რატომ იჩქარა ხელისუფლებამ „რუსთავი 2“-ის საქმეზე აღსრულება, რატომ ფიქრობს, რომ ბიძინა ივანიშვილი ცდილობს საქართველო რუსეთის გუბერნიად აქციოს, რას ფიქრობს პირადი ცხოვრების კადრებზე მაია ცქიტიშვილის განცხადებებასთან დაკავშირებით და როგორ უნდა გაგრძელდეს ბრძოლა „რუსთავი 2“-ის დასაცავად? – ამ და სხვა საინტერესო საკითხებზე „ახალ თაობასთან“ ინტერვიუში პოლიტიკური პარტია „კანონი და სამართალის“ ლიდერი თაკო ჩარკვიანი საუბრობს.
_ ხელისუფლებას „რუსთავი 2“-ის საქმეზე აღსრულების გადაწყვეტილება 19 ოქტომბრამდე არ უდა მიეღო. ეს არის არაკომპეტენტურობის ბრალი თუ იცოდნენ და შეგნებულად წავიდნენ ამაზე?
_ ვნახე სტრასბურის წერილი, რომელიც გამოქვეყნდა. არა, ეს არ არის არაკომპეტენტურობის შედეგი, ეს არის ტიპიური გათავხედება მმართველი გუნდის მხრიდან. ეს იცის ამ ტიპის მმართველობამ, ფულის მმართველობამ იცის ეს ამბავი. ვიცი რაღაცები შიგნით, რა ხდება, რა ურთიერთობები აქვთ. თვლიან, რომ რაღაცები გაუვათ ან არ გაუვათ. ასეთი დამოკიდებულება აქვთ.
მომეწონა სტრასბურიდან მოსული წერილი. კარგია, იმიტომ, რომ ინსტიტუციურად სწორია. მე არც შემიტანია ეჭვი, ძნელია სტრასბური დაადანაშაულო, ეს არც პოლიტიკურად არის სწორი და ადამიანურადაც ყველაფერზე იმედი რომ დაკარგო, ეს არ არის სწორი. შეიძლება იყოს რაღაცა ცდომილებები, ყველგან ადამიანები არიან და შეიძლება იყოს რაღაცა. რთული დასაჯერებელია დემოკრატიული ქვეყნებისთვის, მით უმეტეს სტრასბურისთვის, რომ ჩვენთან სასამართლოს თვალსაზრისით ქვის ხანაა და პოლიტიკური ვითარება ასეთია. ამიტომ, შესაძლებელი იყო, რომ ასეთი გადაწყვეტილება გამოეტანათ რაც გამოიტანეს. ამიტომ მომწონს, ახლა რაც ხდება და როგორც მიდის.
ერთხელ გიორგი გაბუნია გამეხუმრა სტუდიაში, რომ ყველა გადაცემა იწყებთ ასე, რომ საქართველოს გადაბარება მიდისო. თქვენთან ინტერვიუშიც ხომ სულ ამას „ვაწვები“. მე ამას ისე არ გავაკეთებ, რომ მამაძაღლური გეგმები მქონდეს, მე ამას ვაკეთებ გულწრფელობით. როგორც კი დავინახე, რომ საქართველოს დამოუკიდებლობას შეიძლება საფრთხე დაემუქროს, თავქუდმოგლეჯილი გადავედი ოპოზიციაში.
_ დავით ზურაბიშვილმა დაწერა, რომ მიზანმიმართულად არ ხდება რუსეთისთვის გადაბარება და მიიჩნევს, რომ ბიძინას უნდა ქვეყანა აქციოს თავის შპს-დ. თქვენ თუ გქონიათ მასთან ბოლო პერიოდში ამ თემაზე საუბარი?
_ არა, არ ვფიქრობ ასე. ესეც ცუდი იქნება, მაგრამ ნეტავ ეს იყოს, მაგრამ, სამწუხაროდ, მე ასე არ ვფიქრობ. არა, ეს არის მიზანმიმართული გადაბარება ქვეყნისა. მისი განცხადება წავიკითხე, მაგრამ ზურაბიშვილთან საუბარი არ მქონია. მართალი კაცის სიმართლე არ იკარგებაო, ნათქვამია.
მე ეს განცდა, რომ ხომ არ იყო რუსული ინტერესები, ჯერ კიდევ 2012 წელს გამიჩნდა. ივნისის თვე იყო და ოპოზიცია უკვე ოპოზიციონერობს და მაშინ გავგზავნე ლაშა ტუღუშთან, რომელიც მან გაზეთ „რეზონანსში“ სრულად დამიბეჭდა. წერილს ერქვა „მე, ვასილ მაღლაფერიძე, „გრონიკო“ და სამების ამშენებელი“. ეჭვი მღრღნიდა მაშინ და მაგიტომ დავწერე. მაშინ „მეცხრე არხზე“ გადიოდა გადაცემა, ვასილ მაღლაფერიძეს მიჰყავდა ომის დაწყებაზე. ორჯერ ფეხზე ავდექით მე და ჩემი ოჯახის წევრები. ჯანსუღიც მიყურებდა დაეჭვებული და მითხრა, ეს ხომ ბიძინას არხია და რას ლაპარაკობს ეს კაცი (მაღლაფერიძე), რომელიც იძახდა, რომ ომი საქართველომ დაიწყოო.
ამის შემდეგ ივანიშვილს კარგი ურთიერთობა ჰქონდა ალასანიასთან, მე ვმეგობრობდი ნათია ფანჯიკიძესთან (ირაკლი ალასანიას მეუღლე), მისი პარტიის და არც სხვა პარტიის წევრი არასდროს ვყოფილვარ, მაგრამ ირაკლის სულ ვგულშემატკივრობდი დასავლეთის კუთხით.
იმ პერიოდში რადგანაც ივანიშვილს ალასანიასთან კარგი ურთიერთობა ჰქონდა, ცოტა დავმშვიდდი. ხომ იცით, რომ გინდა, რომ კარგი დაიჯერო. თან მასზე სულ ლეგენდები გვესმოდა, რომ როგორი ქველმოქმედი იყო, თორემ ჩვენ არ ვიცნობდით ახლოს. ყველას მისდიოდა ხელფასები უნივერსიტეტის პროფესორებიდან დაწყებული, ლეგენდები დადიოდა მასზე და ვფიქრობდით, კარგს გაუკეთებს ამ ქვეყანასო.
მშვიდად ვიყავი იქამდე, სანამ იმ ცნობილ პრესკონფერენციაზე ალასანიაზე სიბინძურეებს იტყოდა. მაშინ წავედი ინგა გრიგოლიასთან „რეაქციაში“ „იმედის“ ეთერში და პირდაპირ ვთქვი, რომ აღარ მომწონდა.
მამაჩემსაც რაღაცა არ მოსწონდა და გრიგოლიასთან ჯანსუღმაც ხუმრობით თქვა, რომ ადრე გვებრძოდნენ მუსულმანები ახლა გვებრძვიან რუსულმანებიო. ღამე დარეკა ერთმა ადამიანმა, რომელიც მამაჩემს ძალიან უყვარდა, მე კი მასზე ძალიან გულნატკენი ვარ. მან უთხრა, რატომ თქვი ეს, ივანიშვილი ძალიან ნაწყენიაო. ჯანსუღმა უთხრა, რომ რუსეთი რომ ოკუპანტია ამიტომ არის ნაწყენიო და მიაყოლა, რომ მადლობა მას ქველმოქმედებისთვის, მაგრამ ცოტა ხანში ინტელიგენციას ხალხი შეგვიზიზღებს, რადგან ხალხი შიმშილობსო.
ჯანსუღმა ისიც იკითხა, რომელი ფრაზა ეწყინა, რუსეთი რომ ოკუპანტია, თუ ხალხი რომ შიმშილობსო და ძალიან კარგი, რომ ეწყინა, ესე იგი ხშირად უნდა გავიმეორო, რომ რუსეთი ოკუპანტიაო.
ეს იყო ისეთი მესიჯი, რომ მთელი ოჯახი დავიზაფრეთ და ყალყზე ვიდექით.
_ ვინ იყო ის ადამიანი, ვინც ივანიშვილის ეს მესიჯი გადმოგცათ, არ იტყვით?
_ არ ვიტყვი. ცოცხალია და რაღაცნაირად არ იქნება სწორი. ამ თვალების დათხრაში, რაც მოხდა, ერთადერთი პოზიტივი ის იყო, რომ რუსეთმა კიდევ ერთხელ დაინახა, რომ ოკუპაციის თემაზე ქართველ ხალხს მყისიერი რეაქცია აქვს. ეს არის ამ ტრაგედიაში ერთადერთი პოზიტივი. საბრძოლველია და ჩვენ არ ვართ ჯაბანი ერი.
შორს ვარ იმ აზრისგან, რომ მას ქვეყნის გადაქცევა თავის შპს-დ უნდა, მას უნდა, რომ საქართველო გახდეს რუსეთის გუბერნია.
_ დვალმა და აქიმიძემ თქვეს, რომ მათ მიერ დაფუძნებულ „რუსთავი 2“-სა და მათ შორის 1 კაცი დგას და ის არა ქიბარ ხალვაში, არამედ ბიძინა ივანიშვილია. ეს ნიშნავს, რომ დაიწყებენ ბრძოლას?
_ ცხადია, დაიწყებენ. სწორია, რომ ქიბარ ხალვაში საერთოდ არაფერია და, რა თქმა უნდა, პროცესებს ბიძინა ივანიშვილი მართავს. რაის ქიბარ ხალვაში?!
ყველაზე საშიში წყობაა ქვეყანაში, ფეოდალურიც არაა ეს. ფეოდალურში რაღაც წესები ჰქონდათ. ეს არის პატრონ-ყმური, რუსული კორუფციული ტიპის წყობა. რაღაცა ჯგუფი ჰყავს, იმათ გადაუგდებს რაღაცას თუ „წესიერად“ მოიქცევიან… საშინელება ხდება. ეს კაცი უნდა წავიდეს. სააკაშვილის პერიოდში, როცა ოპოზიციაში ვიყავი, ივანიშვილს ლეგენდის სახელი ჰქონდა, ახლა გაიბითურა სახელი, ყველაფრის ლუსტრირება მოხდა. სხვათა შორის, მის ქველმოქმედებაზე თვითონ ნაციონალებიც ლაპარაკობდნენ.
ახლა რასაც აკეთებს, იმას ანგარება ჰქვია, სამშობლოს დათმობას რომ მოგთხოვს კაცი, ეს ანგარებაა! წაიღოს თავისი ქველმოქმედება, კაცმა ქვეყნის დათმობა მომთხოვა. მადლობა, რასაც აკეთებდა, ღმერთმა ხელი მოუმართოს იმ სახელსა და გვარს, რომელიც მაშინ ვიცოდით ლეგენდასავით, ბოლოს კი პრაქტიკულად მერკანტილური ტიპი შეგვრჩა.
მისი საქციელი ანგარება ყოფილა და არა _ ქველმოქმედება. კაცმა ქვეყნის ღალატი მოგვთხოვა, მე ასეთ ქვეყნაში სიცოცხლე არ მინდა.
_ გამოსავალს რაში ხედავთ იმისათვის, რომ „რუსთავი 2“-ის სარედაქციო პოლიტიკა არ შეიცვალოს?
_ ეს არის ბრძოლა. 21-ე საუკუნეა, სოციალური მედიის ეპოქაა, სხვა საინფორმაციო საშუალებებია… „რუსთავი 2“ არის პრინციპის ამბავი და ამიტომ ყველანი ვიცავთ კბილებით, მაგრამ „რუსთავი 2“ არ იყო ასეთი მძლავრი, შენობაც სხვა ჰქონდათ და რევოლუცია მოხდა…
არ არის რთული, რომ მიზანმიმართული ბრძოლით, თანმიმდევრული ტაქტიკით მსოფლიოში თავი არ შევირცხვინოთ. არც ბალტიისპირეთმა გვაჯობოს, არც სომხეთმა და არც სხვებმა, ცხადია, კარგი გაგებით შეჯიბრს ვგულისხმობ. ჩვენ უნდა ვიყოთ კარგი პარტნიორი სხვადასხვა დემოკრატიული ქვეყნების და ქვეყანა უნდა მივიყვანოთ ამ მდგომარეობამდე.
არ უნდა დავუშვათ, რომ 21-ე საუკუნეში ქვეყანა 5 კაპიკად გავყიდოთ. ამას სჭირდება თანმიმდევრული ბრძოლა. საქმეა, ვოლსკი რომ გამოდის და სისულელეებს ბჟუტურებს, სირცხვილი არ არის?!
_ სერიოზულად აღიქვით?
_ არა. უხერხული განცხადება იყო, თორემ კი არ მაშინებს. ღამ-ღამობით რიტუალებს ატარებენ „რუსთავი 2“-შიო. ხანდახან მგონია, რომ ნორმალურები არ არიან. ეს არის დაბალი პოლიტიკური განათლება. ამას კონკრეტულად ვოლსკიზე არ ვლაპარაკობ, მაგრამ ახასიათებთ ეს. გამოკვეთილად დაბალი ინტელექტის ქალები ჰყავთ, სულ არ მეუხერხულება, ეს რომ ღიად ვთქვათ.
_ ცქიტიშვილს ხომ არ გულისხმობთ, რომლის განცხადებამაც აღშფოთება გამოიწვია, როცა თქვა ბესელიაზე, რომ დამღალა თავისი პირადი ცხოვრების კადრებზე საუბრითო?
_ ზუსტად ეგ ვიგულისხმე. ზუსტად გამოიცანით, რასაც ვგულისხმობდი. საშინელი განცხადება გააკეთა. მოდით, როგორც ჟურნალისტებმა, გავშიფროთ. თქვენთან კოლეგად მოვიაზრებ საკუთარ თავსაც გარკვეულწილად, რადგან მრავალი წელი ვიმუშავე ჟურნალისტიკაში.
დავფიქრდეთ, რამდენი დარღვევა მოახდინა ამ ქალბატონმა ერთ წინადადებაში. შეურაცხყოფა მიაყენა ქალს, დაარღვია მისი უფლებები, ხვდებით, რა გააკეთა?! სახელმწიფოში გააჩინა უფლება, რომ ამგვარად კიდევ ვიღაცა მოიქცეს.
ეს გააკეთა ამ სულელმა ქალმა, მიიღოს, როგორც უნდა, სახელმწიფოს მინგრევენ და სულელიც აღარ ვუწოდო?! ეს არ არის სახელმწიფოებრივად მოაზროვნე ქალბატონის საუბარი. მაპატიეთ, მაგრამ ეს არის ან გონებასუსტის განცხადება, ან მავნებლური. რომელი გვაწყობს სახელმწიფოებრივად? სულელი გვყავდეს მთავრობაში თუ ბოროტი მავნებელი?! რომელი დავარქვა მაია ცქიტიშვილს ამ განცხადების შემდეგ?!
უნდა ვიბრძოლოთ. ახლა არ არის ჯიბრის დრო, ახლა გაერთიანების დროა. დემოკრატიული არჩევნები ჩავატაროთ, რომ არ მოიპაროს ოლიგარქმა ისევ არჩევნები და მას არ მიაყოლოს სახელმწიფოს მოპარვა. იპარავს ქვეყანას იმიტომ, რომ რუსეთის გუბერნიად გადააქციოს. რაში მაინტერესებს ვიღაცა ქალების „ფეისბუქზე“ დაწერილი პოსტები. არ მაინტერესებს ქეთი დოლიძის მოსულელო რაღაცები. გასაგებია, რომ ის მიდის იმაზე, რომ ჩვენი სამშობლო იქცეს რუსეთის გუბერნიად. არ ვიზამთ ამას! ვიღაცა ქეთი დოლიძეს და ნინელი ჭანკვეტაძეს რა მოუვა, ეს არ მაინტერესებს.
ბედნიერი ვარ იმაში, რომ ჩემი აზრი ემთხვევა ჩემი წინაპრის აზრს, ჩემი ნატვრა ემთხვევა სულხან-საბას, ილია ჭავჭავაძის ნატვრას, დედაჩემის ნატვრასაც ემთხვევა, რომელიც ამ ინტერვიუს დროს აგერ მიზის და თქვა, რომ ჩემს ნატვრასაც ემთხვევაო.
ქეთი დოლიძის და ნინელი ჭანკვეტაძის ნატვრას თუ არ დაემთხვევა, ამაში პრობლემას ვერ ვხედავ, მე მათთან ყოველთვის კარგი ურთიერთობა მქონდა, მაგრამ ღირებულებები აღმოჩნდა სრულიად სხვა.
რა აღარ მესმის, ერთ-ერთი მომღერალი გამოვიდა და თქვა, თვალების დათხრა შეიძლება ქვების სროლა იყოო, ხომ არ ვაჭარბებ, ხომ მოისმინეთ?! მწყინს და გული მტკივა. მომღერალი რომ ხარ, სიჩუმე მაინც ხომ შეგიძლია?
_ უცნობზე ამბობთ?
_ რა თქმა უნდა. გია გაჩეჩილაძის ამ განცხადებისგან გული მეტკინა. ნამდვილად არ ველოდი. არ ვიცი, ადამიანურად არ ველოდი, რომ ამას იტყოდა, მაშინ როცა არსებობს კადრები, როგორ ხდებოდა მიზანმიმართულად თვალების დათხრა.
_ ობიექტურები რომ ვიყოთ, ისიც თქვა, რომ გახარია უნდა გადადგესო.
_ რა თქმა უნდა, მაგრამ იმისთანა თქვა, რომ პრაქტიკულად „გააპრავა“ გახარია. რომ უნდა გადადგეს, მაგას ვინ შეეკითხება, გადადგება, აბა რას იზამს! გახარიას თუ ჰგონია, რომ არ გადადგება, სასაცილოა. გადადგება, აბა რას იზამს?!
იაგო ნაცვლიშვილი, ახალი თაობა