აჭარის უმაღლესი საბჭოს ყოფილი წევრი, მედეა ვასაძე სახელმწიფო უსაფრთხოების სამსახურის უფროსს, ვახტანგ გომელაურს მიმართავს.
ვასაძე აცხადებს, რომ მას სამსახურის სანაცვლოდ ქრთამად 30.000 დოლარი შესთავაზეს.
“სახელმწიფო უსაფრთხოების სამსახურის უფროსს ბატონ ვ.გომელაურს.
მე,მედეა ვასაძე,აჭარის ა.რ.უმაღლესი საბჭოს ყოფილი წევრი, საჯაროდ მოგმართავთ შემდეგ ფაქტზე – მაქვს ჯანმრთელობის პრობლემები და ოჯახის პირობებში გავდივარ მკურნალობას. 2019 წლის 23 აგვისტოს, ანუ დღეს, 12 საათსა 14 წუთზე ჩემს მობილურ ტელეფონზე დაფიქსირდა ზარი, რომელსაც ვუპასუხე.
მოქალაქე, რომელმაც თავი წარმომიდგინა გვარით და სახელით – ვერ შევიცანი, იგი მთხოვდა შეხვედრას, ჩემს პასუხზე, რომ ვარ ავად და თუ პრობლემები ჰქონდა დახმარებას ვერ მოვახერხებდი, თხოვნა გამიმეორა და დამიკონკრეტა ვინაობა (ყოფილი მეზობელი), რომელიც მაინც ვერ გავიხსენე.
უხერხულობის გამო დავთანხმდი მობრძანებულიყო სახლში. მოსული სახეზე მეცნო. მან შემოსვლისთანავე დააზუსტა, ვიყავი თუ არა მარტო, მოკითხვის შემდეგ კი მითხრა, რომ ბოლო ოცი წელი ცხოვრობდა რუსეთში, იყო ერთი თვის დაბრუნებული, ეძებდა სამსახურს, მზად იყო თანხის (30.000 დოლარის) გადასახდელად, რომლის ნაწილიც თან ჰქონდა და დამისახელა რამდენიმე თანამდებობა, აგრეთვე თანახმა იყო იმაზეც, რასაც შევთავაზებდი. ჩემი პასუხი მდგომარეობდა იმაში, რომ თუ რაიმე შემეძლო, ამის გარეშეც დავეხმარებოდი, ამ შინაარსის თხოვნას კი კატეგორიულად არ ვღებულობდი.
ბატონო გომელაურო, შეწყვიტეთ ეს მაპროვოცირებელი, დაგეგმილი, მართვადი ქმედებები, რომელიც ერთხელ უკვე,”მოსინჯული” გაქვთ მურმან დუმბაძესთან მიმართებაში (2015 წელს), რაზედაც მიმართული გვაქვს პროკურატურისათვის და მეხუთე წელია, მიუხედავად იმისა, რომ პროვოკაციის მომწყობი თქვენი აგენტი უკანვე “ჩაგაბარეთ”, გამოძიება ადგილიდან დაძრულიც კი არ არის…” – წერს ვასაძე.
ნიუპოსტი