41 წლის მსახიობი ნინო გაჩეჩილაძე, რომელიც ჩცდ-ში კატოს როლს ასრულებს, ამბობს, რომ ცხოვრებაში ერთადერთი შეყვარებული ჰყავდა.
– თაყვანისმცემლები კი ყოველთვის მყავდნენ, მაგრამ მათთან ურთიერთობა არ მაქვს, კატოსგან განსხვავებით. ის შეყვარებული უკვე წარსულს ჩაჰბარდა, ორი წლის წინ დავშორდი. ჩემს მშობლებს არ მოსწონდათ ის ბიჭი, რა თქმა უნდა, ეს ყველაფერი მოქმედებდა ჩემზე, როდესაც ამ საკითხში მშობლის კურთხევა არ გაქვს, ძალიან ძნელია, მაგრამ სანამ მე თვითონ არ დავინახე, რომ ჩემები მართლები იყვნენ, მანამდე არ გადავდგი დაშორების ნაბიჯი.
დღეს მიმაჩნია, რომ კარგად მოვიქეცი, რადგან ამ ფაქტის შემდეგ ჩემთვის დაიწყო ბევრად საინტერესო ცხოვრება შემოქმედებითი თვალსაზრისით, – ამბობს მსახიობი.
მსახიობი ერთ-ერთ ინტერვიუში საუბრობს იმის შესახებ, თუ როგორი უნდა იყოს მისთვის იდეალური მამაკაცი:
– ალბათ, ისიც ცოტათი რომანტიკოსი უნდა იყოს, როგორც მე. მე ძალიან რომანტიკული ვარ და ვფიქრობ, ეს არ არის ცუდი. ბევრად უფრო საინტერესოდ ვგრძნობ თავს, როცა რომანტიკაში ვარ ჩაფლული. ამ დროს ბევრად უფრო მაინტერესებს ცხოვრება და აჟიტირებული ვარ.
როცა ძალიან რეალისტი ვხდები და მატერიალურ რაღაცებზე ვფიქრობ, ჩემთვის ეს უკვე აბსოლუტურად უინტერესოა. ამიტომ, ჩემ გვერდით მამაკაციც ასეთი უნდა იყოს – უფრო სულიერი, მხიარული, უნდა ჰქონდეს კარგი იუმორის გრძნობა. ასევე, უნდა იყოს მზრუნველი და ყურადღებიანი.
განსაკუთრებულს არაფერს ვითხოვ, არც მილიონერი მჭირდება, რადგან მინდა, ღამე მშვიდად მეძინოს.
დაიჯესტი