“რუსთავი 2-მა” ვერაზე ტრანსგენდერი ქალის მკვლელობაში ბრალდებულის ვინაობა დაადგინა. ის 23 წლის კალათბურთელი ვაჩე ცაკაშვილია.
მკვლელობა 31 ოქტომბერს, ღამით მოხდა. გამოძიების ინფორმაციით ბრალდებულმა ცივი იარაღით სხეულზე მრავლობითი ჭრილობა მიაყენა, თბილისში, ახვლედიანის ქუჩაზე მდებარე ერთ-ერთ მასაჟის სალონში დასაქმებული უცხო ქვეყნის მოქალაქე – ტრანსგენდერ ქალს, რომელიც ადგილზევე გარდაიცვალა. ბრალდებულმა იმავე სალონში მყოფ კიდევ ერთ ტრანსგენდერ ქალს სხეულზე დაზიანება მიაყენა და შემთხვევის ადგილიდან მიიმალა.
ბრალდებულის ადვოკატი აცხადებს, რომ მისი დაცვის ქვეშ მყოფი ბრალს არ აღიარებს და დუმილის უფლებას იყენებს.
მას ბრალს რამდენიმე წუთში წარუდგენენ. სავარაუდოდ დღესვე იმსჯელებს სასამართლო აღკვეთის ღონისძიებაზეც.
“ჩემი დაცვის ქვეშ მყოფს შევხვდი გუშინ, გავუწიე კონსულტაცია. ჯერჯერობით, ბრალი არ წარუდგენიათ, გამოძიება დაწყებულია 108-ე მუხლით, განზრახ მკვლელობის ფაქტზე, თუმცა ჩემი დაცვის ქვეშ მყოფი არ აღიარებს დანაშაულს და ამ ეტაპზე იყენებს დუმილის უფლებას. მოტივზე ვერ ვისაუბრებ, რადგან დანაშაულს, რა მუხლითაც დაწყებულია გამოძიება, ჩემი დაცვის ქვეშ მყოფი არ აღიარებს,”- აცხადებს ბრალდებულის ადვოკატი გოგა ბოგვერაძე და არ გამორიცხავს, რომ ბრალდების მუხლი შეიცვალოს.
რუსთავი 2