გორის დევნილთა დასახლებაში ხანძარი გაჩნდა. შემთხვევის შედეგად მოხუცი მამაკაცი გარდაიცვალა. მასთან მყოფი შვილიშვილის გადარჩენა კი მეზობლებმა შეძლეს. “88 წლამდე კაცი გარდაიცვალა, შვილიშვილიც იყო და გადაარჩინეს, კაცის გამოყვანა კი ვერ მოხერხდა. სავარაუდოდ, სიგარეტის ნამწვის შედეგად მოხდა ხანძარი” – ამბობს ადგილობრივი. ამ დროისთვის ცეცხლი ლიკვიდირებულია.
რუსთავში ხარაჩოდან 62 წლის მუშა გადმოვარდა. ინფო რუსთავის ინფორმაციით, კაცი სკვერში არსებულ ატრაქციონებზე სამუშაოს ასრულებდა, რა დროსაც ხარაჩოდან გადმოვარდა და დაშავდა. დაშავებული სასწრაფო დახმარების ეკიპაჟმა საავადმყოფოში გადაიყვანა. არსებული ინფორმაციით, კაცის სიცოცხლეს საფრთხე არ ემუქრება.
ტრაგედია ქობულეთში – ზღვაში შესულმა 12 წლის მოზარდმა ნაპირზე გამოსვლა ვერ შეძლო და დაიხრჩო. ადგილზე მისულმა სასწრაფო სამედიცინო დახმარების ჯგუფებმა მოზარდის გადარჩენა ვერ შეძლეს. ცხედარი ამ დროისთვის პროზექტურაშია გადასვენებული და ექსპერტიზა უტარდება.
ვარკეთილში, გვიან ღამით კორპუსის პირველი სართულიდან 6 წლის ბავშვი გადავარდა. არსებული ინფორმაციით, ბიჭი კონტაქტური იყო და ის ერთ-ერთ კლინიკაში გადაიყვანეს. როგორც თვითმხილველები ამბობენ, დაზიანებები არ შეუნიშნავთ, თუმცა, არასრულწლოვანი შეშინებული იყო. როგორია ბავშვის ჯანმრთელობის მდგომარეობა და რა სახის დაზიანებები აქვს, ამაზე კლინიკა კომენტარს ჯერჯერობით არ აკეთებს.
ამ წუთებში თბილისის ზღვაზე მაშველები და ექიმები ახალგაზრდა მამაკაცის გადარჩენას ცდილობენ. ის ზღვიდან უგონო მდგომარეობით გამოიყვანეს. არსებული ინფორმაციით, 24 წლის მამაკაცი ირანის მოქალაქეა.
მარნეულში 17 წლის ახალგაზრდა მდინარე დებედაში დაიხრჩო. შემთხვევა მარნეულის სოფელ აღმამედლოში მოხდა. ელმან გამბაროვი მდინარეში საბანაოდ შევიდა და უკან გამოსვლა ვეღარ შეძლო. მის დასახმარებლად ადგილზე მყოფები წყალში შევიდნენ, თუმცა უშედეგოდ. ადგილობრივები ამბობენ, რომ იმ ტერიტორიაზე ქვის ქარხნებია და სხვადასხვა გათხრები მიმდინარეობს, რის გამოც მდინარეს გარკვეულ ადგილებში სიღრმეები აქვს და სწორედ ერთ-ერთ ასეთ მონაკვეთში ჩავარდა ახალგაზრდა.
56 წლის მამუკა კილაძე, რომელსაც ოჯახი ქუთაისში სამი დღე ეძედბა, იპოვეს. ინფორმაციას „ინფო რუსთავი” მამაკაცის შვილზე დაყრდნობით ავრცელებს. მისი თქმით, მამაკაცი ჯანმრთელი დაუბრუნდა ოჯხას და თავს კარგად გრძნობს. სხვა დეტალები ამ დროისთვის უცნობია.
ქუთაისში ავტოსაგზაო შემთხვევა მოხდა. მომხდარის შედეგად ერთი ადამიანი დაიღუპა. ნიკეას ქუჩაზე მომხდარი ავტოსაგზაო შემთხვევის გამომწვევი მიზეზები და სხვა დამატებითი დეტალები ჯერჯერობით ცნობილი არ არის.
მარნეულის ცენტრალური ბაზრის ტერიტორიაზე დღეს უბედური შემთხვევა მოხდა. 55 წლამდე კაცმა მოულოდნელად გონება დაკარგა და წაიქცა. თვითმხილველებმა ადგილზე სასწრაფო სამედიცინო დახმარება გამოიძახეს, მაგრამ სანამ სასწრაფო-სამედიცინო დახმარების ეკიპაჟი მოვიდოდა, კაცი გარდაიცვალა. წინასწარი ვერსიით, შუახნის კაცი გულის შეტევით გარდაიცვალა.
ვარკეთილის მე-3 მასივის მე-8 კვარტლის ერთ-ერთი კორპუსიდან მოსახლეობის ევაკუაცია მიმდინარეობს. არსებული ინფორმაციით, ავარიული საცხოვრებელი სახლი ჩამოინგრა და მოსახლეობა სხვა ადგილას გადაჰყავთ. წინასწარი ინფორმაციით, შემთხვევის შედეგად დაშავებულები არ არიან.