ელენე ხოშტარიამ ახლახან დატოვა “ევროპული საქართველო“ და დამოუკიდებელი პოლიტიკური ცხოვრება გადაწყვიტა. გაზეთ “კვირის პალიტრასთან“ ამ თემაზე საუბრისას კი განაცხადა: “რაღაც ახლის გაკეთება მსურს, ახალი ფორმის პარტიის, ახალი ადამიანების მოყვანის. ეს იყო მთავარი მოტივი. “ევროპული საქართველოს” ლიდერებთან კონფლიქტი არ მქონია, ერთად მივიღეთ ეს გადაწყვეტილება და დროც ერთად შევარჩიეთ“.
ის, რომ 4 შვილის დედა პოლიტიკურად ასეთი აქტიურია, ნაწილობრივ მისი მეუღლის მხარდაჭერის დამსახურებაც არის, რასაც არც ელენე უარყოფს.
“ჩემი მეუღლე აქციაზე ერთადერთხელ იყო, როცა ნაგვის მანქანაზე შევხტი და ხელი გავიჭერი, მაშინ დარჩა დილამდე ჩემთან ერთად. მას პოლიტიკასთან არანაირი კავშირი არა აქვს, თუმცა მოსწონს, რასაც ვაკეთებ და მგულშემატკივრობს“, – ამბობს პოლიტიკოსი გამოცემასთან.
ელენეს 4 შვილი ჰყავს – გიორგი გაფრინდაშვილი, ნატალია, კონსტანტინე და რატი ბერიძეები.
“ჩემი აზრით, ძალიან მაგარი ქმარი მყავს, რომელიც დღეს 46 წლის გახდა”, – ასე მიულოცა ელენე ხოშტარიამ მეუღლეს, ირაკლი ბერიძეს 19 დეკემბერს დაბადების დღე სოციალური ქსელით.
ელენე ხოშტარიას მეუღლე ირაკლი ბერიძე შპს სიემსი-ში საოპერაციო დირექტორის თანამდებობაზე მუშაობს, საიდანაც ხელფასის სახით ბოლო წლის განმავლობაში 194.255,52 ლარი მიიღო, ის ასევე კონსულტანტია შპს მოზაიკ დეველოპმენტში, საიდანც 10.000 ლარის ოდენობის ხელფასი აიღო.
ელენე ხოშტარიამ კი გასულ წელს საპარლამენტო საქმიანობისთვის, ხელფასის სახით, 48.451 ლარი მიიღო, ხოლო თავისუფალ უნივერსიტეტში წაკითხული ლექციებიდან – 6.390 ლარი.
ელენე ხოშტარია ფლობს: 5.179 კვ.მ მიწის ნაკვეთს და 180,6 კვ.მ სახლს კახეთში (იყალთო), რაშიც 2010 წელს ჯამში 10.000 აშშ დოლარი გადაიხადა. ასევე, 1.502 კვ.მ მიწის ნაკვეთს ტაბახმელაში, რომელიც 2014 წელს 15.000 აშშ დოლარად შეიძინა. 2015 წელს კი, ამავე ტერიტორიაზე შეიძინა 423 კვ.მ სახლიც, რომლის ღირებულება 170.000 ლარია.
ირაკლი ბერიძის საკუთრებაშია: 46,9 კვ.მ ბინა ბაკურიანში, რომელიც 71.920 აშშ დოლარად შეიძინა. გარდა ამისა, მის საკუთრებაშია 2011 წელს, 145.000 აშშ დოლარად შეძენილი ბინა საბურთალოზე და 60 კვ.მ ბინა ასევე თბილისში, რაშიც 2013 წელს 45.000 აშშ დოლარი გადაიხადა.
წყვილმა ქალიშვილის, ნატალია ბერიძის, სწავლის საფასურად 5.520 ლარი გადაიხადა, ხოლო ტყუპი ბიჭების – კონსტანტინეს და რატის სკოლამდელი დაწესებულების საფასურად სულ 9.600 ლარი დახარჯა.
ამბები