ანაკლიის განვითარების ღრმაწყლოვანი პორტის კონსორციუმი ამერიკულმა კომპანია “კონტი ჯგუფმა” დატოვა, რომელიც კონსორციუმში 42%-ს ფლობდა. კონსორციუმში ამ ეტაპზე რჩება ამერიკული კორპორაცია კონტი ჯგუფის გამოყოფა ოპოზიციის ნაწილმა შეაფასა, როგორც ანაკლიის პროექტის დამთავრება.
რას ნიშნავს ეს გადაწყვეტილება, ჩანს თუ არა ხელისუფლების “ხელი” და რა პასუხი აქვს მედიაში გავრცელებულ ინფორმაციაზე, რომ პოლიტიკაში მიდის და მამუკა ხაზარაძის გუნდში იქნება? – ამ და სხვა საინტერესო საკითხებზე “ახალ თაობასთან” ინტერვიუში იურისტი ლევან ალაფიშვილი საუბრობს.
– გავიგეთ, რომ ანაკლიის პროექტის კონსორციუმიდან გადის ამერიკული კომპანია. რას ნიშნავს ეს, როდესაც 42%-იანი წილის მქონე კომპანია კონსორციუმს ტოვებს?
– დასკვნებისგან ჯერჯერობით შორს ვართ, იმიტომ, რომ რეალურად შინაარსობრივად არაფერი იცვლება, კონსორციუმი რჩება. შესაბამისად, ახალი მმართველობა, რომელიც ძირითადად ამერიკულია და რომელმაც ჩაანაცვლა ხაზარაძე-ჯაფარიძე კონსორციუმის გუნდში, მათგან არანაირი განცხადება არ გვინახავს და, გარდა მაგისა, ეს კომპანია კი გავიდა კონსორციუმიდან, მაგრამ არ ვიცით, ვინ მოვა. ასევე არ ვიცით, ვინც მოვა, მას ექნება თუ არა ვალდებულებები.
მეორე, როგორი იყო მისი მონაწილეობა ინვესტიციების წილში. 42% კი იყო, მაგრამ იმ 70 მილიონიდან რამდენი იყო მისი წილი, ანუ მის მიერ მოზიდული ინვესტიცია რამდენი იყო. ამიტომ, უმჯობესია, პროცესს დაველოდოთ, მით უმეტეს, თუ სწორად მახსოვს, ერთ-ერთ მედიასაშუალებაში თავად მამუკა ხაზარაძის კომენტარიც გავრცელდა, სადაც მან თქვა, რომ ამით არაფერი იცვლება.
– თქვენ არ აზიარებთ იმ პოლიტიკოსების პათოსს, რომ ანაკლიის პროექტი დამთავრდა?
– არა. ეს მხოლოდ ამაზე არ არის დამოკიდებული და, შესაბამისად, არ ვიზიარებ, თუმცა ეს არ გამორიცხავს პრობლემებს მთავრობის მეცადინეობით. ეს არის ბუნებრივი, იყო, არის და კვლავაც იქნება.
– ამაში მთავრობის ხელი არ დაგინახავთ?
– ახლა არ დამინახავს. მას საჯაროდ აქვს გაცხადებული მისი ე.წ. საქმის ერთგულება ანაკლიისადმი და ესეც ცნობილია. შესაბამისად, რამდენად შეიძლება იყოს ეს პოზიტიური ან ნეგატიური, არ ვიცით. მაგრამ მთავრობას ჯერჯერობით იმაზე მეტი არ გაუფუჭებია, რაც უკვე გააფუჭა, იქნება ეს პროკურატურა, ეროვნული ბანკის ჩართულობა თუ სხვა.
– ამ შემთხვევაში ხაზარაძის თემას გულისხმობთ?
– რა თქმა უნდა. ესეც საკმარისი იქნებოდა, მაგრამ, ამას რომ თავი დავანებოთ, შევხედოთ მთავრობის შესასრულებელ ვალდებულებას ინფრასტრუქტურული პროექტების განხორციელებაზე. პროექტირება ამ დღეებში უნდა იყოს დამთავრებული. მხედველობაში მაქვს გზის მიყვანა.
– რა უნდა გააკეთოს ხელისუფლებამ იმისთვის, რომ ანაკლიის პროექტის ირგვლივ არსებული ეჭვები გაფანტოს?
– რა უნდა გააკეთოს ყველაზე მნიშვნელოვან საკითხებთან მიმართებით, ამაზე საზოგადოებისთვის ცნობილმა ადამიანებმა და პლატფორმაში შემავალმა არასამთავრობო ორგანიზაციებმა განცხადება საჯაროდ გავაკეთეთ. ამ მიმართვას ორი ადრესატი ჰყავდა.
პირველი იყო მთავრობა, რომელსაც ვუთხარით, ანაკლიის პროექტზე გახსენით დებატები და ჩვენც გაგვხადეთ ამ ყველაფრის თანამონაწილეო. მთავრობა ამბობს, კონსტიტუციაში ხომ ჩავწერეთო. კი ბატონო, ჩაწერეს, მაგრამ მერე რა გააკეთა იმის იქით? ესეც ხომ ინვესტიცია არ არის, რომ რაღაცას შეეშალა ხელი. კანონპროექტი რომ დაწერილიყო და საჯარო გაეხადათ, ესეც პრობლემაა ხელისუფლებისთვის? როდესაც ამას არ აკეთებ, ეს არის ერთ-ერთი ინდიკატორი.
ერთი მიმართვა იყო მთავრობის მისამართით მის სტატუსთან დაკავშირებით, ექნება მას ქალაქის სტატუსი, ეკონომიკური ზონის სტატუსი თუ სხვა. დაწყებულიყო დისკუსია, რომელსაც მოჰყვებოდა კანონპროექტის შემუშავება და მეორე იყო თვითონ კონსორციუმი, რომელსაც მოვუწოდეთ, რომ უზრუნველეყო ჩართულობის ახალი მექანიზმების შემუშავება. ჩვენ მოთხოვნა კი არ გვქონდა ამაზე, არამედ სავარაუდო მექანიზმები შევთავაზეთ. ეს შეიძლება იყოს მისი გამოშვება და საზოგადოებაში გავრცელება.
მეორე შეიძლება იყოს გამჭვირვალობისთვის სხვა მექანიზმების შემუშავება და კონსორციუმმა ეს გააკეთა, სხვათა შორის, პერიოდულობით, თუ სწორად მახსოვს, თვეში ორჯერ, მაგრამ რაღაც პერიოდულობით საზოგადოება ჩართულია და აწვდის ხალხს ინფორმაციას. კოლეგიალური გამოხმაურება მათგან არის, რაც ძალიან მნიშვნელოვანია. იმედია, ეს გაგრძელდება. ამის გარეშე კონსორციუმი ამ საქმეში წარმატებული ვერ იქნება და მას სჭირდება, უფრო სწორად, ჩვენ ყველას გვჭირდება გაერთიანება. ეს უნდა იყოს რეალური სახალხო პროექტი. ჩვენი მიმართვის მიზანიც ეს იყო და ამიტომ იყო შერჩეული ორივე ადრესატი.
– მედიაში ვრცელდება ინფორმაცია, რომ, შესაძლოა, თქვენ გიხილოთ პოლიტიკაში მამუკა ხაზარაძის გვერდით. ადასტურებთ ამ ინფორმაციას?
– არა. პოლიტიკაში, მხედველობაში მაქვს აქტიური პოლიტიკა, ჩემს უახლოეს მომავალს არ ვგეგმავ. მე ვარ არასამთავრობო სექტორში, შესაბამისად, მე, როგორც არასამთავრობო სექტორის წარმომადგენელი, ვიქნები აქტიური, იქნება ეს სხვადასხვა პროექტის წარმართვა თუ სხვა აქტივობა. ეს არის მექანიზმები, სადაც შემიძლია, საზოგადოებრივად სასარგებლო საქმე ვაკეთო.
თუ იძულებული გავხდი, ამას ვერ გეტყვით. იძულებით მოუწია მამუკა ხაზარაძეს ბიზნესიდან საზოგადოებრივ საქმიანობაში გადასვლა. მე ასეთ რაღაცას უახლოეს პერიოდში არც ვფიქრობ და არც ვგეგმავ. ვნახოთ, რა იქნება. ბუნებრივია, ეს დამოკიდებულია გარემოზე.
– იძულებული რამ შეიძლება გაგხადოთ?
– ვერ გეტყვით. შეიძლება, გარემო შეიქმნას ისეთი, რომ ამის იძულება მომიწიოს. რამ გვაიძულა, რომ ჩვენი მანამდელი ქცევა შეგვეცვალა 2012 წელს?! გარემო პირობები რაც არის… მე უკვე აღარ ვარ იმ ასაკის, გამოცდილებისა და პასუხისმგებლობის, რომ სერიოზულად არ ვფიქრობდე ჩვენი შვილების უკეთეს მომავალზე. მინდა, ჩვენს შვილებს უკეთესი დავუტოვოთ. თუკი მეტი აქტიურობა იქნება საჭირო საზოგადოებრივ სივრცეში, კიდევ უფრო გავაქტიურდები სხვებთან ერთად.
– რა თვალსაზრისით გააქტიურდებით? ხაზარაძის მხარეს პოზიციონირებით? ასე შეიძლება გავიგოთ?
– ჩვენთან არა მხოლოდ პოლიტიკა, არამედ ყველა მნიშვნელოვანი დარგი მაინც პერსონიფიცირებულია, ანუ ივანიშვილის პარტია, სააკაშვილის პარტია და. ა.შ. მე ვცდილობ საზოგადოებაში დამკვიდრებული კლიშეების შეცვლას. ჩვენი გამოწვევა არის ფასეულობათა გაერთიანება. ამ შემთხვევაში მე ვიქნები ყველა იმ ადამიანთან გაერთიანებული, რომლებსაც აქვთ დემოკრატიული ფუნდამენტური ღირებულება, რომლებიც არიან დასავლურ განვითარებაზე ორიენტირებული.
შეიძლება, აღიქვათ, რომ ვინმეს შევუერთდი, მაგრამ, მერწმუნეთ, რომ თუკი სადმე რამე მიკეთებია, ეს ყოფილა ფასეულობათა ერთობა. მაგალითად, ვინმემ შეიძლება თქვას, რომ ახალგაზრდა იურისტთა ასოციაცია ვინმესია?! ამ დროს ჩვენ დავაფუძნეთ 25 წლის წინ. ეს გავაკეთეთ ძალიან ბევრმა თანამებრძოლმა, რომლებსაც გვქონდა პროფესიული და ღირებულებითი თანხვედრა. ამ ადამიანებს გვქონდა სხვადასხვა გემოვნება, მათ შორის პოლიტიკური, სხვადასხვა წარსული და ა.შ. მაგრამ ჩვენ გავაკეთეთ ეს. ახალგაზრდა იურისტთა ასოციაცია პერსონალურად არავისი არ არის. ჩვენ ეს შევძელით 25 წლის წინ და ახლა ვცდილობ, რაღაცა გავაკეთო სხვა მიმართულებით. თუკი რამე ახალი შეიქმნება, რაც ხელს შეუწყობს ჩვენს მომავალ თაობას, რაც განვითარებას უზრუნველყოფს, ჩავთვლი, რომ ჩემი მისია შესრულებულია.
იაგო ნაცვლიშვილი, ახალი თაობა