65 წლის თამარ ბაღაშვილი დედოფლისწყაროში გაგუდული იპოვეს

დედოფლისწყაროს მუნიციპალიტეტის სოფელ არბოშიკში 65 წლის ქალი გარდაცვლილი იპოვეს. არსებული ინფორმაციით, მას ძალადობის კვალი აღენიშნება.

როგორც საქართველოს პირველ არხს მერის წარმომადგენელმა, მურად ელაშვილმა განუცხადა, ქალი სახლში მარტო ცხოვრობდა. მისი თქმით, ცხედარი გარდაცვლილის ძმისშვილმა და მეზობელმა მას შემდეგ აღმოაჩინეს, რაც ტელეფონზე აღარ პასუხობდა და ბინაში მიაკითხეს.

წინასწარი დათვალიერებით, ქალი სავარაუდოდ გაგუდეს.

„ჩამსხვრეული იყო სახლის მინები. სახლშიც ნივთები არეული, ალბათ რამეს ეძებდნენ. გარდაცვლილი თამარ ბაღაშვილი მარტო ცხოვრობდა. მეუღლე სამი წლის წინ გარდაეცვალა. სკოლასთან ახლოს ღვეზელებს ყიდდა. შეიძლება, გაქურდვის მიზნით შევიდნენ ღამით და ქალი გაგუდეს“, – განაცხადა ელაშვილმა.

მომხდარზე დაწყებულია გამოძიება სისხლის სამართლის კოდექსის 108-ე მუხლით, რაც განზრახ მკვლელობას გულისხმობს.