ბასილაშვილმა შტრუფს მოუგო და მონრეალის მერვედფინალში გავიდა

7 აგვისტოს, მონრეალის მასტერსის 1/16-ფინალში ნიკოლოზ ბასილაშვილმა თავის მეწყვილეს, გერმანელ იან-ლენარდ შტრუფს (35) 3 სეტში ანგარიშით 2:6, 6:2, 6:3 მოუგო.

ამ გამარჯვების შემდეგ ქართველი ჩოგბურთელი მესამე წრეში ალეკსანდრ ზვერევს შეხვდება, რომელიც ჰამბურგის ტურნირის ნახევარფინალში რამდენიმე დღის წინ დაამარცხა.

ბასილაშვილი და შტრუფი აქამდე ერთმანეთს ორჯერ დაუპირისპირდნენ, ერთხელ ქართველმა იმარჯვა, ხოლო ერთხელ – გერმანელმა.

პირველ წრეში ბასილაშვილმა სერბი დუშან ლაიოვიჩი 3:6, 6:4, 6:4 დაამარცხა.

შტრუფი და ბასილაშვილი ამავე ტურნირზე წყვილთა თანრიგში ერთად ასპარეზობენ და დღეს, 7 აგვისტოს, თბილისის დროით 20:00 საათზე ედმანდისა და ფრიცის წყვილს დაუპირისპირდებიან.

ხოლო, რაც შეეხება ზვერევთან მატჩს, აღნიშნული შეხვედრა ხვალ, 8 აგვისტოს, თბილისის დროით 20:00 საათზე არის ჩანიშნული.

სპორტალი

დატოვეთ თქვენი კომენტარი