“ქართული ოცნების” წევრი, საპარლამენტო უმრავლესობის დეპუტატი გედევან ფოფხაძე “ახალ თაობასთან” ინტერვიუში მიმდინარე პოლიტიკურ პროცესებზე საუბრობს.
– ბატონო გედევან, არჩევნების მეორე ტურის წინაც ვითარება დაძაბულია. შეიძლება ითქვას, რომ ასეთი დაძაბული ფონი არც ერთ არჩევნებს არ ახლდა. თქვენ რითი ხსნით ამას?
– 2012 წელსაც საკმაოდ დაძაბული იყო გარემო.
– მაშინ სულ სხვა რეალობა იყო.
– ბევრი ფაქტორით და მიზეზით აიხსნება ეს რეალობა. თავიდან ამ არჩევნებს ცოტა ისე მივუდექით. ჩვენი პარტიის კანდიდატი არ დავაყენეთ და დამოუკიდებელ კანდიდატს დავუჭირეთ მხარი. ამ გადაწყვეტილების მიღებას თავის მხრივ დროც დასჭირდა. ოპოზიციამ სამი თვე მოღალატეები გვეძახა, რადგან მხარი სალომე ზურაბიშვილს დავუჭირეთ.
ამან საზოგადოებაში დაძაბულობა გამოიწვია. არავის არ უნდა სამოქალაქო დაპირისპირება, არავის არ უნდა, სააკაშვილი უცებ თეთრ ცხენზე ამხედრებული შემოვიდეს, მისი სოციალური რეაბილიტაცია რომ მოხდეს. არავის არ უნდა, რევანშის მოწყობა სცადოს და ქვეყანა არიოს.
სოციალურად მოტივირებულ ამომრჩეველს პენსიის მომატება უნდა, ქვეყნის თავდაყირა დაყენება კი არა. ხომ ჰქონდათ 400 ლარიანი პენსიის დაპირება, ეს ამომრჩეველი ამ 400 ლარს ითხოვს და არა ქვეყნის არევას და სააკაშვილის დიდებით შემოსვლას.
ჩვენ ამომრჩეველს ვეუბნებით, რომ 20 ლარით მოგიმატებთ პენსიას, ისინი ეუბნებიან, სააკაშვილი რომ მოვა 400 ლარამდე მოგიმატებს, არადა სააკაშვილი ვერ მოვა. შესაბამისად, ამ ყველაფერმა ერთად დაძაბა ვითარება.
– ხომ არ ფიქრობთ, რომ ვითარების გამწვავებას ხელისუფლებამაც არაფერი არ დააკლო თუ ხელი არ შეუწყო? თქვენ გააკეთეთ სამოქალაქო ომთან დაკავშირებით განცხადება. ამ განცხადებას ხომ არ ნანობთ?
– არა, არ ვნანობ. გეუბნებით, ისინი ამისთვის ყველაფერს აკეთებენ და მე განცხადებაც კი არ გავაკეთო, რომელიც პრევენციული ხასიათის იქნება?! არ ვთქვა, თუ რა საფრთხეების მატარებელია პოლიტიკურად მოტივირებული შეწყალება?! ეს განცხადება მე ემოციურ ტალღაზე არ გამიკეთებია.
– რა ინფორმაცია გქონდათ, როდესაც ამ განცხადებას აკეთებდით?
– განსაკუთრებული ინფორმაცია არ მქონია, მე დავეთანხმე ანა დოლიძის განცხადებას, თუ რამდენად არასწორია პოლიტიკური მოტივაციით ადამიანების შეწყალება. ეს იყო სწორი ანალიზი და მეც ასე ვფიქრობ, რაც ვთქვი კიდეც.
ხომ გასაგებია ყველასთვის, თუ რას ნიშნავს პრეზიდენტის მხრიდან პოლიტიკური მოტივაციით მიღებული გადაწყვტილება შეწყალებასთან დაკავშირებით. თუ პრეზიდენტი თავის პოლიტიკურ მოკავშირეებს შეიწყალებს, ეს ხომ არის დაუსჯელობის წახალისება, იმ კონკრეტულ ადამიანებს კი, რომლებიც იმ წუთში გჭირდება, სამომავლო ინდულგენციას აძლევ.
– მიხეილ სააკაშვილს პრეზიდენტი ხომ ვერ შეიწყალებს? ის ჯერ მსჯავრდებული არ არის.
– არ არის საუბარი მხოლოდ მასზე, მერაბიშვილზე და ახალაიაზე, როგორც ყველა ამბობს. მაგალითად, შტაბში მყავს ვიღაც ყოფილი ზონდერი, რომელიც დაკავებული არც არის. მას ხომ ვაძლევ სამომავლო ინდულგენციას, მას ხომ ვეუბნები, რომ თუ ესენი პრობლემას შეგიქმნიან, მე აგერ ვარ და შეგიწყალებ! ვისაც გინდა, თავში ჩაარტყი, შენობებში შეიჭერი, მე გაძლევ ინდულგენციას. ამაზეა აქ საუბარი.
ამდენად, შეწყალების ინსტიტუტით შეიძლება მანიპულირება, პოლიტიკურად მოტივირებული შეწყალება ძალიან დიდი საფრთხის მატარებელია. ვაშაძის პოლიტიკური მოკავშირეები არიან მერაბიშვილი და ახალაია და ეს ხალხი პოლიტიკურ ბრძოლაში სჭირდება.
მე რომ გავაკეთე განცხადება, როგორ შეიძლება პოლიტიკური მოტივაციით შეწყალება იყოს ვინმეს ხელში, მით უფრო პრეზიდენტის ხელში ინსტრუმენტი, ამ განცხადებას მოჰყვა მეორე დღეს ახალაიას და მერაბიშვილს წერილები, შეწყალება არ გვინდაო. მერე თქვა ვაშაძემ, მათ კი არა, მცირეწლოვანი შვილი რომ ჰყავს, იმ ქალბატონს შევიწყალებო. მე არ ვიცი, რომელ ქალბატონზე იყო საუბარი, სულ 300 ქალბატონია საპატიმროში, მაშინ ეთქვა, ვის გულისხმობდა, მაგრამ არ მჯერა და არ არის სარწმუნო ეს განცხადება.
გასაგებია, ვის იწყალებდა, შემდეგ შეცვალა რიტორიკა. ამ ადამიანის ხელში შეწყალების ინსტიტუტი შეიძლება იქცეს ძალიან ცუდ რამედ, რადგან რაც გულში აქვს, ის უკვე ერთხელ წამოსცდა. ახლა ამას ვერანაირად ვერ ჩაანაცვლებს ქალბატონით, რომელსაც მცირეწლოვანი შვილი ჰყავს.
– თქვენ ხელში არ არის საკონსტიტუციო უმრავლესობა? შეგიძლიათ კონსტიტუცია გადასინჯოთ და შეწყალების უფლება ჩამოართვათ პრეზიდენტს.
– არა, კონსტიტუციის ცვლილება ძალიან ხანგრძლივი პროცესია. ერთი წელი მაინც დაგვჭირდება ამ ნორმის შესაცვლელად. პრინციპულ დონეზე ასეთი საკონსტიტუციო ცვლილების მომხრე მე არ ვარ. შეწყალების ექსკლუზიური უფლება პრესიდენტს უნდა ჰქონდეს და არა, მაგალითად, მთავრობას.
ვაშაძე თუ გახდება პრეზიდენტი, ის იქნება ტროას ცხენი, რომლის მუცლიდანაც გადმოვარდებიან სააკაშვილი, მერაბიშვილი, ახალაია, ის ზონდერები, რომლებიც ციხეებში ხალხს აუპატიურებდნენ, ის ნიღბიანები, რომლებიც გაჰკიოდნენ “ბადრის რა…” და დედას რომ აგინებდნენ.
ეს არის ჩემთვის ცხადი და ნათელი. გნებავთ, დავიძაბოთ ამის გამო და გნებავთ, ნუ დავიძაბებით, მაგრამ მე მირჩევნია, დავიძაბო და არჩევნებამდე მობილიზებული ვიყო და ეს საფრთხეები ჩვენს ქვეყანას ავარიდოთ.
მე ამ საფრთხეებს ვგულისხმობდი, როდესაც სამოქალაქო დაპირისპირებაზე ვაკეთებდი აქცენტს და არა იმას, რომ ინფორმაცია მაქვს, რომ არალეგალურად ქვეყანაში იარაღი შემოიტანეს. ასეთი ინფორმაცია არც არავის გვაქვს. მეორე მხარეს არის ძალა, რომელიც ყველაფერზეა წამსვლელი, მათ შორის, ცხედრებზეც გადაივლის და ამ ძალას მიხეილ სააკაშვილი ჰქვია.
– ყველა არჩევნებს ლაიტმოტივად გასდევს სამოქალაქო დაპირისპირების, არეულობის საფრთხე, რაზეც ხელისუფლების მაღალჩინოსნები საუბრობენ, მაგრამ არჩევნები გაივლის და ეს თემაც დავიწყებას მიეცემა. რატომ?
– მე ვისაუბრე იმ დაპირისპირებაზე, რომელიც რეალურია. ნიკა გვარამია სამი თვე მოღალატეს მიწოდებდა. მერე ფეისბუკ-პოსტი დაწერა, ვინც სალომე ზურაბიშვილს მხარს დაუჭერს, ყველას იდენტიფიცირებას მოვახდენთ და დავსჯითო. ჩემს განცხადებაზე კი მეგობრობა მეგობრობადო და უწმაწური სიტყვებით მომიხსენია.
– ისე, თქვენი სიტყვები მახსოვს ადრე ნათქვამი, თუ ნიკა გვარამიას ჩემი დაცვა დასჭირდება, მე მას დავიცავო.
– დიახ, მე ამას ვამბობდი მასზე, მაგრამ რიტორიკა მან შეცვალა. კაი ხანია, ჩემი მეგობარი აღარ არის, საერთოდ არ ვიცი, ვინ არის.
– მეორე ტურის მოლოდინები როგორია? ბევრი კითხვა გამოიწვია ახალმა ბილბორდებმა, სადაც ბიძინა ივანიშვილია და არა – სალომე ზურაბიშვილი. ეს “ოცნების” სტრატეგიული გადაწყვეტილებაა?
– მე ვერ ვხვდები, ამაში რა პრობლემაა. მეორე ტური არის ღირებულებითი არჩევანი. ეს არ არის მხოლოდ კანდიდატებს შორის არჩევანი. ეს არ არის სალომე ზურაბიშვილსა და გრიგოლ ვაშაძეს შორის ბრძოლა. პოლიტიკური მოცემულობის არასწორი აღქმა იქნება, რომ ვაშაძეს ვუყუროთ როგორც მხოლოდ კანდიდატს და ამ პროცესს, როგორც მხოლოდ საარჩევნო კამპანიას. ამიტომ, მე მაგალითად ამ ბილბორდზე არა მხოლოდ ბიძინა ივანიშვილს, არამედ ია მეტრეველს, რობაქიძეს, გირგვლიანს, ვაზაგაშვილს განვათავსებდი, რადგან ისინი არიან ამ კრიმინალური ბანდის წინააღმდეგ ბრძოლის სახე.
– თქვენი ამომრჩეველი დაგიბრუნდებათ? რა მოლოდინები გაქვთ?
– ბუნებრივია, საზოგადოება ამ ყველაფერს რაციონალურად მიუდგება და გააანალიზებს. მე ვფიქრობ, ის ამომრჩეველი, რომელიც 2012 წელს აკეთებდა არჩევანს, დღესაც გამოვა და ამ არჩევანს გააკეთებს. ჩვენ გვჯერა, რომ კვლავ წამოვა ის ტალღა, ის ხალხი, ვინც პირველ ტურს გულგრილად მიუდგა და უკვე ღირებულებით არჩევანს გააკეთებს.
მე მჯერა, რომ ეს ხალხი სახლში არ დარჩება. მე იმედი მაქვს საზოგადოებრივი აქტიურობის, ამ ყველაფრის გაანალიზების, რომ სააკაშვილის რევანში დაუშვებელია.
– პირველ ტურში ელოდით ამ დარტყმას? რამ იქონია გავლენა, რა იყო მიზეზი ამ შედეგების, გაუცივდა გული თქვენს ამომრჩეველს?
– მიზეზები იყო სუბიექტურიც და ობიექტურიც. მაგალითად, ჩვენი ამომრჩევლის, საზოგადოების ძალიან დიდი ნაწილი წინააღმდეგი იყო კანაფის კულტივაციის. გასაგები იყო, რომ ეს კანონი ვერ გავიდოდა და უმრავლესობა მხარს არ დაუჭერდა, მაგრამ საზოგადოებაში არასწორი მოლოდინები შეიქმნა ამასთან დაკავშირებით.
ის საზოგადოება, რომელიც ჩვენგან ელოდება ტრადიციული ღირებულებების დაცვას, ეროვნული ინტერესების დაცვას, დაიბნა. ასევე, 6 წელია, გაუთავებლად მიდის ჩვენი მხრიდან საუბარი იმაზე, რომ ნაციონალური მოძრაობის დამნაშავეები არ შეიძლება რაიმე ფორმით “ოცნებასთან” ასოცირდებოდნენ.
– თუმცა, გუნდში გყავთ.
– ამიტომ, ჩვენც ცალსახა და მკაფიო მორალური არჩევანი უნდა გავაკეთოთ. საზოგადოებაში ეს კითხვის ნიშნები უნდა მოვხსნათ. ორგანიზებული მხრადაჭერა, რომელიც გვქონდა, გაიბნა, რადგან ხალხი ვეღარ მიხვდა, ჩვენ რა გვინდა. მათ კი მოახერხეს თავისი ძალების ორგანიზებულობითა და ხალხის გაჭირვებით სწორი მანიპულირება.
ჩვენ გზავნილები, რაც გვქონდა, ხალხამდე ვეღარ მივიტანეთ. მე მაინც მჯერა, რომ მეორე ტურში საზოგადოების განწყობები რადიკალურად შეიცვლება და შეიცვლება ჩვენი პოლიტიკაც იმ აქცენტებით, რომლებიც საზოგადოებამ დასვა.
ნათია ხურცილავა, ახალი თაობა