სასწრაფო დახმარების ბრიგადამ კიდევ ერთი ადამიანი გადაარჩინა. ადგილზე მისულ ექიმებს, 34 წლის მამაკაცი უგონო მდგომარეობაში დახვდათ.
“2018 წლის 1 აპრილს, სასწრაფო სამედიცინო ცენტრის 0311 ბრიგადა – უფროსი ექიმი ლია რევიშვილი, უმცროსი ექიმი გვანცა მაისურაძე, მძღოლი ვაჟა იმერლიშვილი, სერიოზული გამოწვევის წინაშე აღმოჩნდა.
თბილისის ერთ-ერთ უბანში მისულ ექიმებს 34 წლის მამაკაცი უგონო მდგომარეობაში დახვდათ. პაციენტს არ ჰქონდა პულსი, მონიტორზე აღინიშნებოდა გულის გაჩერება.
ჩვენმა ექიმებმა პაციენტს ადგილზე აღმოუჩინეს დახმარება. ახალგაზრდა მამაკაცს ჩაუტარდა გულ-ფილტვის წარმატებული რეანიმაცია, რომლის შედეგად მას აღუდგა პულსი, არტერიული წნევა და გახდა კონტაქტური.
პაციენტი დამაკმაყოფილებელ მდგომარეობაში ჰოსპიტალიზირებულ იქნა ელისაბედ ბლექველის ჰოსპიტალში.
თბილისის სასწრაფო სამედიცინო დახმარების ცენტრი მამაკაცს გამოჯანმრთელებას უსურვებს” – აღნიშნულია თბილისის სასწრაფო სამედიცინო დახმარების ცენტრის მიერ გავრცელებულ ინფორმაციაში.
ნიუპოსტი