“ქართული ოცნების” ყოფილი წევრი, პარლამენტის დამოუკიდებელი დეპუტატი დავით ჭიჭინაძე “ახალ თაობასთან” ინტერვიუში ქვეყანაში შექმნილ პოლიტიკურ ვითარებაზე საუბრობს.
– ბატონო დავით, თქვენ ესწრებოდით იმ შეხვედრას, სადაც იუსტიციის უმაღლესი საბჭოს არამოსამართლე წევრებმა ნაზი ჯანეზაშვილმა და ანა დოლიძემ თქვეს, რომ 50 კაციანი სია იმ ცნობილი 10 კაციანი სიისგან არაფრით განსხვავდება. ასეა?
– დიახ, მე ვესწრებოდი ამ შეხვედრას. მთავარი რაც მინდა გითხრათ, ის არის, რომ საპარლამენტო უმრავლესობას, “ქართულ ოცნებას” უკვე გააჩნია ჩამოყალიბებული პოზიცია ამ საკითხზე.
ჩვენ პარლამენტში ცოტა ხნის წინ ვნახეთ უღირსი გადაწყვეტილება კოლეგის, ნიკა მელიას მიმართ, რომელიც მათ ყოველგვარი არგუმენტის გარეშე გამოიტანეს. არ არის გასაკვირი, რომ ამ ადამიანებმა სრულიად უღირს მოსამართლეებს დაუჭირონ მხარი. მათთვის საინტერესოც არ არის, ვინ იქნებიან კანდიდატები, რადგან მათ ნაცვლად გადაწყვეტილებებს სხვები იღებენ.
სასამართლო რეფორმა იმთავითვე არასწორად იყო ჩატარებული. ტალღებად მოინათლა, რეალურად კი რა შეგვრჩა?! ამ ქვეყნის მოქალაქეებს სამართლიანობის განცდა არ აქვთ. სად არის ან შეჯიბრებითობა ან მოსამართლეების უმწიკვლო რეპუტაცია?! თავის დროზე როგორ მჯეროდა, რომ სწორედ სამართლიანობა აღდგებოდა.
– თქვენ ხომ იყავით უმრავლესობაში?
– მე არ ვარ იურისტი, ეკონომისტი ვარ და არასდროს ვერეოდი სასამართლოს საკითხებში. მე ვენდობოდი იმ ადამიანებს, ვინც ამ საქმეს კურირებდნენ და მათი იმედი გვქონდა, რომ არჩევნებზე გაცემული დაპირება შესრულდებოდა, მაგრამ ყველამ თავისი ინტერესი ჩადო და დღეს, სამწუხაროდ, ამ ინტერესების გადაკვეთას ვუყურებთ.
სასამართლო სისტემა არ არის ადამიანზე მორგებული, ამ ქვეყნის რიგით მოქალაქეებზე მიმართული, რომელთაც ფინანსური შესაძლებლობა არ გააჩნიათ, რომ თავიანთი სიმართლე დაიცვან სასამართლოში.
ეს სასამართლო სისტემა ძირფესვიანად არის შესაცვლელი. ამ სასამართლომ და ამ კანონებმა ქვეყანაში ის სამართალი ვერ მოიტანა, რასაც ქართველი ხალხი ელოდა.
– თქვენ რა ინფორმაცია მიიღეთ, ეს სია კლანის მიერაა არის დაკოპლექტებული თუ მისი წევრებიც შედიან?
– ძირითადად ორ კრიტერიუმზე იყო საუბარი. 17 ივლისიდან დაიწყება განხილვები და მერე უკვე ბევრად უფრო მეტი ინფორმაცია ექნება საზოგადოებას.
ის ინიციატივა, რომელიც საქართველოს პარლამენტში შემოვიდა და რომელიც დეპუტატს ეხებოდა, სწორედ მთავარი პროკურორის, შალვა თადუმაძის, ინიციატივა იყო ყოველგვარი არგუმენტების გარეშე, ყოველგვარი მომზადების გარეშე.
დღეს ამ ადამიანს უნდა უზენაესი სასამართლოს უვადო მოსამართლეობა. მე ვიცი, რომ არა მხოლოდ მოსამართლეობა უნდა, თავმჯდომარეც ის იქნება. აქ როგორ შეიძლება იყოს საუბარი სუფთა სინდისზე, მორალზე, რეპუტაციაზე და მაღალ პროფესიონალიზმზე?! მითხარით, ეს მაგალითი სამართლიანობის განცდას შეუწყობს ხელს?! ასეთ ადამიანებში, ვინც დაკვეთის შემსრულებლები არიან, ყოველთვის შემეპარება ეჭვი.
კონკურსი უნდა ყოფილიყო ძალიან მრავალრიცხოვანი და ფართომასშტაბიანი, მაგრამ ძალიან ცოტა ადამიანმა მიიღო მონაწილეობა. არჩევანი ძალიან ცოტაა. მეტი ინტერესი უნდა ყოფილიყო.
– თქვენ რა ეჭვი გაქვთ?
– რომ ძალიან დაბალია ნდობის ფაქტორი.
– მიმდინარე პოლიტიკურ პროცესებზეც მინდა გკითხოთ. როგორ ფიქრობთ “ოცნებამ” ეს პოლიტიკური კრიზისი გადააგორა?
– თუ გახარიაზე მეკითხებით, გადადგება თუ არ გადადგება, ამას უკვე მნიშვნელობა აღარ აქვს, რადგან ეს უკვე გავლილი თემაა. ის, როგორც ფიგურა, აღარ არსებობს.
ეს უკვე აღარ არის პოლიტიკური პროცესი, რეალურად ეს არის დაპირისპირების თემა. გახარიას საკითხი ადრე თუ გვიან სამართლებლივ ჭრილში გადაინაცვლებს. როდესაც უკვე სამართლებლივში გადადის საკითხი, იქ უკვე პოლიტიკა მთავრდება. მე ვფიქრობ, რომ ეს უფრო მომავლის საქმეა.
რაც შეეხება პოლიტიკურ პროცესს, რა თქმა უნდა, ახლა მთავარი არის საარჩევნო საკითხი, ნულოვანი ბარიერი, რომელსაც პოლიტიკური სპექტრის ნაწილი ემხრობა, მეორე ნაწილი არ ემხრობა. ყველა სათავისოდ ექაჩება და არა, რა უკეთესი იქნება ჩვენი ქვეყნის მომავლისთვის, მისი დემოკრატიულად განვითარებისთვის. როდესაც პოლიტიკა ხალხის მოთხოვნებს სცილდება ის უკვე საინტერესო აღარ არის ადამიანებისთვის და ისინი სხვა გზებს ეძებენ, ეს იქნება პროტესტის ფორმა თუ კიდევ უფრო რადიკალური გზა.
თუ საზოგადოებას არჩევნების მიმართ ნდობა არ ექნება, მერე ეს საზოგადოება აბსოლუტურად სხვაგვარად მოქმედებს. სამწუხაროდ, დღეს საზოგადოება არის იმ რეალობის წინაშე, როდესაც ის გადაწყვეტილების მიღების პროცესს არის ჩამოშორებული და თავად არის გადაწყვეტილების მიღების მოლოდინში.
ნათია ხურცილავა, ახალი თაობა
akhalitaoba.ge © 2017-2024