“სტრატეგია აღმაშენებლის” ლიდერი გიორგი ვაშაძე “ახალ თაობასთან” ინტერვიუში ამბობს, რომ მესამე ძალას უნდა ჰყავდეს საკუთარი კანდიდატი თბილისის მერობაზე.
– ვინ მოიაზრება ამ მესამე ძალაში? შეიძლება გახარია თქვენ გვერდით ვიხილოთ?
– არა, ჩვენ გახარიასთან არანაირი ურთიერთობა არა გვაქვს და კონკრეტულად თუ ვინ მოიაზრება, ამას უკვე თვის ბოლოს ნახავთ.
დაახლოებით ერთ კვირაში გავაცნობთ საზოგადოებას ჩვენს გეგმებს.
– კალაძეს გაუწევთ კონკურენციას?
– კალაძისთვის მხარდაჭერა ნიშნავს იმას, რომ არაფერი არ შეიცვლება. რა პრობლემებიც არის თბილისში, ისევ ის პრობლემები დარჩება.
ჩვენი მთავარი ამოცანა ამ არჩევნებში არის, არ ავაღებინოთ 43% “ქართულ ოცნებას”. ამისათვის მთავარი არის, მეტი პროპორციული ხმა იყოს ოპოზიციის მხარეს და არა კონკრეტული კანდიდატების მხარდაჭერა. ჩვენ ხომ სამიზნე გვაქვს, რომ რიგგარეშე საპარლამენტო არჩევნები დაინიშნოს ქვეყანაში.
– საპარლამენტო ოპოზიციაში ერთსულოვნება არ არის მელიასთან დაკავშირებით?
– არა. მე თავიდანვე ამას ვამბობდი, რომ ნაციონალური მოძრაობის კანდიდატის მხარდაჭერა არასწორია.
– რატომ?
– ასეთ შემთხვევაში, “ქართული ოცნება” 43%-ს მარტივად მოაგროვებს. თუ ორპოლუსიანი რადიკალიზაცია იქნა, ეს აწყობს “ქართულ ოცნებას”.
– ორპოლუსიანი რატომ, გახარიაც ხომ შემოვიდა ამ პოლიტიკურ თამაშში?
– კი ბატონო, შემოვიდა, მაგრამ ჯერჯერობით არ ვიცით, რა თამაშს თამაშობს გახარია.
– ოპოზიციამ მელია მერად დაასახელა, ელენე ხოშტარია საკრებულოს თავმჯდომარედ და ზურაბ ჯაფარიძე ვიცე-მერად.
– ჩვენ ნაცმოძრაობასთან ერთად ამ პროცესში მონაწილეობას არ ვაპირებთ.
ნონა ცაბაძე, ახალი თაობა