ამბროლაურში 19 წლის ბიჭებმა 29 წლის ვლასი აბუთიძე ცემით მოკლეს. როგორც შინაგან საქმეთა სამინისტროს მიერ გავრცელებულ განცხადებაშია ნათქვამი, ორივე ბრალდებული პოლიციამ ცხელ კვალზე დააკავა.
“შინაგან საქმეთა სამინისტროს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის თანამშრომლებმა, გატარებული ოპერატიული და საგამოძიებო მოქმედებების შედეგად, ამბროლაურის მუნიციპალიტეტში მომხდარი მკვლელობა ცხელ კვალზე გახსნეს. დამამძიმებელ გარემოებაში ჯგუფურად ჩადენილი განზრახ მკვლელობის ბრალდებით დაკავებულია 2001 წელს დაბადებული 2 პირი: ვ.ს. და ი.ქ.
დანაშაული 13-დან 17 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ მიმდინარე წლის 22 აგვისტოს, ამბროლაურის მუნიციპალიტეტის ერთ-ერთ სოფელში, არაფხიზელ მდგომარეობაში მყოფ ბრალდებულებს და 1990 წელს დაბადებულ ლ.ა.-ს შორის სიტყვიერი შელაპარაკება მოხდა, რაც ფიზიკურ დაპირისპირებაში გადაიზარდა.
ლ.ა. დაპირისპირების დროს მიღებული დაზიანებებით შემთხვევის ადგილზე გარდაიცვალა.
პოლიციამ ბრალდებულები დანაშაულის ჩადენიდან რამდენიმე საათში, ცხელ კვალზე დააკავა. ისინი ჩადენილ დანაშაულს აღიარებენ. მომხდარ ფაქტთან დაკავშირებით დანიშნულია შესაბამისი ექსპერტიზები.
დამამძიმებელ გარემოებაში ჯგუფურად ჩადენილი განზრახ მკვლელობის ფაქტზე გამოძიება სისხლის სამართლის კოდექსის 109-ე მუხლის მე-2 ნაწილის “ე” ქვეპუნქტით მიმდინარეობს” – ნათქვამია განცხადებაში.
როგორც AMBEBI.GE-სთვის გახდა ცნობილი, დაკავებულები ტყიბულის მუნიციპალიტეტიდან არიან.
ვლასი აბუთიძეს მეუღლე და მცირეწლოვანი გოგონა დარჩა. ამბროლაურის მუნიციპალიტეტში გვიყვებიან, რომ ახალგაზრდას სოფელში კოტეჯი ჰქონდა, სადაც მდგმურები ჰყავდა.
“მდგმურებმა გარდაცვლილს დაურეკეს და დახმარება თხოვეს, რადგან გვერდით მყოფი მუშები მათ აწუხებდნენ. სავარაუდოდ, ადგილზე დაპირისპირება მოხდა, რაც მკვლელობით დასრულდა” – ამბობენ ადგილობრივები AMBEBI.GE-სთან საუბარში.
არსებული ინფორმაციით, 29 წლის მამაკაცი ხელით არის გაგუდული.
ამბები