გახარიას გუნდის ერთ-ერთი ლიდერი ნათია მეზვრიშვილი თბილისში დაიბადა 1985 წლის 18 აპრილს.
– ორი და მყავს და ოჯახში პირველი შვილი ვარ. გავიზარდე ვორონცოვზე და დავამთავრე 30-ე სკოლა, კიევის ქუჩაზე. ახლა, დაახლოებით 6 წელია, რაც ცალკე ვცხოვრობ, – უთხრა მან ამბებს.
ნათია მეზვრიშვილმა პირად ცხოვრებაზეც ისაუბრა.
– დაოჯახებული არ ვარ, ჩემი სიყვარული არ დამთავრდა კეთილად. ამჟამად არ ვარ შეყვარებული. არ გამოვრიცხავ იმასაც, რომ ჩემმა თანამდებობებმა შემიშალა ამაში ხელი. სამსახურისგან განსხვავებით, პირად ურთიერთობებში, როგორც ჩემი მეგობრები ამბობენ, ძალიან გახსნილი და რბილი ვარ, სამსახურს გარეთ ვტოვებ.
ზოგადად, მიყვარს ადამიანებთან ურთიერთობა, არ მიჭირს და არ ვარ ისეთი მკაცრი იმიჯით, როგორც სამსახურში. ალბათ ამ დაკავებულობამ მოიტანა, რომ ვერ მოვიცალე პირადი ცხოვრებისთვის. კეთილი შურით მშურს იმ ადამიანების, რომლებიც ერთმანეთს უთავსებენ კარიერას და პირად ცხოვრებას.
არ ვფიქრობ, რომ სიყვარული ერთხელ მოდის ცხოვრებაში, ნამდვილი სიყვარული ბევრჯერ შეიძლება ეწვიოს ადამიანს. კარგად და ტკბილად რომ მახსენდება, ალბათ ერთხელ იყო ასეთი გულისფანცქალი… ის ადამიანი უკვე დაოჯახებულია, ეს განვლილი პერიოდია, – უთხრა მან ამბებს.