ვახტანგ ძაბირაძე – “დღევანდელ ხელისუფლებაში გახარია საკვანძო ფიგურაა”

პოლიტოლოგი ვახტანგ ძაბირაძე “ახალ თაობასთან” ინტერვიუში შინაგან საქმეთა მინისტრ გიორგი გახარიას პარლამენტში გამოსვლაზე და მის პოლიტიკურ მომავალზე საუბრობს.
– ბატონო ვახტანგ, შინაგან საქმეთა მინისტრი პარლამენტში მივიდა და დეპუტატების კითხვებს უპასუხა. რას გამოყოფდით ამ გამოსვლიდან, გაართვა თავი გახარიამ?
– მიუხედავად იმისა, მმართველობის რა ფორმაა ქვეყანაში, პარლამენტი ყოველთვის იყო განმსაზღვრელი როგორც საშინაო, ისე საგარეო პოლიტიკის. პარლამენტს აქვს აღმასრულებელ ხელისუფლებაზე ზედამხედველის ფუნქცია. ამიტომ აუცილებელია, მინისტრი გამოცხადდეს და დეპუტატთა შეკითხვებს პასუხი გასცეს.
როდესაც მთავრობის საქმიანობას ეხება საკითხი, ოპოზიცია და პოზიცია არ უნდა იყოს სხვადასხვა მხარეს. უმრავლესობა უფრო მეტად არის პასუხისმგებელი, ვიდრე ოპოზიცია, რადგან მთავრობა უმრავლესობის დანიშნულია და ის პასუხისმგებლობას ინაწილებს. აქ მთავარი პრობლემა ის არის, რომ ჩვენი საზოგადოება ასეთ რამეს მიუჩვეველია. როგორც წესი, უმრავლესობა პარლამენტში მისულ თავის მინისტრს კბილებით იცავდა და ამის მეტი რა გვინახავს?!
– მთავარი კითხვები ეხებოდა ხორავას ქუჩის ტრაგედიას, კრიმინოგენული ვითარების გაუარესებას და არჩევნების ირგვლივ განვითარებულ მოვლენებს. შინაგან საქმეთა სამინისტრო ამ გამოწვევებს რამდენად გაართმევს თავს?
– კრიმინოგენული მდგომარეობის გამოსწორების პოტენციალი შინაგან საქმეთა სამინისტროს აქვს. სხვა საკითხია, რამდენად მოინდომებს, რადგან ძალიან რთული პრობლემაა. შს სამინისტრომ ერთი მხრივ უნდა იმოქმედოს ადამიანის უფლების მაღალი სტანდარტით და მეორე მხრივ უნდა აღკვეთოს და პრევენცია გაატაროს დანაშაულის. წინა ხელისუფლებამ ამ ამოცანას უფრო მარტივად გაართვა თავი.
– ნულოვანი ტოლერანტობის ლოზუნგიდან გამომდინარე?
– დიახ, ამაშია საქმე. ამიტომ არის რთული ამოცანა შინაგან საქმეთა სამინისტროს და პირადად მინისტრის წინაშე. თუ იგივე პროცესი დაიწყება, რასაც ნაციონალური მოძრაობის ძალოვანი სტრუქტურები აკეთებდნენ, მაშინ ეს ბევრად მარტივი იქნება, მაგრამ ჩვენმა საზოგადოებამ ამაზე უარი თქვა.
– შერჩევითი სამართალი იყო ბევრჯერ ნახსენები.
– თუ ქვეყანაში შერჩევითი სამართლის განცდა იქნება, მაშინ არაფერი არ გამოვა. რაც თავი მახსოვს, ეს პრობლემა გვიდგას და ვერა და ვერ დავასრულეთ. მოსახლეობას უნდა ჰქონდეს განცდა, რომ სამართლიან სახელმწიფოში ცხოვრობს და რომ შერჩევითი სამართალი დასრულდა. სამართალი ყველასთვის ერთი უნდა იყოს ქვეყანაში.
რაც შეეხება სარალიძის საქმეს, აქ ყოველგვარი კითხვის ნიშანი უნდა მოიხსნას, ეს საქმე ისე უნდა დასრულდეს, რომ არც ერთი კითხვა არ უნდა დარჩეს არათუ ოჯახს, მამას, არავის, ჩვენი საზოგადოების არც ერთ წევრს. ამ საქმეზე სამართალი მალე უნდა დადგეს.
– გახარია შეძლებს ამ ყველაფრის განხორციელებას?
– დღევანდელ ხელისუფლებაში გახარია საკვანძო ფიგურაა. თუ ზოგადად შევხედავთ ხელისუფლებას, მის აქტივს, აქ მხოლოდ ორი ფიგურა ჩანს. ერთი მოგახსენეთ გახარია და მეორე არის კალაძე. სხვა პირები არ ჩანან, რომელთაც მომავლის, ხვალინდელი დღის პრეტენზია აქვთ.
გახარიაც და კალაძეც პოლიტიკოსად ყალიბდებიან. დღეს არ შეიძლება მათზე ვთქვა, რომ ისინი უკვე არიან ჩამოყალიბებული პოლიტიკოსები, მაგრამ აქეთკენ მიდიან. მე ვფიქრობ, რომ მათ ამის პრეტენზიაც და პოტენციალიც აქვთ თუ, რასაკვირველია, სწორად იმოქმედებენ და იმუშავებენ.
ნათია ხურცილავა, ახალი თაობა