საქართველოში ბოლო 24 საათის განმავლობაში 5-ზე მეტი მიწისქვეშა ბიძგი დაფიქსირდა. მათგან ყველაზე ძლიერი რაჭაში, ონში იყო და 5.1 მაგნიტუდა შეადგინა.
მიწისძვრა დაფიქსირდა თბილისშიც. სეისმური მონიტორინგის ცენტრის ინფორმაციით, დედაქალაქში ეპიცენტრი პატარა ლილოსთან მდებარეობდა და სიმძლავრე 2.8 ბალი იყო.
სეისმური დეპარტამენტის უფროსი მანანა ძმანაშვილი ამბობს, რომ პატარა ლილოსთან ბოლო პერიოდში მიწისძვრა რამდენჯერმე მოხდა, გუშინდელი ბიძგი კი მოსახლეობამ ძალიან სუსტად იგრძნო. თბილისში განმეორებითი ბიძგები არ დაფიქსირებულა.
ძმანაშვილი აცხადებს, რომ მცირე ბიძგები ამ წუთებშიც გრძელდება ონში, სადაც 5.1 მაგნიტუდის სიმძლავრის მიწისძვრას ავთერშოკები მოჰყვა. მისი თქმით, საათში დაახლოებით 6 ბიძგი ფიქსირდება, რაც სრულიად ჩვეულებრივი მოვლენაა და მცირე რყევებს მოსახლეობა ვერ გრძნობს.
რეზონანსი