თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორი ლევან რატიანი ქვეყანაში არსებულ ეპიდემიოლოგიურ ვითარებას აფასებს და ამბობს, რომ თუ ასე გაგრძელდა მივიღებთ სამედიცინო სისტემის კოლაფსს და როგორც რატიანი ამბობს “ვერავინ ვერ გადავრჩებით.” აღნიშნულის შესახებ მან “რუსთავი 2”-თან საუბრისას განაცხადა.
“თუ ვაქცინაცია არ იქნება მასიური, სამწუხაროდ, ვერ წარმოიშობა პოპულაციური იმუნიტეტი, ამიტომ სულ გვექნება აღმავალი პერიოდი, ვთქვათ პიკი, დაღმავალი, პლატო, რომ არ იყოს სპორადული ხასიათის ინფექცია (ჯერ ამაზე ლაპარაკი შორსაა, მაგრამ…) ამიტომ უნდა მოხდეს ინფექციის ლიკვიდაცია.
ძალიან მეშინია ხოლმე ამ სიტყვის, მაგრამ თუ ასე გაგრძელდა, დადგება პერიოდი, ქვეყანას კოვიდთან მებრძოლი საექიმო საზოგადოება ძალიან მალე არ ეყოლება. თუ ასე გაგრძელდა, მოჭარბებულ, მოზღვავებულ პაციენტებს ეს საექიმო რესურსი ვერ გაუძლებს და დადგება დრო, რასაც კოლაფსი ჰქვია, ჩვენდა სამწუხაროდ და თუ ასე გაგრძელდა, ვერც ერთი ვერ გადავრჩებით”, – ამბობს ლევან რატიანი.