სანდრო კაკულიას შვილს წლების წინ პირველი ტიპის დიაბეტი აღმოაჩნდა. მსახიობმა ამის შესახებ “ფორმულაზე“ გადაცემა “ჩათში” ისაუბრა.
ელენე ახლა 12 წლისაა და მამას სჯერა, რომ მის სრულწლოვანებამდე დაამტკიცებენ წამალს, რომელიც მინიმუმ გოგონას ინსულინზე დამოკიდებულებას მოუხსნის…
სანდრო კაკულია:
“ყველაფერი ერთ წამში იცვლება, მთელი სამყარო, როდესაც ექიმი შემოდის და გატყობინებს, რომ თქვენ შვილს აქვს პირველი ტიპის დიაბეტი. ეს არის ქრონიკული დაავადება და მთელი ცხოვრება ინსულინდამოკიდებული უნდა იყოს, რადგან ჯერ წამალი არ არის გამოგონებული. ელენე 6 წლის იყო მისი დიაგნოზის შესახებ რომ გავიგეთ. ერთ ჩვეულებრივ დღეს, ბავშვი რუტინულ ანალიზზე მივიყვანეთ. იმავე საღამოს, 9 საათზე, ექიმმა სახლში დაგვირეკა, შეშფოთებული ხმა ჰქონდა, – სასწრაფოდ მოიყვანეთ ბავშვი, ერთ-ერთი ანალიზი ძალიან არ მომწონსო.
ბილეთი მქონდა აღებული და 2 საათში სახლიდან უნდა გავსულიყავი, ჰოლანდიაში მივფრინავდი. ელენეს პირველივე ჯერზე შაქარი 500 აღმოაჩნდა, თავად ვერ გრძნობდა. ეგრევე რეანიმაციაში შეიყვანეს. როდესაც გვითხრეს, უნდა დავტოვოთო, ძალიან მინდოდა ნახვა და პანიკა ავტეხე.
გადასხმაზე იყო ბავშვი შეერთებული, მე კიდევ გარეთ ვიდექი, ვტიროდი, ვაკაკუნებდი, ჩემი შვილი მანახეთ-მეთქი. ბავშვი გამომიყვანეს. რომ არ მენახა, არ ვიცი, რა მეგონა. ჩავიხუტე და ტირილი დავიწყე, ბავშვმა ყურში ჩამჩურჩულა, არ ინერვიულო, მა, ყველაფერი კარგად იქნებაო, აქეთ დამამშვიდა ელენემ.
თუ კარგად მართავ, დიაბეტით ცხოვრება ჩვეულებრივ მიდის. გვჯერა, რომ როდესაც ზრდასრული იქნება, გამოიგონებენ რაღაც პრეპარატს, რომელიც ინსულინზე დამოკიდებულებას მაინც მოუხსნის პირველი ტიპის დიაბეტის მქონე ადამიანებს. ახლა ელენე 12 წლის არის, რაც დრო გადის პრობლემები იკლებს, ვსწავლობთ დიაბეტთან ერთად ცხოვრებას. ახლა ყველა პროდუქტზე ვითვლით ნახშირწყლებს. ასევე საკმაოდ რთულია ინსულინის დოზირება, პირველი ტიპის დიაბეტის დროს…”
ფორტუნა