ბრიტანულმა გამოცემა “დეილი მეილმა” გაავრცელა ინფორმაცია იმის შესახებ, რომ რუსეთის ფედერაციის პრეზიდენტი, ვლადიმერ პუტინი იანვარში თანამდებობას დატოვებს, მიზეზი კი ჯანმრთელობის პრობლემებია.
როგორც გამოცემა წერს, სპეკულაციები მას შემდეგ დაიწყო, რაც კრემლის პოლიტიკის ერთ-ერთმა მთავარმა კრიტიკოსმა, პროფესორმა ვალერი სოლოვეიმ განაცხადა, რომ პუტინს პარკინსონის დაავადება აქვს და რომ პრეზიდენტის ოჯახს სურს, ახალი წლისთვის მან თანამდებობა დატოვოს.
სოლოვეის თქმით, პუტინის პარტნიორი ალინა კაბაევა და მისი შვილები მარია ვორონცოვა და კატერინა ტიხონოვა რუსეთის პრეზიდენტს თანამდებობის დატოვებისკენ მოუწოდებენ.
“ის აპირებს, რომ გადადგომის გეგმებზე საჯაროდ იანვარში ისაუბროს. პუტინი დანიშნავს ახალ პრემიერ-მინისტრს, რომელიც მისი მემკვიდრე გახდება“, – აცხადებს ვალერი სოლოვეი.
აღსანიშნავია, რომ კრემლმა უარყო გავრცელებული ინფორმაცია. ყოველივეს კრემლის სპიკერმა დმიტრი პესკოვმა უპასუხა, მისი თქმით, ვლადიმერ პუტინის ჯანმრთელობის მდგომარეობა შესანიშნავია და ინფორმაციას მისი ავადმყოფობის შესახებ “სრული სისულელე“ უწოდა.
“პრეზიდენტს ყველაფერი კარგად აქვს“ – განაცხადა პესკოვმა.
ამბები