„ქართულმა ოცნებამ“ შუალედური არჩევნებისთვის მთაწმინდის მაჟორიტარულ ოლქში ექიმი ლადო კახაძე წარადგინა. პარტიამ დაასახელა სხვა კანდიდატებიც, რომლებიც შუალედურ არჩევნებში სხვადასხვა თვითმმართველ ორგანოებში მოსახვედრადაც იბრძოლებენ. შუალედური არჩევნები 19 მაისს გაიმართება.
რა ლოგიკას ექვემდებარება კახაძის წარდგენა, მაშინ როცა პარტიამ ცოტა ხნის წინ გაავრცელა განცხადება, რომ ახალ სახეებს ეძებს? – ამ და სხვა საკითხებზე „ახალ თაობასთან“ პოლიტოლოგი ნიკა ჩიტაძე საუბრობს.
_ მმართველმა გუნდმა მთაწმინდის ოლქში მაჟორიტარობის კანდიდატად ლადო კახაძე დაასახელა. რით აიხსნება ეს?
_ ისინი თვლიან, რომ ლადო კახაძე ცნობილი ექიმია. მას გააჩნია პოლიტიკური გამოცდილება. ის იყო თბილისის პირველი საკრებულოს თავმჯდომარე 1998-2002 წლებში. აქედან გამომდინარე თვლიან, რომ ლადო კახაძე იქნება მათთვის მისაღები კანდიდატი მთაწმინდის მაჟორიტარულ ოლქში.
_ ის ჯერ ლეიბორისტებში იყო, მერე მოქალაქეთა კავშირში გადავიდა. ეს ფაქტორი გარკვეულ როლს არ ითამაშებს?
_ იქიდან გამომდინარე, რომ „ოცნება“ ალბათ გამოიყენებს ადმინისტრაციულ რესურსს და ა. შ. ვხედავთ, რომ აღნიშნული ფაქტორები ვერ ასრულებს როლს. იგივე სალომე ზურაბიშვილის შემთხვევაში მისი მხრიდან გვესმოდა განცხადებები, რომ საქართველომ ომი დაიწყო, მაგრამ ამის მიუხედავად ბევრმა ადამიანმა მისცა მას ხმა. მოისყიდეს ამომრჩეველი, დააშინეს.
იმ ფაქტმა, რომ კახაძე ჯერ ლეიბორისტებში იყო და მერე მოქკავშირში გადავიდა, არა მგონია, ითამაშოს გადამწყვეტი როლი.
_ პარლამენტის თავმჯდომარემ თქვა, რომ საპარლამენტო არჩევნები ისე აღარ უნდა ჩატარდეს, როგორიც იყო საპრეზიდენტო არჩევნებიო. ამით რა გამოდის?
_ ვითომ აღიარებენ. შეიძლება დღეს თქვან უცხოელი დამკვირვებლების გასაგონად. შეიძლება ეს გააკეთეს იმ შენიშვნების საპასუხოდ, რაც მათ მიიღეს. იგივე ამერიკის სახელმწიფო დეპარტამენტის მხრიდან, იგივე ეუთოს ადამიანის უფლებათა დაცვის ოფისიდან და ა. შ. აქედან გამომდინარე აღიარებენ და ამბობენ, რომ ასე აღარ უნდა ჩატარდეს.
_ ამერიკის ელჩის განცხადების მერე გააკეთა კობახიძემ ეს განცხადება.
_ კი ბატონო. რომ არ უნდა ჩატარდეს, ეს გასაგებია, მაგრამ ეს აღიარება არ ნიშნავს, რომ გული შესტკიოდეთ ამაზე.
_ „ოცნებამ” ჯერ გვითხრა, ახალ სახეებს ვეძებთო და მერე უცებ გვთავაზობენ ლადო კახაძის კანდიდატურას. რამდენად თანხვედრაშია ეს?
_ ჰგონიათ, რომ კოლორიტული ფიგურაა ლადო კახაძე მთაწმინდის ოლქში. ხანდახან მათ განცხადებებს არ უნდა დავაკვირდეთ და მათ ქმედებებს უნდა დავაკვირდეთ. თუმცა, მართალს ბრძანებთ, რომ ამ შემთხვევაში მათი ქმედებები და განცხადებები ერთმანეთს ეწინააღმდეგება. ეს პირველი შემთხვევა არ არის.
_ ანუ მათ ლოგიკასთან დაკავშირებით კითხვები თქვენც გიჩნდებათ?
_ კი რა თქმა უნდა. მაგრამ, ეს პირველი არ არის. უარესიც უთქვამთ და არ მიკვირს.
როდესაც საუბრობენ, რომ ბიზნესი თავისუფალია და თავისუფლად სუნთქავს და ამ დროს გვახსენდება „იბერიის“ თუ „თიბისი ბანკის“ ამბები და ანაკლიის პორტს ექმნება პრობლემა, ეს უფრო მიუღებელია.
ამ ფონზე მათი სხვა განცხადებები უკვე აღარ მიკვირს.
_ შუალედურ არჩევნებზე ორი მთავარი ცხელი წერტილი გველოდება _ მთაწმინდის მაჟორიტარის და ზუგდიდის მერის არჩევა. თქვენ რომელს უფრო გამოარჩევდით?
_ ორივეს. თქვენ იცით, როგორი დაძაბული ბრძოლა იყო მთაწმინდაზე 2016 წელს. ისიც ვიცით, რომ ადმინისტრაციული რესურსის წყალობით მოიგო მეორე ტურში სალომე ზურაბიშვილმა. ბრძოლა იქნება ახლაც. ასევე ბრძოლა იქნება ზუგდიდშიც. ვიცით, რომ სანდრა რულოვსს გააჩნია მეტად მაღალი ავტორიტეტი სამეგრელოში. მეგრულ ენაზეც კი მიმართა მან ზუგდიდელებს, როდესაც პირველი ლედი იყო. ამიტომაც, ბრძოლა იქნება.
ლაკმუსის ქაღალდივით იქნება და ყველაფერი დამოკიდებული იქნება იმაზე, რა რეიტინგი გააჩნია ან ოპოზიციას, ან მმართველ ძალას. ეს კარგად გამოჩნდება მთაწმინდის მაგალითზეც და ზუგდიდის მაგალითზეც.
_ ორი მთავარი კანდიდატი განიხილებოდა გაერთიანებულ ოპოზიციაში ზუგდიდის მერობის კანდიდატად _ სანდრა რულოვსი და ნიკა მელია. ხომ არ გგონიათ, რომ თავისი პოლიტიკური აქტივობიდან გამომდინარე ნიკა მელია უფრო იმსახურებდა, ან მეტი შანსი ხომ არ ექნებოდა?
_ ეგრე მაშინ შეიძლებოდა მთაწმინდაზეც წარედგინათ მისი კანდიდატურა. იმიტომ, რომ ის თბილისის მერად იყრიდა კენჭს.
_ თუმცა, მთაწმინდის შემთხვევაში ოპოზიციურ შეთანხმებაზეა საუბარი.
_ კი, გასაგებია. ორივე იმსახურებს. ნიკა მელიაც აქტიურია და სანდრა რულოვსიც იმსახურებს.
_ მხედველობაში ის მაქვს, რომ პოლიტიკურად აქტიური არ არის ქალბატონი სანდრა.
_ გასაგებია, მაგრამ საკმაოდ აქტიური იყო, როდესაც ის კამპანიას ატარებდა 2016 წელს საპარლამენტო არჩევნების დროს.
_ დამეთანხმებით ალბათ, რომ მარტო არჩევნები არ წყვეტს და მხოლოდ არჩევნების დროს აქტიურობა საკმარისი არ არის.
_ ეს მისი საქმეა. ვერ მოვთხოვთ, რომ პოლიტიკურად ყოველთვის აქტიური იყოს, მაგრამ საზოგადოებრივად ყოველთვის აქტიური იყო და ის განსაზღვრავს მის მაღალ რეიტინგს. ერთი პერიოდი ლადო კახაძეც არ იყო დიდი ხანი პოლიტიკაში, მაგრამ დღეს ჩაერთო პოლიტიკურ საქმიანობაში ისევ.
_ ხომ არ უნდა ველოდოთ, რომ იგივე მთაწმინდაზე „ოცნებამ“ დათმოს. არა უბრალოდ დათმოს, არამედ არ გამოიყენოს ადმინისტრაციული რესურსი, დადებითი მოლოდინები გააჩინოს საერთაშორისო თანამეგობრობაში და 2020 წელს სხვანაირად შეუტიოს?
_ ნაკლებად მოსალოდნელია. დათმობა ნიშნავს იმას, რომ გარკვეულწილად ოპოზიციას მისცემს ასპარეზს და გამოჩნდება, რომ ოპოზიციის რეიტინგი კიდევ უფრო გაიზარდა და მმართველი ძალის შესუსტდა. მე ასე მგონია, რომ ყველა გზით ეცდება, თავისი კანდიდატი გაიყვანოს.
_ „ოცნების“ კანდიდატის მთავარ კონკურენტად ვის მიიჩნევთ იმ კანდიდატებიდან, ვინც უკვე დასახელებულია?
_ მთაწმინდაზე ჯერ-ჯერობით გამოკვეთილი სურათი არ არის.
_ შავგულიძეს რა შანსი ექნება?
_ შავგულიძეს საკმაოდ მაღალი შანსი აქვს. ზოგი კი აცხადებს, რატომ გაერთიანდა „ევროპულ საქართველოსთან“, ყოფილ ნაციონალებთან და ა. შ. მაგრამ იდეოლოგიურად გასაგებია, ორივე პარტია პროდასავლურია. შავგულიძემ სწორი ნაბიჯი გადადგა. მის პარტიას, თავისუფალ დემოკრატებს, არ გააჩნია მაღალი რეიტინგი და გადადგა ეს ნაბიჯი.
მისი ყოფილი თანაგუნდელები მთავრობაში ან დიპლომატიურ სამსახურში წავიდნენ. როცა ალასანიამ დატოვა პოლიტიკა, ბევრი მთავრობაში წავიდა. იგივე ვიქტორ დოლიძე, ზურაბ აბაშიძე, ირაკლი ჩიქოვანი, რომელიც პრემიერის მრჩეველია და ა. შ. ეს უფრო მიუღებელია, როცა ყოფილი ოპოზიციონერი ხელისუფლებაში მიდის, იმიტომ, რომ მისმა პარტიამ 5%-იანი ბარიერი ვერ გადალახა.
შავგულიძე კი ისევ ოპოზიციაში რჩება და ეს გამართლებული ნაბიჯია.
იაგო ნაცვლიშვილი, ახალი თაობა