“რუსთაველზე გადარბენას აპირებდა, რომ მის ფეხებთან “მერსედესმა” ღრჭიალით დაამუხრუჭა…”

ფოტოგრაფი გოგა ჩანადირი სოციალურ ქსელში სახალისო ამბავს ავრცელებს, რომლის ავტორიც ვაჟა დანელიაა.
“გაგიჟდი?!
ის იყო, კოჩია რუსთაველის პროსპექტზე გადარბენას აპირებდა, რომ მის ფეხებთან „მერსედესმა“ ღრჭიალით დაამუხრუჭა.
-გაგიჟდი? – უყვირა მიტკლადქცეულმა ახალგაზრდა მძღოლმა.
-კაცო, თვალებში ვერ იხედები? – ბრალი დასდო მანქანის პატრონს. – ხომ ხედავ, ქუჩაზე გადავდივარ!
-ჩემი გზაა…
-შენი, რა, ბაბუაშენმა გაჩუქა?! – არ დაუთმო კოჩიამ. – არ გასწავლეს, ნელა იარე და ქვეითებს პატივი ეციო?!
-ღმერთო, ყველა სულელი მე როგორ უნდა გადამეყაროს! – იქუხა ისევ მძღოლმა.
-ჰოდა, გზა სწორედ სულელებს უნდა დაუთმო, თორემ ჭკვიანი ქუჩას აქ გადაკვეთდა?! – თავი იმართლა კოჩიამ და ბორდიურს გაუყვა. “