“ლელოს” ერთ-ერთი ლიდერი ანა ნაცვლიშვილი “ახალ თაობასთან” ინტერვიუში ამბობს, რომ ფარული ჩანაწერების გამოძიების პროცესში ღარიბაშვილი უნდა გადადგეს:
– მას უნდა ეთქვა, რომ უდანაშაულოა, მაგრამ ვინაიდან ასეთი ეჭვი გაჩნდა, გადადგება და ყველაფერს გააკეთებს, რომ გამოძიება წარიმართოს ობიექტურად.
– ღარიბაშვილის დარჩენას მოლაპარაკებებში “ოცნების” სპიკერად “ლელო” არ ეთანხმებოდა, მაგრამ ოპოზიციამ სხვაგვარი გადაწყვეტილება მიიღო. რჩებით თქვენ პოზიციაზე?
– “ოცნების” ინტერესებშია, რომ გადამალოს თავისი პრემიერი და არ გამოაჩინონ. ასეთი შელახული სახე “ოცნებისთვისაც” კი უხერხულია. შესაბამისად, ჩვენი პოზიცია უცვლელია. იცით, რომ პროცესს არ ვშლით.
– დასხდებით მოლაპარაკებებზე?
– ღარიბაშვილი არ უნდა იყოს.
– თუ იქნება?
– არა, ეს ჩვენთვის არ არის მისაღები და “ლელო” არ იქნება იმ შეხვედრაზე. მაგრამ, დარწმუნებული ვარ, რომ არ იქნება. ღიად არ აღიარებენ ამას, მაგრამ პრობლემას აცნობიერებენ.
იაგო ნაცვლიშვილი, ახალი თაობა