ლალი ბადურაშვილი ყოველთვის იყო ქართული საზოგადოების ყურადღების ცენტრში.
მსახიობი 2020 წლის დასაწყისში 81 წლის ასაკში კლინიკაში სიმსივნით გარდაიცვალა.
ლალი ბადურაშვილს სიმსივნის დიაგნოზი 2019 წელს დაუსვეს. მისთვის უმძიმესი დარტყმა იყო ერთადერთი შვილის, რეჟისორ ერეკლე ბადურაშვილის გარდაცვალება. რეჟისორი 2019 წლის მარტში გარდაიცვალა, რის შემდეგაც ლალი ბადურაშვილი რამდენჯერმე მოხვდა საავადმყოფოში. ის შვილის დაკრძალვის დღესაც კლინიკაში გადაიყვანეს, სადაც გარკვეული პერიოდის განმავლობაში მკურნალობდა.
მაკა რაზმაძემ “ამბებს” უთხრა, რომ ლალი ბადურაშვილი სიკვდილამდე 1 თვით ადრე ნახა:
– ერთ-ერთ რესტორანში ვიყავით, არაჩვეულებრივი დრო ვატარეთ, ფელამუში მივირთვით, ფოტოებიც გადავიღეთ, ძველებური ლალი იყო, ისე დაგვამახსოვრა ბოლო შეხვედრაზე თავი, როგორიც იყო ლალი!
ჟურნალ “სარკესთვის” მიცემულ ინტერვიუში მსახიობი იხსენებდა:
“ძალიან გადაბმული დედა-შვილი ვიყავით. ჯერ ერთი, კინო გვაერთიანებდა, საერთო წრე გვყავდა, სტუდიაში ერთად ვიყავით. სულ სხვაა, როცა დილიდან საღამომდე ერთ სტუდიაში ხართ და გადაღებებიდან დაწყებული ყველაფერი საერთო გაქვთ.
ერეკლე არაჩვეულებრივი, მოსიყვარულე ადამიანი და ასეთივე მამა გახლდათ. ნინის ამიტომაც უჭირს ასე… 40 დღე ყოველდღე სასაფლაოზე ადიოდა და პანაშვიდს უხდიდა მამას. ნინი ამბობს, მის გარეშე მიჭირს, რადგან არამხოლოდ მამა, მეგობარი დავკარგე, ვისაც ყველაფერს ვუყვებოდიო…”
ლალი ბადურაშვილი 1970 წელს გადაიღეს ფილმში „დიდოსტატის მარჯვენა“, რომელშიც შეასრულა შორენას როლი. ასევე, მონაწილეობდა რამდენიმე ფილმში. იყო „ქართული ფილმის“ რედაქტორი.
2016 წელს მიენიჭა თბილისის საპატიო მოქალაქის წოდება.