ცნობილი ბიზნესმენი, „ლოპოტა სპა რეზორტის“ დამფუძნებელი გოგა მაისურაძე გარდაიცვალა.
ბიზნესმენი მძიმე სენს ერთი წლის განმავლობაში ებრძოდა.
„ლოპოტა სპა რეზორტი“ 2008 წელს დაარსდა, როგორც 7-ოთახიანი საოჯახო ტიპის სასტუმრო, მაშინ, როცა ადგილზე იყო მხოლოდ ტბა და ტყე. დღეს “ლოპოტა სპა რეზორტი” 190-მდე ნომერს, რამდენიმე საცურაო აუზს, რესტორნებს, მარანს, ღვინოთეკას, სპა ცენტრს აერთიანებს.
გოგა მაისურაძე ერთ-ერთ ინტერვიუში იხსენებდა, რომ ყველაფერი 3.000 დოლარით დაიწყო, ჯერ კიდევ მაშინ, როცა ბანკები სესხებს თითქმის არ გასცემდნენ და არც არავის სჯეროდა, რომ იქ შეიძლება, ტურისტი ჩასულიყო. როგორც ამბობენ, სამომავლო განვითარების გეგმის განხორციელება ბევრს უტოპიად ეჩვენებოდა, თუმცა გოგა მაისურაძემ ხორცი შეასხა იდეას და შექმნა ცნობილი ქართული ბრენდი, რომელსაც სახელი მისი მეგობრის, გია ფირადაშვილის, რჩევით დაარქვა.
“დაახლოებით 3.000 დოლარით დავიწყე, იდეის არავის სჯეროდა… ჩემი ხელით მომქონდა ქვები სასტუმროსთვის. ვაშენებდით, ვანგრევდით და ახლიდან ვაკეთებდით,” – ამბობდა გოგა მაისურაძე.
რეპორტი