არცერთი ნორმალური პოლიტიკური ძალა არ არის დაინტერესებული, რომ ქვეყანაში იყოს დესტაბილიზაცია
თავდაცვის ყოფილმა მინისტრმა ირაკლი ოქრუაშვილმა თანამოაზრეებთან ერთად პოლიტიკური მოძრაობა „გამარჯვებული საქართველო“ დააფუძნა, რომლის მთავარი მიზანიც “ქართული ოცნების” ხელისუფლების შეცვლა და საქართველოში ბელადომანიის დასრულებაა. უკვე გაისმა სხვადასხვა ვერსიები, მათ შორის ისიც, რომ აღნიშნული პოლიტიკური ძალა რადიკალური მიმართულების იქნება.
გაჩნდა კითხვები როგორი საგარეო ვექტორის პარტია იქნება, რომელ პარტიებთან ითანამშრომლებს, როგორ მოახდენს დისტანცირებას მესამე პრეზიდენტ მიხეილ სააკაშვილთან და ხომ არ ემზადებიან რევოლუციისთვის? – ამ და სხვა საკითხებზე „ახალ თაობასთან“ ინტერვიუში „გამარჯვებული საქართველოს“ ერთ-ერთი ლიდერი კოტე კემულარია საუბრობს:
– გასაგებია, რომ თქვენი გუნდი ივანიშვილის ხელისუფლების შესაცვლელად მოდიხართ, მაგრამ რა გზას აირჩევთ? თითქოს გამოიკვეთა რადიკალური გზა, ემზადებით რევოლუციისთვის თუ რადიკალურად განწყობილი ამომრჩევლის მისამხრობად 2020-ის არჩევნებზე?
– არანაირი რადიკალური წიაღსვლები ჩვენ არ გვქონია, არ მიგვაჩნია, რომ საზოგადოების დიდი ფენაა, რომელიც რადიკალურად არის განწყობილი. ადამიანები განწყობილი არიან ძალიან საქმიანად, რათა საქართველომ დაიბრუნოს თავისი ძველი ლიდერის ფუნქცია. სახელმწიფოს აუცილებლად უნდა ჰქონდეს ფუნქცია და საქართველოს ლიდერის ფუნქცია ჰქონდა კავკასიაში და რეგიონში დიდ პატივს სცემდნენ. აღიარებული იყო ჩვენი რეფორმები და ამანაც განამტკიცა ლიდერის როლი, როგორც სახელმწიფოსი. ყველაფერი ეს დავკარგეთ, სწორედ ბიძინა ივანიშვილის და “ქართული ოცნების” ხელში დავკარგეთ ეს. შესაბამისად, ჩვენი მთავარი ამოცანაა ხალხს გვერდში დავუდგეთ პროფესიონალები, აღვადგინოთ ეს ფუნქცია, დავაბრუნოთ ხალხი საქართველოში, რომელიც ტოვებენ საქართველოს. დავუბრუნოთ პატარებს ელემენტარული პირობები, რომლებსაც შიათ…
რაც შეეხება რადიკალიზაციას, დესტაბილიზაციაც გაისმა და ა. შ. ეს ყველაფერი უკუღმაა. დესტაბილიზაცია იცით რა არის? – როცა ადამიანები შიმშილობენ საკუთარ ქვეყანაში, დესტაბილიზაციის წყაროა, როდესაც ქვეყანას საგარეო კურსი არ აქვს და ფაქტობრივად „ნუ გავაღიზიანებთ რუსეთს“, ეს არის მთავარი პოსტულატი, რაც ძალიან სახიფათოა, რადგან ქვეყანა სუსტდება და ფაქტობრივად პოზიცია არ აქვს. დესტაბილიზაციის წყაროა, რაც ჩვენმა ხელისუფლებამ პანკისში გააკეთა აბსოლუტურად არაგონივრულად. დესტაბილიზაციის წყაროა, როცა ადამიანს შვილს უკლავენ პანკისში და პასუხს არ აძლევენ რატომ მოუკლეს შვილი. დესტაბილიზაციის წყაროა, რაც დავით გარეჯში ხდება და ამას აკეთებს პრეზიდენტი მისი აბსოლუტურად არაგონივრული ნაბიჯები. დესტაბილიზაციის წყაროა, რაც ხდება ტყიბულსა და ჭიათურაში, როდესაც ადამიანებს პირობები არ აქვთ, სიკვდილის რისკის ქვეშ მუშაობენ და 300 ლარს უხდიან ხელფასს და ვიღაცა მილიონებს აკეთებს. დესტაბილიზაციის წყაროა, როცა ხალხი მე-11 მე-12 სართულებიდან ცვივა და არავინ არის ამის მიმხედავი და შრომის უსაფრთხოების დამრეგულირებელი არავინაა. უამრავი ასეთი ფაქტია დესტაბილიზაციის წყარო. ჩვენ პირიქით გვინდა ხალხს ხელი შევუწყოთ.
– როგორ შეცვლით იმ ნიჰილიზმს, რაც საზოგადოებაშია, როცა ხალხი არა მხოლოდ ხელისუფლებას, არამედ სხვა პოლიტიკურ ძალებსაც აღარ ენდობა?
– საქმე იმაშია, რომ ჩვენ სხვადასხვა ინტერესთა ჯგუფებთან ვსწავლობდით ამას. დიდი ხანია ჩვენ არ ვმონაწილეობდით პოლიტიკაში და ჩვენი საქმით ვიყავით დაკავებულები, მაგრამ უკვე შეუძლებელია ასე ცხოვრება. ივანიშვილის ერთ-ერთი ყველაზე დიდი შეცდომა იყო ის, რომ მან თქვა შუა უნდა გაიკრიფოსო, რაც მიმართული იყო პოლიტიკური სპექტრის შესუსტებისკენ. კარგად იცით, რომ პოლიტიკური ძალის გარეშე, რომელიც შუამავალია ხალხსა და ხელისუფლებას შორის სასიკეთო ვერაფერი მოხდება. ამ დროს ხელისუფლება რჩება მარტო და ხელისუფლება ირყვნება და ხალხზე ძალადობას და ზემოქმედებას იწყებს, მაშინ როცა პოლიტიკური შუამავალი ძლიერი არ არის. ხალხიც პასიურდება და ბრაზდება ამ დროს.
– ის, რომ დღეს ხელისუფლება არაეფექტიანია, ამას ოპოზიციის სისუსტემაც შეუწყო ხელი, რომელიც თავად ივანიშვილმა დაასუსტა?
– კი, მაგრამ მთავარი კითხვა აქ ის არის, რით დასუსტდა ეს ოპოზიცია? – შუა გაკრიფა! აქედან გამომდინარეობს ეს. შენ როდესაც ხელისუფლებაში ხარ, ოპოზიციის დასუსტებით არ უნდა იყო დაინტერესებული. ოპოზიცია ხომ შენ დამხმარეა, თუნდაც შენი კრიტიკით, თუნდაც იმ აღმოჩენებით რაც არასწორად მიდის. თუ ასეთი სურვილი გაქვს, რომ ეფექტიანი იყო, ამ დროს ოპოზიცია შენი მშველელია, რათა გითხრას რაღაცები, ხალხს შეხვდეს და ა. შ. ამ დროს ოპოზიციის მოკვლა დიდი შეცდომაა. შენ თუ განსხვავებული აზრი მტრად მიგაჩნია, მაშინ უხეშად ცდები და მაშინ არც დემოკრატიასთან გვაქვს საქმე. ეს გვაქვს ახლა, რომ ხელისუფლება და ხალხი დარჩა მარტო. „ოცნება“ არანაირი პარტია არ არის, ეს არის ადამიანთა ჯგუფი, რომელსაც აფინანსებენ, კომფორტში არიან, თვალებში შესციცინებს ივანიშვილს და ვერავინ გაუბედავს ივანიშვილს იმის თქმას, რომ ხალხს ეს სჭირს… როცა გაერომ თქვა, რომ საქართველოში ბავშვები შიმშილობენ, მაშინ ივანიშვილმა გვითხრა ეს რა გავიგეო. სანამ გაეროს კომისია არ ეტყოდა, ამხელა ჯოგი რომ ჰყავს ვიღაცას ხომ უნდა ეთქვა რა ვითარებაც იყო.
– თქვენ გჯერათ, რომ მაშინ გაიგო ივანიშვილმა და იქამდე არ იცოდა?
– განცხადებას, ხომ არ ვიგონებ, ეს ხომ თვითონ თქვა?!
– ბევრი რამე გაგვიგია მისგან, ბევრი დაპირებაც, რომელიც არ შეუსრულებია, მაგრამ საკითხი აქ ის არის გვჯერა თუ არა?
– მან გვითხრა კვირიკაშვილზე იმიტომ გავცოფდი, რომ მან დამიმალა, რომ ბავშვები შიმშილობენ საქართველოშიო. ეს მისი ოფიციალური განცხადებაა. მე ვერ ჩავალ იქამდე, რას ფიქრობს ის. რასაც აცხადებს, იქიდან უნდა გავაკეთოთ დასკვნები.
გეთანხმებით, რომ ეცოდინებოდა, მაგრამ მან არ იცის, რომ პასუხს მაინც მაგას მოსთხოვს ქართველი ხალხი. კი იძახის მე რა შუაში ვარო, მაგრამ ხომ ყველამ იცის, რომ არაფორმალური მმართველია?!
როცა შენ მარტო რჩები ხალხთან, ძალიან ცოდო ხარ და ამაში მინდა დავეხმარო. მინდა დაინახოს, რომ შეიძლება მშვიდად შეცვალონ ის პოლიტიკურმა ძალებმა. ნამდვილმა პოლიტიკურმა ძალებმა. არცერთი ნორმალური პოლიტიკური ძალა არ არის დაინტერესებული, რომ ქვეყანაში იყოს დესტაბილიზაცია.
– თქვენ პოლიტიკურ გუნდს იმის ამბიცია გაქვთ, რომ შეცვლით ხელისუფლებას თუ გგონიათ, რომ იმ ძალთა ბალანსით მოახერხებთ პარლამენტში შესვლას, რომ გარკვეული გავლენის მოხდენას შეძლებთ პროცესებზე?
– ჩვენ უკვე ვთქვით, რომ ბელადი არ გვეყოლება. ჩვენი პირდაპირი ამოცანაა, რომ ივანიშვილის ბელადობა და ზოგადად ბელადობა საქართველოში უნდა დასრულდეს. ეს არის ჩვენი პირდაპირი ამოცანა. ჩვენ ვიყავით პარლამენტშიც და მთავრობაშიც, ჩვენ საერთოდ არ გვაინტერესებს ის, რომ პარლამენტში ვიყოთ, მაგრამ დაინტერესება არის ის, რომ ის პოლიტიკური ძალები, ვინც არჩევნების გაყალბების, კრიმინალების წინააღმდეგია, ისინი ვიყოთ ერთიანი რიგ საკითხებზე. ჩვენთვის მიუღებელია უფლებების დარღვევა და მოგეხსენებათ არჩევანის უფლების წართმევა ერთ-ერთი მთავარი დარღვევაა მთელ მსოფლიოში. დღეს არჩევანი კეთდება კარტოფილით და ხახვის დარიგებით. ჩვენი მოკავშირე იქნება ყველა და ყველას მოკავშირე ვიქნებით ვისაც ეს არ უნდა. ივანიშვილს ქვეყანა უფსკრულისკენ მიჰყავს და გვინდა, რომ მასაც და საზოგადოებასაც ავუხსნათ ეს. არა მარტო პარტიები გავერთიანდეთ, არამედ საზოგადოება, ინტერესეთა ჯგუფები, მეცნიერები… ყველა ვინც თვლის, რომ საქართველოს გადაარჩენს სამართლიანი არჩევნები.
– არის მცდელობა, რომ თქვენი ასოცირება მოხდეს სააკაშვილთან, როგორ მოახდენთ დისტანცირებას? ახლა საუბრობდით უფლებების დარღვევაზე და გაგახსენებენ იმ პერიოდის ვითარებას, მათ შორის ოქრუაშვილის მინისტრობის პერიოდს. ამ ყველაფრის წინააღმდეგ როგორ დაარწმუნებთ საზოგადოებას?
– მე 2007 წელს წამოვედი სააკაშვილის ხელისუფლებიდან. იმის გამო, რომ ბევრი რამე არ გაითვალისწინეს, რეფორმების სათავეებთანაც ვიყავი. იუსტიციის მინისტრი ვიყავი და ბევრი რამე ჩემი დაწყებულია, მათ შორის სახელი „იუსტიციის სახლიც“ კი ჩემი მოფიქრებულია. რაც შეეხება ირაკლი ოქრუაშვილს, ის ჩემზე ადრე ჩამოაცილეს ხელისუფლებას შიდა ინტრიგების გამო. ირაკლი ოქრუაშვილმა გაატარა რეფორმები შსს-ში, პროკურატურაში და თავდაცვის სამინისტროში. ამას გადაჰყვა ირაკლი ოქრუაშვილი და ძალიან დიდი თავდასხმები გადაიტანა. ასე, რომ ჩვენ ვიღაცამ მოგვკითხოს ყველაფერ იმაზე პასუხი, ვისი უფლებებიც დაირღვა, ეს სისულელე და ყველაფრის უკუღმა წარმოჩენა იქნება.
რაც შეეხება ნაციონალური მოძრაობის იმ ხალხს, ვისაც პასუხი უნდა მოსთხოვონ, ის ხალხი ივანიშვილს გვერდით უზის, გადმობარგებულ, გადმოპორტირებულ თუ გადმობირებულები აგერ უსხედან. ეს მცდელობა უსაფუძვლო იქნება და ამ ყველაფერს საზოგადოება კარგად დაინახავს.
მიხეილ სააკაშვილი აღარ არის ნაციონალური მოძრაობის თავმჯდომარე, ეს თანამდებობა უკავია გრიგოლ ვაშაძეს. სააკაშვილი უკრაინაშია, წარადგინა თავის სია და იჯდეს უკრაინაში. თუ ვინმე უკრაინაში ერჩის მას, ჩვენ ამისთვის არ გამოვადგებით. ივანიშვილს აქვს გეგმა, რომ უკრაინაში ებრძოლოს მას და ეს მისი საქმეა. არა მგონია ეს სწორი იყოს, რადგან უკრაინა მეგობარი ქვეყანაა და მის საქმეებში ჩარევა სწორი არ იქნება.
– ანუ თვლით, რომ სააკაშვილთან დისტანცირება არ გჭირდებათ?
– ჩვენ ჩვენი საქმე გვაქვს, ქართული კანონმდებლობით და კონსტიტუციით. ხელისუფლებაში დღეს სააკაშვილი არ არის, ხელისუფლებაშია ივანიშვილი და მისი „ოცნება“, რომელიც არის ჩვენი მოწინააღმდეგე.
– კიდევ ერთი მთავარი კითხვა არის ის, როგორი საგარეო კურსი ექნება თქვენს პოლიტიკურ ძალას იქნებით პროდასავლურ თუ პრორუსულ ორბიტაზე?
– მკაფიოდ პროდასავლური, თანაც გამოკვეთილი ამერიკული სტრატეგიული პარტნიორობის. იმიტომ, რომ დღეს მთავარი ცენტრი, სადაც უსაფრთხოების მთავარი გარანტიები შეიძლება იპოვოს სახელმწიფომ, სწორედ აშშ-ია. ამიტომ არის გაუგებარი პრეზიდენტის განცხადება ხალხისთვის, რომ წინააღმდეგი ვარ ამერიკასთან სამხედრო თანამშრომლობის გაღრმავების და ბაზების საკითხი არ უნდა დაისვასო, ამას სახელმწიფოს სახელით იძახის. ეს აბსოლუტურად არაგონივრული განცხადებაა. იმიტომაც, რომ ჩვენ მოვისმინეთ პომპეოს განცხადება, რომ აშშ-ის და მეგობარი ქვეყნების გემები უკვე შავ ზღვაში არიან.
იკვეთება უსაფრთხოების თანამშრომლობის ვექტორები, რომელიც გააძლიერებს ჩვენს სახელმწიფოებრიობას. პომპეომ რომ არ გვითხრას, ჩვენს უტვინო ხელისუფლებას არ უნდა ესმოდეს, რომ ანაკლიის პორტის საკითხი არ არის მარტო ღარიბაშვილსა და კვირაკშვილის ბრძოლის და შიდა კლანური დაპირისპირების საკითხი?! შეიძლება არ მოგწონდეს მამუკა ხაზარაძე, მაგრამ ამას შეიძლება ქვეყნის სტრატეგიული მიმართულება გადააყოლო?! ჩვენს შთამომავლობას და სახელმწიფოებრიობას სჭირდება ამერიკასთან სტრატეგიული თანამშრომლობა და იქიდან ეს შემოთავაზება გვაქვს. სერიოზული ნაბიჯებია გადადგმული, ხელშეკრულებები გაფორმებულია… ჩვენი სახელოვანი ჯარისკაცები სახელმწიფოებრიობისთვის და მისთვის სახელის მოხვეჭის მიზნით იბრძვიან ამერიკელ, ფრანგ თუ გერმანელ ჯარისკაცებთან და ამ დროს სახელმწიფო რას აკეთებს?! ეს არის პრობლემა და ჩვენ გამოკვეთილად ვიქნებით ამ პოზიციაზე, პროდასავლურ პოზიციაზე.
– აქედან გამომდინარე ბურჯანაძესთან თანამშრომლობა უნდა გამოვრიცხოთ და გვითხარით, ვინ მიგაჩნიათ ოპოზიციაში მთავარ მოკავშირედ?
– ჩემთვის გვარებს არაფერი მნიშვნელობა არ აქვს. ახლა მიდის დუღილის პროცესი, შეიძლება ბევრი პარტია გადალაგდეს და სულაც პროდასავლურ გზაზე დადგეს, ეს არც მე და არც არავინ იცის. შევდივართ საარჩევნო ფაზაში, შესაბამისად ვისაც ექნება პროდასავლური პოზიცია, ვინაც არ შეეგუება არჩევნების გაყალბებას, ვინც მზად არის, რომ იბრძოლოს, რათა საქართველომ დაიბრუნოს ლიდერის როლი, ყველასთან ვითანამშრომლებთ.
– ანუ, შესაძლოა, რომ სხვადასხვა თემატურ საკითხზე სხვადასხვა პარტიასთან ითანამშრომლოთ?
– დიახ, ყველა ოპოზიციურ პარტიასთან, ვისთანაც ღირებულებები დამთხვევა გვექნება.
– კონკრეტულად ჯერ არ გსურთ გამოკვეთა და ამას დრო აჩვენებს?
– რა თქმა, უნდა დრო აჩვენებს და თვითონ პოლიტიკური ძალების პოზიციები, რომელსაც შევისწავლით ძალიან სკურპუოზულად.
იაგო ნაცვლიშვილი, ახალი თაობა