სახალხო დამცველის წარმომადგენელმა ,,რეაქციაში“ დაადასტურა, რომ ქალების შევიწროების შესახებ, მათთან სხვა განცხადებაცაა შესული, რომლის შესწავლაც მიმდინარეობს. საქმე შეეხება აქამდე გაუხმაურებელ ამბავს. ომბუდსმენის ოფისის წარმომადგენლის ამ განცხადებას ინგა გრიგოლია ფეისბუქის გვერდზე ეხმაურება:
„ჩვენს შეკითხვაზე, დაადასტურებს თუ არა, რომ ამ ახალ ქეისში ერთ-ერთი პოლიტიკოსი ფიგურირებს , მან გვიპასუხა,რომ ვერაფერს დაადასტურებს საბოლოო შესწავლამდე, თუმცა დაადასტურებს, რომ შევიწროებაზე აქამდე გასაჯაროებული ფაქტების გარდა, სხვა განცხადებაც შევიდა. წინ, როგორც ჩანს, ახალი სკანდალი გველის“ – წერს ტელეწამყვანი.
აღნიშნულ საკითხს ყოფილი დეპუტატი ლევან ბეჟაშვილი სოციალურ ქსელში გამოეხმაურა:
– ჟურნალისტი დამიკავშირდა და პაპუნა უგრეხელიძეზე კომენტარი მთხოვა. უარის სათქმელად მოვემზადე, რადგან მასთან მრავალწლიანი (სტუდენტობიდან) კარგი მეგობრობა მაკავშირებდა და მის სახელთან დაკავშირებული სკანდალური ინფორმაცია სასიამოვნო მოსასმენი არ იყო ჩემთვის. მთავარი მოულოდნელობა თურმე წინ მელოდა. პაპუნას თავის განცხადებაში მე ვუხსენებივარ….
პაპუნამ სექსუალურ შევიწროვებაში მისი დადანაშაულება პოლიტიკური ანგარიშსწორებად შეაფასა და ირიბად თუ პირდაპირ ჩემ სახელთან დააკავშირა.
თვალწინ დამიდგა სტუდენტობა, ერთად გატარებული წლები… რად უნდა გიღირდეს ქალზე შურისძიება, რომ ყველაფერს ამას ხაზი გადაუსვა უღირსი სპეკულაციით?!
მხოლოდ ფაქტები:
1. დაზარალებულის სახელი დღეს, მისი პოსტიდან შევიტყვე. (ამ ინფორმაციის გაჟღერიბით, პაპუნამ უხეშად დაარღვია საქართველოს კანონმდებლობა)
2. დაზარალებული ჩემი ყ ო ფ ი ლ ი მეუღლის ნათესავია. არც მასთან და არც სხვა ნათესავებთან 10 წელზე მეტია ურთიერთობა არ მაქვს სამწუხაროდ. არც მათ კარიერულ წინსვლაში არ მიმიძღვის წილი, მათ ჩემს პოლიტიკაში მოსვლამდე ბევრად ადრე დაიწყეს მუშაობა და თავაინთი პროფესიონალიზმით აღწევდნენ წარმატებას.
3. დაზარალებული ქალბატონი ღირსებით სავსე, წესიერი ადამიანია. ვუცხადებ სრულ ნდობას და მხარდაჭერას.
უღირსობა და ფსკერი! – აი ეს კომენტარი შეიძლება გქონდეს ადამიანში იმედგაცრუების მერე, – წერს ლევან ბეჟაშვილი.