46 წლის შავკანიანი მამაკაცის, ჯორჯ ფლოიდის გარდაცვალებას აშშ-ში და ასევე მსოფლიოს სხვადასხვა ქვეყანაში საპროტესტო აქციების ტალღა მოჰყვა. მომხდარში საზოგადოება პოლიციელებს ადანაშაულებს. პროტესტი იმდენად მასშტაბურია, რომ მსოფლიოს კორონავირუსი გადაავიწყა.
შემთხვევა ქალაქ მინეაპოლისში მოხდა. ფლოიდს დაკავების დროს პოლიციელმა ყელზე მუხლი დააჭირა და მიუხედავად იმისა, რომ ჯორჯი ევედრებოდა, გაეშვა, რადგანაც ვერ სუნთქავდა, პოლიციელმა თხოვნა არ გაითვალისწინა.
მოგვიანებით, როდესაც ფლოიდმა უკვე მოძრაობა შეწყვიტა, პოლიციამ სასწრაფო გამოიძახა და ის კლინიკაში გადაიყვანეს, სადაც მალევე გარდაიცვალა.
დამოუკიდებელმა ექსპერტიზამ დაადგინა, რომ გარდაცვალების მიზეზი ასფიქსია გახდა.
ვინ იყო ჯორჯ ფლოიდი?
ჯორჯ ფლოიდი ტეხასში, ჰიუსტონში ღარიბთა უბანში გაიზარდა. ამ ადგილს “შავი საზოგადოების გულს” უწოდებენ. იქ დღემდე ადამიანები წარმოუდგენელ სიღატაკეში ცხოვრობენ, კრიმინალი მძვინვარებს და ძნელია, გადარჩე.
აღსანიშნავია, რომ ბიონსეც იმ უბანში გაიზარდა, თუმცა, მისგან განსხვავებით, იქ მცხოვრებთა უმეტესობა ცხოვრებაში სწორი გზის პოვნას ვერ ახერხებს და დიდი ნაწილი კრიმინალის გზას ადგება.
ჯორჯ ფლოიდი მოზარდობის პერიოდში წარმატებული სპორტსმენი იყო. 1992 წელს ამერიკულ ფეხბურთს თამაშობდა, მოგვიანებით კი – კალათბურთს და ამ სპორტშიც ნიჭი აღმოაჩნდა, თუმცა, საბოლოოდ, ციხეში აღმოჩნდა.
ის ათლეტური აღნაგობით გამოირჩეოდა. მოზარდობის პერიოდში მეგობრები “კეთილ გიგანტს“ ეძახდნენ.
“12 წლის ასაკში ისეთი გიგანტური იყო, მანამდე ასეთი მაღალი არავინ მინახავს“- იხსენებს ფლოიდს მეგობარი და თანაგუნდელი ჯონათან ვილი.
თავდაპირველად ამერიკულ ფეხბურთს თამაშობდა 88 ნომრიანი მაისურით, ხოლო შემდეგ, სამხრეთ ფლორიდაში კოლეჯის კალათბურთის გუნდში იყო. სკოლის დამთავრების შემდეგ, ტეხასის A&M-ის უნივერსიტეტში სწავლობდა, თუმცა არ დაუმთავრებია.
მისი ცხოვრება განსხვავებული გზით წავიდა. რასობრივმა დაყოფამ, ეკონომიკურმა უთანასწორობამ, წარმოუდგენელმა სიღარიბემ თავისი კვალი დაატყო და საბოლოოდ, 2007 წელს ნარკოტიკების შენახვისა და ქურდობის ბრალდებით დააკავეს და 5-წლიანი პატიმრობა შეუფარდეს.
მისი ახლობლები იხსენებენ, რომ ციხიდან გამოსვლის შემდეგ სურდა, ცხოვრება შეეცვალა როგორც თავისთვის, ასევე სიღარიბეში მყოფი მეზობლებისთვის, თუმცა ეს ვერ შეძლო.
სოციალურ ქსელებში ტრიალებს ვიდეო, რომელიც, სავარაუდოდ, 2017 წელსაა გადაღებული და რომელზეც ფლოიდი ევედრება ახალგაზრდა თაობას, რომ შეეშვან ძალადობას, მით უფრო იარაღის გამოყენებას.
ფლოიდის ოჯახის თქმით, ის მინესოტას შტატში 2018 წელს გადავიდა, რადგანაც ძალიან სურდა ახალი ცხოვრების დაწყება. ცდილობდა, რომ გზა ეპოვა ცხოვრების ახალი ფურცლიდან დასაწყებად.
თავდაპირველად მან მინესოტაში ადგილობრივ საქველმოქმედო ორგანიზაციაში დაცვად დაიწყო მუშაობა, შემდეგ სამუშაო შეიცვალა და სატვირთოს მძღოლად გადავიდა, ასევე მუშაობდა ერთ-ერთ რესტორანში, სადაც მას “დიდ ფლოიდს“ ეძახდნენ.
ბევრი ამერიკელის მსგავსად, კორონავირუსის გამო, მანაც დაკარგა სამსახური და შემოსავალი.
რაც შეეხება დაკავებას, ცნობილია, რომ პოლიციელებს ჰქონდათ ინფორმაცია, რომ მან 20 დოლარიანი ყალბი კუპიურით სიგარეტი იყიდა, სწორედ ამის გამო აკავებდნენ. ხოლო რაც შემდეგ მოხდა, მთელმა მსოფლიომ ნახა.
ამბები