იაგო ნაცვლიშვილი, ახალი თაობა
მმართველ გუნდსა და ოპოზიციას შორის კონსენსუსი შედგა. დიპლომატების შუამავლობით გამართულ ბოლო შეხვედრაზე მხარეებმა შეთანხმებას მიაღწიეს, რომლის მიხედვითაც საპარლამენტო არჩევნები სავარაუდოდ ჩატარდება სისტემით 120/30-ზე, თუ ისევ გაუთვალისწინებელი რაღაც არ მოხდა და მორიგი „ამბოხი“ არ ვნახეთ უმრავლესობის შიგნით. ასევე დაკმაყოფილდა ოპოზიციის კიდევ ერთი მოთხოვნა პოლიტპატიმრების საკითხზე. ახლა ჯერი საკონსტიტუციო ცვლილებებსა და ამ პირობის შესრულებაზეა.
ამის მიუხედავად, პარლამენტის წევრი, ფრაქცია „დამოუკიდებელი დეპუტატების“ წარმომადგენლის ლევან კობერიძე ქუჩის აქციებს არ გამორიცხავს. მისი თქმით, „ოცნება“ სხვა ხრიკების ჩადებას აპირებს და გეგმავს, რომ თბილისში 12 სამაჟორიტარო ოლქი 5-მდე შეამციროს, რადგან იცის, რომ თბილისში არჩევნებს აგებს. მისთვის რიცხვებზე შეთანხმებაზე მნიშვნელოვანი თვისობრივი შეთანხმებაა.
აღნიშნულ საკითხთან დაკავშირებით „ახალ თაობასთან“ ინტერვიუში ლევან კობერიძე საუბრობს, რომელთან ინტერვიუ მაშინ ჩავწერეთ, როდესაც ჯერ კიდევ არ იყო საბოლოოდ მიღწეული შეთანხმება ხელისუფლებასა და ოპოზიციას შორის.
_ თქვით, რომ თუ თბილისში 5 ოლქს დატოვებენ, აქციების დაწყებასაც არ გამორიცხავთ. რაიმე ინფორმაცია გაქვთ ამასთან დაკავშირებით თუ ვარაუდის დონეზე აკეთებთ ამ განცხადებას?
_ ჩემთვის ძალიან მნიშვნელოვანია, რომ საარჩევნო კანონმდებლობასთან დაკავშირებით მსჯელობა იმართებოდეს არა მხოლოდ რიცხვებზე, არამედ თვისობრივ მხარეზეც. რა თქმა უნდა, მივესალმები პროპორციულ არჩევნებთან მაქსიმალურ დაახლოებას, მაგრამ არსებულ მდგომარეობაში მნიშვნელოვანია, რომ მსჯელობა თვისობრივ მხარეზეც იყოს.
კი ბატონო, შემოსული საკანონმდებლო ცვლილებები პროპორციულ სისტემაზე გადასვლასთან უფრო სწორად დაახლოებასთან დაკავშირებით მნიშვნელოვანია, მაგრამ დღეს არსებული მდგომარეობით მსჯელობა უნდა გაიმართოს თვისობრიობაზეც. მხოლოდ ციფრები არ განსაზღვრავს არჩევნების ლეგიტიმაციას, ან სამართლიანობას.
_ ანუ ხელისუფლება მანიპულირებს რიცხვებით, რომ დათმობაზე მიდის, მაგრამ თვისობრივად აუარესებს მდგომარეობას?
_ ზუსტად მაგას ვამბობ, უფრო სწორად, პრევენციის მიზნით დავაფიქსირე ეს მოსაზრება. მათ რიტორიკაში გაიჟღერა მსგავსი ტიპის თემამ. თუკი რიცხვებზე დათმობა მოხდება მათი მხრიდან, მაგრამ გამოყენებული იქნება თვისობრიობაზე შეფარული ხრიკი, ეს იქნება მიუღებელი.
აგიხსნით, რასაც ვგულისხმობ. ნებისმიერი სახის კონფიგურაციაში ”ქართულმა ოცნებამ” შესაძლოა გადადგას ისეთი ნაბიჯი, თითქოს მხარს უჭერს ცოტა უფრო მეტ პროპორციულობას და ამ მიმართულებით გადადგას ნაბიჯები, თუმცა მან კარგად იცის, რომ თბილისსა და კიდევ რამდენიმე ქალაქში აქვს ელექტორალური თვალსაზრისით პრობლემები. ანუ მისი კანდიდატები დიდი ალბათობით წააგებენ, ვინაიდან თბილისში და სხვა დიდ ქალაქებში საზოგადოების განწყობა არის უარყოფითი ”ქართული ოცნების” მიმართ.
ამიტომ, ისინი შეეცდებიან, ან შეიძლება შეეცადნონ, რომ მიიღონ სისტემა 110/40-ზე იქნება ეს, 120/30-ზე, 125/25-ზე თუ სხვა. ამ შემთხვევაში ოლქების სხვანაირად გადანაწილება გახდება საჭირო, ანუ ოლქებს მოუწევს გამსხვილება თუ გადაკეთება. აი, აქ შეიძლება იყოს ძაღლის თავი დამარხული. როგორც ამბობენ ხოლმე, ეშმაკი დეტალებშია. ანუ, შესაძლოა ”ქართულმა ოცნებამ არათანაბრად” გადაანაწილოს ოლქები, იეშმაკოს და თბილისში პირობითად მხოლოდ 5 მაჟორიტარული ოლქი დატოვოს არსებული 12 ოლქიდან და დანარჩენები გადაიტანოს იმ რეგიონებში, სადაც მას აწყობს.
_ მაგრამ ჩაითვლება ეს კონსტიტუციურად? იქიდან გამომდინარე, რომ თავის დროზე საკონსტიტუციო სასამართლოს მიღებული აქვს გადაწყვეტილება, რომ ყველა ოლქში ამომრჩეველთა რაოდენობა დაბალანსებული უნდა იყოს.
_ აბსოლუტურად გეთანხმებით და ეს არა მარტო საკონსტიტუციო სასამართლოს გადაწყვეტილებაა, თავის დროზე საკონსტიტუციომ იმიტომ მიიღო ეს გადაწყვეტილება, რომ ასეა სამართლიანი. ყველა მაჟორიტარს უნდა ჰქონდეს თანაბარი ამომრჩევლისგან მინიჭებული ძალა და მანდატი. არ აქვს მნიშვნელობა თბილისის მაჟორიტარი იქნება თუ ზესტაფონის, ან ნებისმიერი სხვა ტერიტორიული ერთეულის მაჟორიტარი.
მე არ გამოვრიცხავ, რომ ”ქართულმა ოცნებამ” ასეთი არათანაბარი ცვლილებები გაატაროს. რა თქმა უნდა, ეს არ იქნება კონსტიტუციური, მაგრამ კონსტიტუციაში იქნება ბევრი ცვლილება და მაქვს გარკვეული ინფორმაცია, რომ ისინი ახლა ეცდებიან, რომ საკონსტიტუციო ცვლილებების შეთანხმება ახლა მოხდეს რიცხვებზე და მერე ეცდებიან ერთჯერადად ეს განსაზღვროს ცესკომ. ცესკო როგორ გადაწყვეტილებებსაც იღებს ხოლმე ეს ხომ ვიცით?! დარწმუნებული ვარ, ახლაც გააგრძელებს ასეთი გადაწყვეტილებების მიღებას.
_ აღნიშნეთ, რომ გარკვეული ინფორმაცია გაქვთ, რომ ”ქართული ოცნება” ამის გაპარებას აპირებს. ეს ინფორმაცია მმართველი გუნდიდან გაქვთ?
_ გარკვეული სახის განცხადებები მათმა წარმომადგენლებმა საჯაროდაც გააჟღერეს. მკაფიოდ არ უთქვამთ, მაგრამ იყო საუბარი ოლქების ახლებურად გადანაწილებაზე. ოღონდ მერე აღარ შევიდნენ სიღრმეებში, იმიტომ, რომ სიღრმეებში შესვლის დროს ეს საკითხი მკაფიოდ უნდა დააფიქსირონ.
კი, ერთი მხრივ ამაზე არსებობს საჯარო ინფორმაცია, მეორე მხრივ კი გარკვეული ინფორმაცია არსებობს უკვე არასაჯარო წყაროებიდან, რომ შესაძლოა ასეთი ტიპის მანიპულირება მოხდეს.
_ მათ შორის ”ქართული ოცნებიდანაც” გაქვთ ეს ინფორმაცია?
_ დიახ. ჩვენ ამოცანად მიგვაჩნია, რომ როგორც ჯანსაღმა ახალმა ოპოზიციურმა ძალამ, არ დავტოვოთ ამ საკითხის მოგვარება მარტო ”ქართული ოცნების” ხელში, რათა მან არ გაატაროს ასეთი ხრიკები. ამიტომ მოვითხოვთ, რომ წინასწარვე იყოს მსჯელობა ამაზე.
_ თუ გააკეთეს ის, რაც დაგეგმილი აქვთ, მაშინ რას აპირებთ?
_ ”ქართული ოცნება” საუბრობს მხოლოდ რიცხვებზე და მხოლოდ ნაციონალურ მოძრაობას ელაპარაკება, მხოლოდ მათ მიერ დაყენებულ რაღაც მოთხოვნებზე რეაგირებს. მაგრამ საკონსტიტუციო ცვლილებების მიღების დროს არ იქნება ჩვენი ხმები გარანტირებული თუკი ჩვენი მოთხოვნები არ იქნება განხილული და მიღებული.
სავალდებულო არჩევნების თაობაზე საერთოდ ცდილობენ, რომ პასუხი არ გაგვცენ. ეს მისთვის და ნაციონალური მოძრაობისთვის ყველაზე მტკივნეული თემაა. მინდა საზოგადოებამ იცოდეს, რომ რიცხვები კი არ არის განსაკუთრებულად მნიშვნელოვანი, არამედ თვისობრიობა.
რაც შეეხება იმას, თუკი მსგავსი რამე არ იქნება მიღებული და არ მოხდება ამ თემის განხილვა, ამაზე დავაფიქსირე ჩემი აზრი, რომ ჩვენ ყველანაირი ფორმით დავიცავთ ამ ჩვენს მოთხოვნას და შინაარსობრივად ძალიან მნიშვნელოვან მხარეს. თუკი საჭირო იქნება, ჩვენ პროტესტის ნებისმიერ ფორმას მივმართავთ, მათ შორის აქციებსაც.
_ თქვენი ფრაქცია მარტო ხართ ამ ბრძოლაში თუ გაქვთ უკვე საუბრები გარკვეულ პოლიტიკურ ძალებთან?
_ ჩვენ უკვე წამოვწიეთ ეს თემა. იქნება კონსულტაციები სხვა ფრაქციებთან და პოლიტიკურ ჯგუფებთანაც. მე რამდენადაც ვიცი, ძალიან ბევრი პარტიისა თუ პოლიტიკური ჯგუფისთვის ეს თემა არის ძალიან მნიშვნელოვანი და მე ვიტყოდი, რომ ბევრისთვის ეს თემა არის ერთ-ერთი ყველაზე საკვანძო თემა.