, ერთი რამე ფაქტია, შესაკრებთა გადანაცვლებით „ქართულ ოცნებაში“ ნამდვილად არაფერი იცვლება. რომელი მარიონეტი რომელ თანამდებობაზე იქნება, რა მნიშვნელობა აქვს _ ყველა თანამდებობის პირი ბიძინა ივანიშვილის აჩრდილია.
ივანიშვილი ამ ხალხს იმის მიხედვით არჩევს, ვინ უფრო კარგად შეასრულებს მის დავალებებს. ასე რომ, გახარია იქნება, ღარიბაშვილი თუ კიდევ სხვა ვინმეს იპოვიან, ამას მნიშვნელობა არ აქვს. მნიშვნელობა აქვს იმას, რომ ქვეყანაში სახელმწიფო ინსტიტუტები აღარ მოქმედებენ და ყველაფერი მართულია ერთი ადამიანის მიერ.
_ თქვენ როგორ აღიქვით ღარიბაშვილის დაბრუნება? რა გვითხრა ამით ივანიშვილმა?
_ ეს იყო ვა-ბანკზე წასული ადამიანის გადაწყვეტილება, რომელსაც არავინ აღარ დარჩა ირგვლივ, ვისაც შეიძლება ენდოს და დაეყრდნოს. ღარიბაშვილი როგორი ნეგატიური ფიგურაც იყო და როგორი ნეგატიური შეფასებებით წავიდა ხელისუფლებიდან, ეს ყველას კარგად გვახსოვს. ისიც კარგად გვახსოვს, რა ხდებოდა ღარიბაშვილის დროს ხელისუფლებაში. შესაბამისად, მისი დაბრუნება ნიშნავს იმას, რომ ივანიშვილს ფიზიკურად აღარ ჰყავს ადამიანები, რომლებსაც დაეყრდნობა. ამიტომ გადაწყვიტა ღარიბაშვილის დაბრუნება, თუმცა დარწმუნებული ვარ, რომ ეს უკუშედეგს მოიტანს და ნეგატიურად აისახება „ქართული ოცნების“ იმიჯზე.
დღეს ბიძინა ივანიშვილი ფაქტობრივად პოლიტიკური ბანკროტია. ისევე როგორც მთლიანად „ქართული ოცნება“. ღარიბაშვილის დანიშვნა ნებისმიერ პოსტზე დააჩქარებს ამ რეჟიმის დასასრულს.
_ ანუ მიიჩნევთ, რომ „ოცნების“ ჩამოშლის პროცესი დაწყებულია?
_ დიდი ხანია, მისი ჩამოშლის პროცესი დაწყებულია. ჩვენ ვხედავთ, რომ ყოველდღე ახალ-ახალი დეპუტატი ტოვებს „ქართული ოცნების“ რიგებს ძალიან ხმამაღლა.
არავინ იფიქროს, რომ ეს ბიძინა ივანიშვილის თამაშია. არანაირი თამაში არ არის. ეს უბრალოდ არის ის, რომ ბიძინა ივანიშვილი ვერ აკონტროლებს „ქართულ ოცნებაში“ არსებულ ვითარებას და მთლიანად ეშლება ხელოვნურად შექმნილი გუნდი.
იაგო ნაცვლიშვილი, ახალი თაობა