30 ნოემბერს მცხეთის სამედიცინო ცენტრში, Covid-19-ის დიაგნოზით, 24 წლის ნინო გულიკაშვილი გარდაიცვალა.
“ამბები” გარდაცვლილის დეიდაშვილს, ეკა რაზმიაშვილს ესაუბრა.
– როგორ დაინფიცირდა კორონავირუსით თქვენი დეიდაშვილი?
– ერთ-ერთ მაღაზიაში მოლარედ მუშაობდა, უეცრად შეუძლოდ გახდა – ტემპერატურამ აუწია და ცხელება დაეწყო. გადაწყვიტა, ტესტი გაეკეთებინა კორონავირუსზე. ორმა ტესტმა უარყოფითი პასუხი აჩვენა, მიუხედავად ამისა, მაინც მძიმდებოდა მისი მდგომარეობა, ამიტომ გამოვიძახეთ სასწრაფო. ბრიგადამ მცხეთის სამედიცინო ცენტრში გადაიყვანა. იქ მესამედ აუღეს ტესტი კორონავირუსზე და გვითხრეს, რომ ინფიცირებული იყო.
ამ კლინიკაში მკურნალობდა 10 დღის განმავლობაში და მეათე დღეს გვითხრეს, რომ ფილტვები გაეთიშა და გარდაიცვალა. გარდაიცვალა იმ დღეს, როცა უნდა გამოეწერათ. წინა დღეს ვესაუბრეთ ვიდეო თვალით მე და დედამისი და გვთხრა, ყველაფერი დასტაბილურდა და ხვალ უნდა გამომწერონ, გადავრჩითო. ერთ ღამეში უეცრად დამძიმდა და დილით გარდაიცვალა.
– როგორ მკურნალობდნენ კლინიკაში, რას ამბობდა თვითონ?
– ძალიან უკმაყოფილო იყო. ამბობდა სრული უყურადღებობაა, წყალს ვითხოვ, რამდენი ხანია და არავინ არის, რომ მომაწოდოსო. პერიოდულად მძიმდებოდა და უმჯობესდებოდა მისი მდგომარეობა. ერთ-ერთმა ექიმმა თქვა, ჩემთან რომ ჩამოიყვანეს, უკვე გვიან იყო და ვერაფერს გავხდებოდიო. გოგოს ტუჩები ჰქონდა დალურჯებული, სიმწრისგან იკვნეტდა, ალბათ.
– ჰქონდა მანამდე ჯანმრთელობის პრობლემები?
– არანაირი. ახლა მცხეთის საავადმყოფოში გვეუბნებიან, რომ თურმე ნინის შაქრიანი დიაბეტი ჰქონდა და ამან გამოიწვა მისი გარდაცვალება. მე ვსვამ კითხვას: თუ შაქრიანი დიაბეტი ჰქონდა ეს გარდაცვალების მერე უნდა გაგვეგო? გვაჩვენონ შესაბამისი დოკუმენტები.
– რას ამბობენ მისი მშობლები, ისინიც ექიმებს ადანაშაულებენ?
– როგორც კი დავასაფლავებთ ნინოს, დავიწყებთ ბრძოლას სიმართლის დასადგენად ყველა კანონიერი საშუალებით.
ამბები