ხვალ საქართველოს ნაკრები 2018 წლის მსოფლიოს ჩემპიონატის შესარჩევ ეტაპზე მორიგ მატჩს გამართავს ავსტრიის ნაკრებთან.
ვენაში ტრადიციული მატჩისწინა პრესკონფერენცია გაიმართა, სადაც საქართველოს ნაკრების მთავარმა მწვრთნელმა ვლადიმირ ვაისმა ჟურნალისტთა კითხვებს უპასუხა.
_ ნაკრები უმოტივაციოდ არის, როგორ ემზადება ხვალინდელი მატჩისთვის?
_ ჩვენც ისევე შევეცდებით 3 ქულის აღებას, როგორც ავსტრია. ჩვენ ვენაში ქალაქის დასათვალიერებლად არ ჩამოვსულვართ.
_ გუნდი დღეს ჩამოვიდა ავსტრიაში და მატჩის წინ მხოლოდ ერთ ვარჯიშს გამართავს. როგორც ვიცით, გუნდში რამდენი ცვლილება იქნება და ერთი ვარჯიში ფეხბურთელების შესათამაშებლად საკმარისი იქნება?
_ გუშინ მხოლოდ აღდგენითი ვარჯიში გვქონდა, დღესაც მსუბუქად ვივარჯიშებთ. ეს ხელს არ შეგვიშლის სტრატეგიაში. რამდენიმე ცვლილება გვექნება, ზოგი იძულებითი, ზოგიც _ ტაქტიკური.
_ გასულ წელს ავსტრიას თბილისში ვუმასპინძლეთ, რა შეიცვალა მას შემდეგ?
_ ბოლო წლის განმავლობაში უკეთესობისკენ შეიცვალა, მართალია, მოგება ჯერ არ გვაქვს, მაგრამ ამას ხვალ შევეცდებით.
_ ფედერაციას კონტრაქტის თაობაზე საუბარი ხომ არ გქონიათ?
_ ფედერაციამ ახალი კონტრაქტი შემომთავაზა, მაგრამ ჯერ თავს ვიკავებ, წინ 3 თამაშია და შემდეგ შეიძლება საუბარი.
_ ავსტრიის ნაკრებს როგორ შეაფასებდით?
_ ავსტრია ძალიან კარგი გუნდია, ალბათ უკეთეს ადგილსაც იმსახურებს, ვიდრე მე-4 ადგილია. ჰყავს კარგი ფეხბურთელები და შემსრულებლები, ასევე კარგი მწვრთნელი.
მიშა ჟორჟოლიანი, ვენა