ალექსანდრე ზაზარაშვილმა დღეს დილას ამერიკული ნიჭიერი მოიგო.
მომღერლის დედა გულიკო ეგნატაშვილი ფინალის დღეს ამბებს შვილზე და ოჯახზე ესაუბრა.
– ქალბატონო გულიკო, როგორი ბიჭია ალექსანდრე, როდის აღმოაჩინეთ მასში მუსიკალური ნიჭი…
– ამჟამად ვცხოვრობ სოფელ რუისში, ჩემს ოთხ შვილობილთან და ჩემს უფროს გოგონა ნაიკოსთან ერთად. ალექსანდრე ჩემი მეორე შვილია, ორი შვილი მყავს, ნაიკო 19 წლის და ალექსანდრე 15 წლის. ალექსანდრე 4 წლის ასაკში მივიყვანე მუსიკაზე თავიდან ხალხური სიმღერების გუნდზე დამყავდა, სადაც სოლოს შესრულებით მღეროდა და ასე გაგრძელდა ბავშვის კარიერა. ალექსანდრე შემდეგ გორში ვოკალის პედაგოგთან ნანა სამხარაძესთან გადავიყვანე, მას ხშირად გაჰყავდა საქართველოში კონკურსებზე, საიდანაც ყოველთვის გრან პრით და პირველი ადგილით ბრუნდებოდა.
– როგორ მოხდა, რომ ოჯახმა ერთდროულად ოთხი ბავშვი იშვილეთ?
– ეს ალექსანდრეს დიდი სურვილი იყო. მონასტერში დავდიოდით და იქ ვნახეთ ერთი ბავშვი, რომელსაც მამაო ზრდიდა, მაშინ გადაწყვიტა ალექსანდრემ, რომ თუ ვინმე ერთ ბავშვს მაინც დასჭირდებოდა დახმარება, ჩვენც დავხმარებოდით. სოციალურ სააგენტოში განცხადება შევიტანეთ, საიდანაც მალევე მოვიდა პასუხი – ოთხ დედმამიშვილს დროებით ესაჭიროებოდათ დახმარება და თავშესაფარი. მე და ალექსანდრემ მათი მდგომარეობა რომ ვნახეთ, დაუფიქრებლად წამოვიყვანეთ და უკვე ათი წელია ვზრდი. ბავშვებს ავადმყოფობის გამო, დედა მალე გარდაეცვალათ. ოთხივე დედას მეძახის, ძალიან გვიყვარს ერთმანეთი, ვერ ვარჩევ საკუთარი შვილების სიყვარულისგან, მე სულ მათ გვერდით ვარ.
– ვინ ეხმარება ალექსანდრეს ამერიკული ოცნების ასრულებაში?
– საქართველოში ჩატარდა კონკურსი, სადაც ნიჭიერ ბავშვებს ამერიკაში წასაყვანად ეძებდნენ. ალექსანდრემ ვოკალში გაიმარჯვა და აქიდან დაიწყო ალექსანდრეს ამერიკული ცხოვრება და წარმატებები. თავიდან დავით ღვინიანის ფონდმა წაიყვანა, შემდეგ იქ ვოკალისტ შეროლ პორტერთან გააგრძელა ურთიერთობა და ის უდგას გვერდით და ყველანაირად ეხმარება.