მეზობლების ინფორმაციით, თბილისში, ზოზიაშვილის ქუჩაზე ბებიისა და დედის მკვლელობის ბრალდებით დაკავებულ 19 წლის ახალგაზრდას ოჯახში კონფლიქტი არ ჰქონია და მან მკვლელობის შესახებ პოლიციას თავად შეატყობინა.
„წარმოდგენა არ მაქვს, რა მოხდა. ხმამაღლა ლაპარაკიც არ გამიგია. დაახლოებით 7 წელია აქ ცხოვრობენ, თუმცა სახლის მეპატრონე სხვა პირია, ის ამერიკაში ცხოვრობს და სახლი ოჯახს დაუტოვა, რადგან შეეცოდა ესენი, სოფლიდან იყვნენ ჩამოსული, ქირასაც არ იხდიდნენ. ხმაური არ გამიგია, ეძინათ თურმე. ნორმალური ბავშვი იყო. სამი ადამიანი ცხოვრობდა სახლში, დედა, ბებია და თვითონ. პოლიციაში თავად დაურეკავს”, – აცხადებს ერთ-ერთი მეზობელი.
როგორც მეზობლები ყვებიან, სავარაუდო დამნაშავემ მკვლელობის შემდეგ ტერიტორია დატოვა, გარეთ გამოვარდა და დანაშაულს აღიარებდა.
“რა მოხდა, არ ვიცი, ყვირილზე გამოვიხედე, დაახლოებით ღამის 3 საათი იქნებოდა. დედა და ბებია მოვკალიო, ყვიროდა, ამ დროს უკვე მოდიოდა პოლიციაც. მიზეზი არ ვიცი, ჭკვიანი ბავშვია, რამდენიმე წელია ჩვენს ქუჩაზე ცხოვრობენ და ცუდი არაფერი შეგვიმჩნევია,” – აცხადებს მეზობელი.
შეგახსენებთ, თბილისში 19 წლის ბიჭმა დედა და ბებია მოკლა. შსს-ს ინფორმაციით, გამოძიებით დადგინდა, რომ ბრალდებულმა ბებია – 1946 წელს დაბადებული ზ.დ. და დედა – 1974 წელს დაბადებული თ.ზ., მათსავე საცხოვრებელ სახლში, წარსულში არსებული კონფლიქტის ნიადაგზე, მძინარე მდგომარეობაში ნაჯახით მოკლა.