რამდენიმე დღის წინ ქართულ პოლიტიკურ სივრცეს კიდევ ერთი პოლიტიკური ძალა შეემატა. თავდაცვის ექსმინისტრმა ირაკლი ოქრუაშვილმა თანამოაზრეებთან ერთად მოძრაობა “გამარჯვებული საქართველო” დააფუძნა, რომელიც მთავარ მიზნად საქართველოში ბელადომანიის დამარცხებას ისახავს.
როგორ მიიღეს მმართველ გუნდში ახალი მოძრაობის დაფუძნება, გაუხსენებენ თუ არა ირაკლი ოქრუაშვილს წინა ხელისუფლებაში ყოფნის პერიოდს და როგორ ფიქრობს, შეცვლის თუ არა პოლიტიკურ ამინდს ირაკლი ოქრუაშვილის მოძრაობა? – ამ საკითხებზე “ახალ თაობასთან” ინტერვიუში “ქართული ოცნების” ერთ-ერთი ლიდერი, დეპუტატი ზაქარია ქუცნაშვილი საუბრობს:
– ახალ-ახალი პოლიტიკური ძალები იქმნება. ახლახან პრეზენტაცია ჰქონდა ირაკლი ოქრუაშვილს, რომელმაც მოძრაობა “გამარჯვებული საქართველო” შექმნა. გამოიკვეთა რაღაც კონტურები, რა მოლოდინი გაქვთ, შეცვლის თუ არა ის ქვეყნის პოლიტიკურ ამინდს?
– თუ თქვენ მეკითხებით ირაკლი ოქრუაშვილის გარშემო შექმნილ მოძრაობაზე, მაშინ გამიჭირდება პასუხის გაცემა. იმიტომ, რომ არ ვიცი რა მიზნით, რა იდეოლოგიით შეიქმნა ეს მოძრაობა. გარდა იმ ზოგადი ფრაზისა, გაბრაზებულები ვართო. გაბრაზებულები ვართ, ამ საფუძვლით მოძრაობის შექმნა დიდი გამარჯვებისთვის საკმარისი არ იქნება.
– მათ თქვეს, საქართველოში ბელადომანია უნდა დავასრულოთო. რეალურად გითხრეს, რომ ქვეყანაში ბელადია. ეს რას ნიშნავდა თქვენთვის?
– ოპოზიციური პარტიები მიდრეკილი არიან რადიკალიზაციისკენ, პოზიციას გამოხატავენ რადიკალური ფორმით, აქედან გამომდინარე, მათი შეფასებაც რადიკალურია. ასე რომ, მათი შინაარსი და ფორმა რადიკალურია… მაგრამ, ვიმეორებ, როდესაც ქმნი რაღაცა მოძრაობას, მას უნდა ჰქონდეს მიზანი და იდეოლოგიური საფუძველი. მე არ ვიცი, რა იდეოლოგიური საფუძველი და რა მიზანი აქვს. ყველა ოპოზიციური პარტია ამბობს, ჩვენ არჩევნებში გავიმარჯვებთო. ეს ფრაზა გამარჯვებისთვის საკმარისი რომ იყოს, მაშინ საქართველოში 300 გამარჯვებული პარტია უნდა გვყავდეს. ყველა დარწმუნდა, რომ ეს ფრაზა “ჩვენ არჩევნებში გავიმარჯვებთ” საკმარისი არ არის გამარჯვებისთვის.
– ანუ გამოდის, რომ მათ ამ ტაქტიკაში ვერ ეთანხმებით?
– არ ვიცი, რა იდეოლოგია და მიზანი აქვთ, რა ხერხებს გამოიყენებენ. რაც არ ვიცი, ის როგორ შევაფასო?!
– ანუ, როცა პარტია თუ პოლიტიკური მოძრაობა იქმნება, მას თავიდანვე უნდა ჰქონდეს ეს ყველაფერი გაცხადებული?
– ზოგადად ნებისმიერი მოძრაობა უნდა იქმნებოდეს იდეის მატარებელი ლიდერის გარშემო და ეს ლიდერი უნდა იყოს მთავარი და მისი განმახორციელებელი. იდეა, გარდა გაბრაზებულებისა და იმისა, რომ ამბობენ, გავიმარჯვებთო, მე არ მომისმენია. აქედან გამომდინარე, მიჭირს იმის შეფასება, რაც არ მომისმენია და არ დამინახავს.
– ლიდერი არის ირაკლი ოქრუაშვილი. მისი პოლიტიკური წარსული რას გეუბნებათ? ის იყო იმ ხელისუფლებაში, რომელსაც დღემდე აკრიტიკებთ და 9 წელს ახსენებთ მმართველი გუნდი. აკისრებთ თუ არა გარკვეულ პასუხისმგებლობას მასაც იმაზე, რა შეცდომებიც წინა მმართველობის დროს იყო?
– ირაკლი ძალიან წინააღმდეგობრივი პიროვნებაა. მისმა ბოლო პოზიციამ საპრეზიდენტო არჩევნებში ნაციონალურ მოძრაობასთან გაერთიანებასთან გამო მთელი საზოგადოება გაოცებული დატოვა, იმიტომ, რომ ყველას ეგონა, ირაკლი ოქრუაშვილი ნაციონალურ მოძრაობას მოწინააღმდეგედ აღიქვამდა. მისი პირადი საკითხებით დაწყებული და საზოგადოებრივით დამთავრებული, აღმოჩნდა, რომ საპრეზიდენტო არჩევნების დროს იმ გუნდში იყო. ამან, ჩემი აზრით, იმედგაცრუება გამოიწვია მის ბევრ მხარდამჭერში.
მე ვიზიარებ აჩიკო თალაკვაძის პოზიციას, რომ ნაციონალური მოძრაობა ტოქსიკური ძალაა. ამ დროს მასთან ასოცირება იწვევს მოწამვლას. აქედან გამომდინარე, წინასწარ არ მინდა შეფასებების გაკეთება, მაგრამ საზოგადოების დიდი ნაწილი იმედგაცრუებულია იმით, რაც იხილა.
– ანუ გგონიათ, რომ ოქრუაშვილის მიერ ნაციონალური მოძრაობის კანდიდატის მხარდაჭერა იქონიებს გავლენას ამომრჩევლის თვალში?
– იქონიებს. გინდა, არ გინდა, მასთან ასოცირებას უარყოფითი გავლენა აქვს. ნახეთ, რომ ახალმა პოლიტიკურმა მოძრაობებმა, რომლებიც ჩაისახა, ნაციონალურ მოძრაობასთან დისტანცირება გააკეთეს. მაგალითად, ალეკო ელისაშვილის მოძრაობამ და სხვა მოძრაობებმა არ მოახდინეს ამ პარტიასთან ასოცირება. ბოკერია რომ ბოკერიაა, ისიც კი ცდილობს ნაციონალურ მოძრაობასთან გამიჯვნას. ასე რომ, ახალი თუ ძველი ძალები ნაციონალურ მოძრაობას ემიჯნებიან და შენ მას ეკედლები, რა თქმა უნდა, ეს გავლენას მოახდენს და მასზე უარყოფითად იმოქმედებს.
– თუ რაღაც წარმატების მიღწევა უნდა, ამ პოლიტიკურ ძალას ნაციონალურ მოძრაობასთან გამიჯვნა მოუწევს?
– გამიჯვნას ვეღარ შეძლებს, მაშინ როცა ყველამ იცის, რომ მის გუნდში იყო საპრეზიდენტო არჩევნების დროს და მის კანდიდატს უჭერს მხარს.
– მაგ ლოგიკით ბევრი იყო მხარდამჭერი. ბოკერია ახსენეთ და მისი პარტიაც მხარს უჭერდა გრიგოლ ვაშაძეს მეორე ტურში.
– ბოკერიას ჯგუფმა მეორე ტურში დაუჭირა მხარი ოპოზიციური სოლიდარობის გამო, თორემ ვნახეთ, რომ ახლა ჩატარდა შუალედური არჩევნები და ისინი ერთ პოლიტიკურ ოჯახში არ ყოფილან.
– ხელისუფლებას ხშირად გახასიათებთ ხოლმე, როცა ოპოზიციას ახსენებთ წარსულს, იმ შეცდომებსა და გადაცდომებს, რომლებიც ჰქონდათ მათ. ამ შემთხვევაშიც გაახსენებთ თუ არა ოქრუაშვილს იმ მძიმე კადრებს, რომლებიც იყო, დაჭერები, ბორდელებში შევარდნა და ა.შ? იქნება თუ არა ეს მეთოდები თქვენს რიტორიკაში?
– ჩვენს რიტორიკაში ირაკლი ოქრუაშვილის საწინააღმდეგოდ?
– დიახ.
– ჩემს რიტორიკაში არ იქნება. მე არ მჩვევია ასეთი სტილის კამათი.
– ამ შემთხვევაში თქვენს პოლიტიკურ გუნდს ვგულისხმობ და არა პერსონალურად თქვენ.
– სხვები რა რიტორიკას გამოიყენებენ თავისუფალ ქვეყანაში, როგორ გითხრათ. მე არ ვიცი, ვინ რას გაუხსენებს ოქრუაშვილს. ჩემს რიტორიკაში არ იქნება. მე, როგორც წესი, ადამიანებს წელს ქვემოთ არ ვურტყამ. სხვები როგორ მოიქცევიან, მაგაზე მე ვერ გიპასუხებთ. გამოხატვის თავისუფლებაა და ყველა შეუძლია, გაიხსენოს ის, რაც საჯაროდაც ცხადი იყო.
– არ თანხმდებით ხოლმე საერთო მესიჯებზე გუნდში?
– არა, საერთო მესიჯების სისტემა გვაქვს. ისევე, როგორც ყველა პოლიტიკურ მოძრაობას, ჩვენც გვაქვს საერთო მესიჯების სისტემა, მაგრამ ეს არ გამორიცხავს ინდივიდუალიზმს. მე თუ ვხედავ, რომ მაქვს ჩემი განსხვავებული აზრი, მას გამოვხატავ. ასე რომ, არ მაქვს ეგ კომპლექსი, რომ ყველა შემთხვევაში ის უნდა გავიმეორო, რაც საერთოა.
– ახსენეთ, რომ ნაციონალური მოძრაობა ტოქსიკური ძალაა და ოქრუაშვილის მოძრაობა რაღაცნაირად ასოცირებულია მასთან. ახსენეთ ბოკერიას ფრთაც. თქვენთვის პირადად რომელი პოლიტიკური ძალაა მიუღებელი, ისეთი, რომელთანაც არასდროს ითანამშრომლებდით?
– ჩემთვის კომუნისტები და ნაციონალები ლამის გაერთიანებული არიან. ეს ორი ძალა ჩემთვის დაახლოებით ერთნაირია. ერთი ერთში ვერ ვიტყვი, მაგრამ დაახლოებით ერთნაირად მიუღებელი პოლიტიკური ძალებია. ყველა სხვას წარმატებას ვუსურვებ. ყველა მოძრაობაში არიან კარგი ადამიანები, ისევე, როგორც ყველა მოძრაობაში არიან საზოგადოებისთვის მიუღებელი ადამიანები.
– ნაციონალურმა მოძრაობამ რებრენდინგი ვერ დაგანახათ და ის, რომ წარსულის შეცდომებს იაზრებენ?
– ეს რაღაცაში ხომ უნდა გამოიხატებოდეს?! როცა უტიფრად ამტკიცებენ, რომ მათი მმართველობა საუკეთესო იყო საქართველოს მრავალსაუკუნოვან ისტორიაში და როცა ცდილობენ, მცირედი პროცესი წარმოაჩინონ ქვეყნის აღმშენებლობად, მაშინ, როცა ქვეყნის აღმშენებლობა ეფუძნება ღირებულებებს – თავისუფლებასა და მშვიდობას, ხოლო მათი მმართველობისას არც ერთი იყო და არც მეორე, როცა ეს მთავარი ფუნდამენტები გამოცლილი ჰქონდა და ეს არ არის აღმშენებლობის იერსახე.
არ ვუკარგავ მასობრივი კორუფციის წინააღმდეგ ეფექტიან ბრძოლას. მიმაჩნია, რომ მათი ხელისუფლების მიღწევაა მასობრივი კორუფციის დამარცხება. მაგრამ, მე კარგად ვიცი, რომ, მაგალითად, კეზერაშვილი არაფრით მივიდა პოლიტიკაში და როგორ გამდიდრდა, ან თავად სააკაშვილს სამოთახიანი ბინაც არ ჰქონდა, როცა პოლიტიკაში მივიდა და მდიდარი გახდა. დიახ, ელიტურ კორუფციასა და მართვად საბაზრო ეკონომიკაზე ვსაუბრობ. თავად განსაზღვრავდნენ, ვინ იმპორტიორი უნდა ყოფილიყო, ვინ – ექსპორტიორი და, თუ მათთან არ გქონდა დალაგებული, ვერც ვერაფერს შემოიტანდი და ვერც გაიტანდი. 3 კომპანიაში იყო განაწილებული საწვავის იმპორტის საკითხი, 2 კომპანიაში იყო განაწილებული ხორბლის იმპორტის საკითხი და განაწილებული იყო ყველა ბიზნესის საქმიანობა მართვადი პირების მეშვეობით.
იაგო ნაცვლიშვილი, ახალი თაობა